Read Scots Gaelic 1992 – Am Bìoball Gàidhlig 199 Ceathramh Leabhar Mhaois Don Ainm Aireamh 28 Bible Online

Ceathramh Leabhar Mhaois Don Ainm Aireamh 28 - Scots Gaelic 1992 – Am Bìoball Gàidhlig 199 bible

Ceathramh Leabhar Mhaois Don Ainm Aireamh 28

¹Agus labhair an Tighearna ri Maois, ag ràdh,

²Aithn do chloinn Israeil, agus abair riu, Mo thabhartas, agus m’aran airson m’ìobairtean a bheirear suas le teine a‑chum fàile chùbhraidh dhomh, bheir sibh an aire gun toir sibh seachad dhòmhsa nan àm iomchaidh fhèin.

³Agus their thu riu, Is e seo an tabhartas a bheirear suas le teine, a bheir sibh seachad don Tighearna; dà uan den chiad bhliadhna gun ghaoid gach là, a‑chum ìobairt-loisgte ghnàthaichte.

⁴Aon uan bheir thu seachad anns a’ mhadainn, agus an t‑uan eile bheir thu seachad anns an fheasgar;

⁵Agus an deicheamh earrann de ephah fhlùir mar thabhartas-bìdh, measgte leis a’ cheathramh earrainn de hin de ola bhrùite.

⁶Is ìobairt-loisgte ghnàthaichte a tha ann, a dh’òrdaicheadh ann an sliabh Shinài a‑chum fàile chùbhraidh, ìobairt a bheirear suas le teine don Tighearna.

⁷Agus is i a tabhartas-dibhe an ceathramh earrann de hin airson aon uain: anns an ionad naomh bheir thu fa‑near fìon làidir a dhòrtadh don Tighearna mar thabhartas-dibhe.

⁸Agus an t‑uan eile bheir thu seachad anns an fheasgar: mar thabhartas-bìdh na maidne, agus mar a tabhartas-dibhe, bheir thu seachad e, ìobairt a bheirear suas le teine, de fhàile cùbhraidh don Tighearna.

⁹Agus air là na sàbaid, dà uan den chiad bhliadhna gun ghaoid, agus dà dheicheamh earrann fhlùir measgte le ola mar thabhartas-bìdh, agus a tabhartas-dibhe.

¹⁰Is e seo ìobairt-loisgte gach sàbaid, a thuilleadh air an ìobairt-loisgte ghnàthaichte, agus a tabhartas-dibhe.

¹¹Agus ann an toiseach ur mìos bheir sibh seachad a‑chum ìobairt-loisgte don Tighearna dà tharbh òg, agus aon reithe, seachd uain den chiad bhliadhna gun ghaoid,

¹²Agus trì deicheamh earrannan fhlùir measgte le ola mar thabhartas-bìdh airson gach tairbh, agus dà dheicheamh earrann fhlùir measgte le ola mar thabhartas-bìdh airson gach reithe;

¹³Agus aon deicheamh earrann fhlùir air leth measgte le ola mar thabhartas-bìdh airson gach uain, a‑chum ìobairt-loisgte deagh fhàile, ìobairt a bheirear suas le teine don Tighearna.

¹⁴Agus mar an tabhartasan-dibhe bidh leth hin de fhìon airson tairbh, agus an treas earrann de hin airson reithe, agus an ceathramh earrann de hin airson uain: is i seo ìobairt-loisgte gach mìosa air feadh mìosan na bliadhna.

¹⁵Agus ìobrar aon mheann de na gobhair mar ìobairt-pheacaidh don Tighearna, a thuilleadh air an ìobairt-loisgte ghnàthaichte, agus a tabhartas-dibhe.

¹⁶Agus air a’ cheathramh-là‑deug den chiad mhìos tha càisg an Tighearna.

¹⁷Agus air a’ chòigeamh-là‑deug den mhìos seo tha an fhèill: seachd làithean ithear aran neo-ghortaichte.

¹⁸Air a’ chiad là bidh co‑ghairm naomh; obair thràilleil sam bith cha dèan sibh air;

¹⁹Ach bheir sibh seachad a‑chum ìobairt a bheirear suas le teine, mar ìobairt-loisgte don Tighearna, dà tharbh òg, agus aon reithe, agus seachd uain den chiad bhliadhna: gun ghaoid bidh iad dhuibh.

²⁰Agus bidh an tabhartas-bìdh de fhlùr measgte le ola: trì deicheamh earrannan bheir sibh seachad airson tairbh, agus dà dheicheamh earrann airson reithe.

²¹Deicheamh earrann air leth bheir thu seachad airson gach uain, air feadh nan seachd uan:

²²Agus aon bhoc-goibhre a‑chum ìobairt-pheacaidh, a dhèanamh rèite air ur son.

²³Iobraidh sibh iad sin a thuilleadh air an ìobairt-loisgte anns a’ mhadainn, a tha mar ìobairt-loisgte ghnàthaichte.

²⁴Mar seo bheir sibh seachad gach là air feadh nan seachd làithean biadh na h‑ìobairt a bheirear suas le teine, a‑chum fàile chùbhraidh don Tighearna: bheirear seachad e a thuilleadh air an ìobairt-loisgte ghnàthaichte, agus a tabhartas-dibhe.

²⁵Agus air an t‑seachdamh là bidh co‑ghairm naomh agaibh; obair thràilleil sam bith cha dèan sibh air.

²⁶Mar an ceudna air là nan ciad-thoradh, nuair a bheir sibh seachad tabhartas-bìdh nuadh don Tighearna, aig ceann ur seachdainean, bidh co‑ghairm naomh agaibh; obair thràilleil sam bith cha dèan sibh:

²⁷Ach bheir sibh seachad mar ìobairt-loisgte, a‑chum fàile chùbhraidh don Tighearna, dà tharbh òg, aon reithe, seachd uain den chiad bhliadhna;

²⁸Agus an tabhartas-bìdh de fhlùr measgte le ola, trì deicheamh earrannan airson gach tairbh, dà dheicheamh earrann airson gach reithe,

²⁹Deicheamh earrann air leth airson gach uain, air feadh nan seachd uan;

³⁰Agus aon mheann de na gobhair, a dhèanamh rèite air ur aon.

³¹Iobraidh sibh iad a thuilleadh air an ìobairt-loisgte ghnàthaichte, agus a tabhartas-bìdh (gun ghaoid bidh iad dhuibh), agus an tabhartasan-dibhe.