Read Scots Gaelic 1992 – Am Bìoball Gàidhlig 199 Leabhar an Fhàidh Ioel 3 Bible Online

Leabhar an Fhàidh Ioel 3 - Scots Gaelic 1992 – Am Bìoball Gàidhlig 199 bible

Leabhar an Fhàidh Ioel 3

¹Oir feuch, anns na làithean sin, agus anns an àm sin, nuair a bheir mise air a h‑ais bruid Iùdah, agus Ierusaleim, tàrlaidh

²Gun cruinnich mi na h‑uile chinnich, agus bheir mi sìos iad gu gleann Iehosaphait, agus tagraidh mi riu an sin airson mo shluaigh, agus airson m’oighreachd Israel, a sgap iad am measg nan cinneach; agus roinn iad mo dhùthaich.

³Agus thilg iad croinn airson mo shluaigh; agus thug iad giullan airson strìopaich, agus reic iad nìonag airson fìona, a‑chum gun òladh iad.

⁴Seadh, agus ciod ur gnothach-se riumsa, O Thìruis, agus a Shìdoin, agus uile chrìochan Phalistin? An dìol sibh rium luigheachd? A‑nis ma bheir sibh dhomh luigheachd, gu luath, gu grad dìolaidh mi ur luigheachd air ur ceann fhèin;

⁵A chionn gun do ghabh sibh m’airgead agus m’òr, agus gun do ghiùlain sibh gu ur teampaill mo nithean luachmhor taitneach.

⁶Clann Iùdah fòs, agus clann Ierusaleim reic sibh ris na Greugaich, a‑chum gun atharraicheadh sibh iad am fad on crìch fhèin.

⁷Feuch, togaidh mise iad as an àite gus an do reic sibh iad; agus tillidh mi ur luigheachd air ur ceann fhèin.

⁸Agus reicidh mi ur mic agus ur nigheanan gu làimh chloinn Iùdah; agus reicidh iadsan iad ris na Sabèanaich, ri sluagh fad as; oir labhair an Tighearna e.

⁹Eighibh-se an seo am measg nan cinneach; ullaichibh cogadh, dùisgibh suas na cumhachdaich; thigeadh na fir-chogaidh uile am fagas, thigeadh iad a‑nìos.

¹⁰Dèanaibh claidheamhan de ur coltairean agus sleaghan de ur corrain-sgathaidh; abradh an lag, Tha mi làidir.

¹¹Cruinnichibh sibh fhèin, agus thigibh, a chinneacha gu lèir, agus tionailibh o gach taobh mun cuairt; an sin bheir thusa air na cumhachdaich teachd a‑nuas, O Thighearna.

¹²Dùisgeadh na cinnich, agus thigeadh iad a‑nìos gu gleann Iehosaphait: oir an sin suidhidh mise gu breith a thoirt air na cinnich uile mun cuairt.

¹³Sàthaibh an corran, oir tha am fogharadh abaich; thigibh, gabhaibh sìos, oir tha an t‑amar-fìona làn, tha na dabhachan a’ cur thairis: oir tha an aingidheachd mòr.

¹⁴Mòr-chuideachdan, mòr-chuideachdan, ann an gleann a’ ghearraidh; oir tha là an Tighearna dlùth ann an gleann a’ ghearraidh.

¹⁵Dorchaichear a’ ghrian agus a’ ghealach, agus cumaidh na reultan air ais an dealradh.

¹⁶Agus beucaidh an Tighearna a‑mach à Sion, agus o Ierusalem cuiridh e a‑mach a ghuth, agus bidh crith air na nèamhan, agus air an talamh: ach bidh an Tighearna na ionad-dìdein da shluagh; agus na dhaingneach làidir do chloinn Israeil.

¹⁷Mar sin aithnichidh sibh gur mise an Tighearna ur Dia, a tha a chòmhnaidh ann an Sion, mo shliabh naomh: an sin bidh Ierusalem naomh, agus cha tèid coigrich troimhpe nas mò.

¹⁸Agus tàrlaidh anns an là sin gun sil na slèibhtean a‑nuas fìon nuadh, agus sruthaidh na beanntan le bainne; agus sruthaidh uile aibhnichean Iùdah le uisgeachan; agus thig tobar a‑mach o thaigh an Tighearna, agus uisgichidh e gleann Shitim.

¹⁹Bidh an Eiphit na nochd-làraich, agus bidh Edom na fhàsach uaigneach; airson an ainneirt an aghaidh chloinn Iùdah; a chionn gun do dhòirt iad fuil nan neo-chiontach nam fearann.

²⁰Ach gabhaidh Iùdah còmhnaidh gu sìorraidh, agus Ierusalem o linn gu linn.

²¹Agus glanaidh mise am fuil-san nach do ghlan mi; agus gabhaidh an Tighearna còmhnaidh ann an Sion.