Read Scots Gaelic 1992 – Am Bìoball Gàidhlig 199 Ceathramh Leabhar Mhaois Don Ainm Aireamh 34 Bible Online

Ceathramh Leabhar Mhaois Don Ainm Aireamh 34 - Scots Gaelic 1992 – Am Bìoball Gàidhlig 199 bible

Ceathramh Leabhar Mhaois Don Ainm Aireamh 34

¹Agus labhair an Tighearna ri Maois, ag ràdh,

²Aithn do chloinn Israeil, agus abair riu, Nuair a thig sibh do thalamh Chanàain (is e seo am fearann a thuiteas oirbh mar oighreachd, eadhon fearann Chanàain maille ra chrìochan),

³An sin bidh ur ceàrna dheas bho fhàsach Shin, leth ri crìch Edoim, agus is i ur crìoch mu dheas fìor iomall na fairge saillte a làimh na h‑àird an ear.

⁴Agus tillidh ur crìoch on taobh mu dheas gu dìreadh Acrabim, agus thèid i air a h‑aghaidh gu Sin; agus bidh a dol a‑mach on taobh mu dheas gu Cadeis-barnea, agus gabhaidh i roimhpe gu Hasar-adar, agus thèid i air a h‑aghaidh gu Asmon:

⁵Agus bheir a’ chrìoch cuairt o Asmon gu abhainn na h‑Eiphit, agus bidh a dol a‑mach aig an fhairge.

⁶Agus a‑thaobh na crìche an iar, bidh agaibh eadhon an fhairge mhòr mar chrìch: bidh a’ chrìoch seo na crìch dhuibh air an làimh an iar.

⁷Agus is i seo ur crìoch air an làimh mu thuath: on fhairge mhòir comharraichidh sibh dhuibh fhèin gu sliabh Hor.

⁸O shliabh Hor comharraichidh sibh ur crìoch gu dol a‑steach Hamait; agus bidh dol a‑mach na crìche gu Sedad.

⁹Agus gabhaidh ur crìoch roimhpe gu Siphron, agus bidh a dol a‑mach aig Hasar-enan; is i seo ur crìoch mu thuath.

¹⁰Agus comharraichidh sibh ur crìoch air an taobh an ear o Hasar-enan gu Sepham.

¹¹Agus thèid a’ chrìoch sìos o Shepham gu Riblah, air an taobh an ear de Ain; agus thèid a’ chrìoch sìos, agus ruigidh i gu taobh fairge Chineret a làimh na h‑àird an ear.

¹²Agus thèid a’ chrìoch sìos gu Iòrdan, agus bidh a dol a‑mach aig a’ mhuir shaillte: is e seo ur fearann le a chrìochan mun cuairt.

¹³Agus dh’àithn Maois do chloinn Israeil, ag ràdh, Is e seo am fearann a shealbhaicheas sibh le crannchur, a dh’àithn an Tighearna a thoirt do na naoi treubhan, agus don leth-threubh.

¹⁴Oir fhuair treubh chloinn Reubein an oighreachd, a rèir taigh an athraichean, agus treubh chloinn Ghad a rèir taigh an athraichean; agus fhuair leth-threubh Mhanaseh an oighreachd.

¹⁵Fhuair an dà threubh agus an leth-threubh an oighreachd air an taobh seo de Iòrdan am fagas do Iericho, a làimh na h‑àird an ear, leth ri èirigh na grèine.

¹⁶Agus labhair an Tighearna ri Maois, ag ràdh,

¹⁷Is iad seo ainmean nan daoine a roinneas am fearann dhuibh: Eleàsar an sagart, agus Iosua mac Nuin.

¹⁸Agus gabhaidh sibh aon cheannard de gach treubh, a roinn an fhearainn mar oighreachd.

¹⁹Agus is iad seo ainmean nan daoine: de threubh Iùdah, Càleb mac Iephuneh.

²⁰Agus de threubh chloinn Shimeoin, Semuel mac Amihuid.

²¹De threubh Bheniàmin, Elidad mac Chisloin.

²²Agus ceannard treubh chloinn Dhan, Buci mac Iogli.

²³Ceannard chloinn Iòseiph, airson treubh chloinn Mhanaseh, Haniel mac Ephoid.

²⁴Agus ceannard treubh chloinn Ephraim, Cemuel mac Shiphtain.

²⁵Agus ceannard treubh chloinn Shebuluin, Elisaphan mac Pharnaich.

²⁶Agus ceannard treubh chloinn Isachair, Paltiel mac Asain.

²⁷Agus ceannard treubh chloinn Aseir, Ahihud mac Shelomi.

²⁸Agus ceannard treubh chloinn Naphtali, Pedahel mac Amihuid.

²⁹Is iad sin iadsan don d’àithn an Tighearna an oighreachd a roinn do chloinn Israeil ann an tìr Chanàain.