Read Scots Gaelic 1992 – Am Bìoball Gàidhlig 199 Ceathramh Leabhar Mhaois Don Ainm Aireamh 10 Bible Online

Ceathramh Leabhar Mhaois Don Ainm Aireamh 10 - Scots Gaelic 1992 – Am Bìoball Gàidhlig 199 bible

Ceathramh Leabhar Mhaois Don Ainm Aireamh 10

¹Agus labhair an Tighearna ri Maois, ag ràdh,

²Dèan dhut fhèin dà thrompaid airgid; a dh’aon mhìr nì thu iad; agus gnàthaichidh tu iad a ghairm a’ choitheanail, agus a‑chum turas nan camp.

³Agus nuair a shèideas iad leo, cruinnichidh an coitheanal uile iad fhèin ad ionnsaigh aig doras pàillean a’ choitheanail.

⁴Agus mura sèid iad ach le aon trompaid, an sin cruinnichidh na ceannardan a tha nan cinn-fheadhna air mhìltean Israeil iad fhèin ad ionnsaigh.

⁵Nuair a shèideas sibh caismeachd, an sin thèid na campannan a tha nan laighe air taobh na h‑àird an ear air an aghaidh.

⁶Nuair a shèideas sibh caismeachd an dara uair, an sin thèid na campannan a tha nan laighe air taobh na h‑àird a deas air an aghaidh: sèididh iad caismeachd a‑chum an turasan.

⁷Ach nuair a tha an coitheanal gu bhith air a chruinneachadh an ceann a chèile, sèididh sibh, ach cha sèid sibh caismeachd.

⁸Agus sèididh mic Aaroin, na sagartan, leis na trompaidean; agus bidh iad dhuibh mar reachd sìorraidh air feadh ur ginealaichean.

⁹Agus ma thèid sibh gu cogadh nur dùthaich an aghaidh an nàmhaid a tha a’ dèanamh fòirneirt oirbh, an sin sèididh sibh caismeachd leis na trompaidean; agus cuimhnichear sibh an làthair an Tighearna ur Dia, agus saorar sibh o ur naimhdean.

¹⁰Mar an ceudna ann an là ur subhachais, agus nur n‑àrd làithean fèille, agus ann an toiseach ur mìosan, sèididh sibh leis na trompaidean os cionn ur n‑ìobairtean-loisgte, agus os cionn ìobairtean ur tabhartas-sìthe; agus bidh iad dhuibh mar chuimhneachan an làthair ur Dè; Is mise an Tighearna ur Dia.

¹¹Agus thàrladh air an fhicheadamh là den dara mìos, anns an dara bliadhna, gun do thogadh suas an neul o uachdar pàillean na Fianais.

¹²Agus ghabh clann Israeil an turasan à fàsach Shinài; agus stad an neul ann am fàsach Phàrain.

¹³Agus ghabh iad air tùs an turas a rèir àithne an Tighearna le làimh Mhaois.

¹⁴Anns a’ chiad àite dh’imich bratach camp chloinn Iùdah, a rèir an armailtean; agus air ceann a shlòigh bha Nahson mac Aminadaib.

¹⁵Agus air ceann sluagh treubh chloinn Isachair bha Nàtaneel mac Shuair.

¹⁶Agus air ceann sluagh treubh chloinn Shebuluin bha Eliab mac Helean.

¹⁷Agus thugadh a‑nuas am pàillean; agus chaidh mic Ghersoin agus mic Mherari air an aghaidh, a’ giùlan a’ phàillein.

¹⁸Agus ghluais bratach camp Reubein air a h‑aghaidh, a rèir an armailtean; agus air ceann a shlòigh bha Elisur mac Shedeuir.

¹⁹Agus air ceann sluagh treubh chloinn Shimeoin bha Selumiel mac Shurisadai.

²⁰Agus air ceann sluagh treubh chloinn Ghad bha Eliasaph mac Dheueil.

²¹Agus chaidh na Cohataich air an aghaidh, a’ giùlan an ionaid naoimh, agus chuireadh suas am pàillean air cheann dhaibh teachd.

²²Agus ghluais bratach camp chloinn Ephraim air a h‑aghaidh, a rèir an armailtean: agus air ceann a shlòigh bha Elisama mac Amihuid.

²³Agus air ceann sluagh treubh chloinn Mhanaseh bha Gamaliel mac Phedahsuir.

²⁴Agus air ceann sluagh treubh chloinn Bheniàmin bha Abidan mac Ghideoni.

²⁵Agus chaidh bratach treubh chloinn Dhan air a h‑aghaidh, a bha air deireadh nan camp uile air feadh an slògh: agus air ceann a shlòigh bha Ahieser mac Amisadai.

²⁶Agus air ceann sluagh treubh chloinn Aseir bha Pagiel mac Ocrain.

²⁷Agus air ceann sluagh treubh chloinn Naphtali bha Ahira mac Enain.

²⁸B’iad sin turasan chloinn Israeil, a rèir an armailtean, nuair a ghluais iad air an aghaidh.

²⁹Agus thubhairt Maois ri Hobab, mac Ragueil am Midianach, athair-cèile Mhaois, Tha sinn air ar turas a‑chum an àite mun dubhairt Dia, Bheir mi dhuibh e: thig thusa maille rinn, agus nì sinn math dhut: oir labhair an Tighearna math a‑thaobh Israeil.

³⁰Agus thubhairt e ris, Cha tèid mi maille ribh: ach imichidh mi a‑chum mo dhùthcha fhèin, agus a‑chum mo dhìlsean fhèin.

³¹Agus thubhairt e, Na fàg sinn, guidheam ort; oir tha fhios agad cionnas a champaicheas sinn anns an fhàsach, agus bidh tu dhuinn an àite shùl.

³²Agus tàrlaidh, ma thèid thu maille rinn, seadh, tàrlaidh ge bè math a nì Dia dhuinne, gun dèan sinne am math ceudna dhutsa.

³³Agus dh’imich iad o shliabh an Tighearna astar trì làithean: agus chaidh àirc coicheangal an Tighearna romhpa astar trì làithean, a rannsachadh a‑mach àite-tàimh dhaibh.

³⁴Agus bha neul an Tighearna orra anns an là, nuair a chaidh iad a‑mach as a’ champ.

³⁵Agus thàrladh, nuair a bha an àirc gu dol air a h‑aghaidh, gun dubhairt Maois, Eirich suas, a Thighearna, agus biodh do naimhdean air an sgapadh, agus teicheadh a’ mhuinntir leis am fuathach thu romhad.

³⁶Agus nuair a stad i, thubhairt e, Till, a Thighearna, a‑chum nam mìltean de mhìltean Israeil.