Read Scots Gaelic 1992 – Am Bìoball Gàidhlig 199 Tuireadh Ieremiah 5 Bible Online

Tuireadh Ieremiah 5 - Scots Gaelic 1992 – Am Bìoball Gàidhlig 199 bible

Tuireadh Ieremiah 5

¹Cuimhnich, O Thighearna, ciod a thàinig oirnn: thoir fa‑near, agus faic ar masladh.

²Thugadh thairis ar n‑oighreachd do choimhich, ar taighean do choigrich.

³Tha sinn nar dìlleachdain, agus gun athair, ar màthraichean mar bhantraichean.

⁴Dh’òl sinn ar n‑uisge airson airgid; tha ar fiodh air a reic rinn.

⁵Le cuing ar muineal tha sinn air ar sìor leòn; tha sinn a’ saothrachadh, agus gun fhois againn.

⁶Thug sinn an làmh do na h‑Eiphitich, agus do na h‑Asirianaich, a‑chum a bhith air ar sàsachadh le aran.

⁷Pheacaich ar n‑athraichean, agus chan eil iad ann, agus ghiùlain sinne an euceartan.

⁸Bha seirbhisich nan uachdarain oirnn; chan eil duine sam bith ann a shaoras on làmhan.

⁹Fhuair sinn ar n‑aran le cunnart ar n‑anama, do bhrìgh claidheamh an fhàsaich.

¹⁰Bha ar craiceann dubh mar àmhainn, do bhrìgh na gorta uamhasaich.

¹¹Dh’èignich iad na mnathan ann an Sion, na maighdeannan ann an cathraichean Iùdah.

¹²Bha prionnsachan air an crochadh suas air an làimh: cha tug iad urram do aghaidh nan aosda.

¹³Ghabh iad na h‑òganaich gu meileadh, agus thuit a’ chlann fon chonnadh.

¹⁴Thrèig na seanairean an geata, na h‑òganaich an ceòl.

¹⁵Sguir aoibhneas ar cridhe; chaochail ar dannsadh gu bròn.

¹⁶Thuit an coron bhàrr ar cinn: mo thruaighe sinn, a chionn gun do pheacaich sinn.

¹⁷Airson seo tha ar cridhe lag; airson nan nithean seo tha ar sùilean air an dorchachadh.

¹⁸Airson sliabh Shioin a tha fàs; tha na sionnaich a’ coiseachd air.

¹⁹Ach tha thusa, O Thighearna, maireannach gu sìorraidh; do chathair rìoghail o linn gu linn.

²⁰Cuime an dèan thu dearmad oirnn gu bràth, agus a bheil thu gar trèigsinn ùine cho fada?

²¹Till sinne thugad, O Thighearna, agus bidh sinn air ar tilleadh: ath-nuadhaich ar làithean mar o shean.

²²Oir thilg thu sinn cian fada uat; bha thu ro‑fheargach nar n‑aghaidh.