Read Scots Gaelic 1992 – Am Bìoball Gàidhlig 199 Ceathramh Leabhar Mhaois Don Ainm Aireamh 36 Bible Online

Ceathramh Leabhar Mhaois Don Ainm Aireamh 36 - Scots Gaelic 1992 – Am Bìoball Gàidhlig 199 bible

Ceathramh Leabhar Mhaois Don Ainm Aireamh 36

¹Agus thàinig prìomh-athraichean teaghlaichean chloinn Ghilead, mhic Mhachir, mhic Mhanaseh, de theaghlaichean mic Iòseiph, am fagas, agus labhair iad an làthair Mhaois, agus an làthair nan ceannard, eadhon prìomh-athraichean chloinn Israeil:

²Agus thubhairt iad, Dh’àithn an Tighearna dom thighearna am fearann a thoirt mar oighreachd le crannchur do chloinn Israeil, agus dh’àithneadh dom thighearna leis an Tighearna, oighreachd ar bràthar Selophehad a thoirt da nigheanan.

³Agus ma phòsar iad ri aon de mhic nan treubh eile de chloinn Israeil, an sin bheirear an oighreachd-san o oighreachd ar n‑athraichean, agus cuirear i ri oighreachd na treubha don gabhar iad: mar sin bheirear i o chrannchur ar n‑oighreachd-ne.

⁴Agus nuair a bhios an Iubile ann do chloinn Israeil, an sin cuirear an oighreachd ri oighreachd na treubha gus an do ghabhaidh iad: mar sin bheirear an oighreachd-san air falbh o oighreachd treubh ar n‑athraichean.

⁵Agus dh’àithn Maois do chloinn Israeil, a rèir facal an Tighearna, ag ràdh, Is ceart a labhair treubh mic Iòseiph.

⁶Is e seo an nì a dh’àithn an Tighearna a‑thaobh nigheanan Shelophehaid, ag ràdh, Pòsadh iad an neach as àill leo; a‑mhàin ri teaghlach treubh an athraichean pòsaidh iad.

⁷Mar sin chan atharraich oighreachd chloinn Israeil o threubh gu treubh: oir dlùth-leanaidh gach duine de chloinn Israeil ri oighreachd treubh a athraichean.

⁸Agus bidh gach nighean a shealbhaicheas oighreachd ann an treubh sam bith de chloinn Israeil na mnaoi aig aon de theaghlach treubh a h‑athar, a‑chum gum meal clann Israeil, gach duine dhiubh, oighreachd a athraichean.

⁹Cha mhò a dh’atharraicheas an oighreachd o aon treubh gu treubh eile; ach dlùth-leanaidh gach duine de threubhan chloinn Israeil ra oighreachd fhèin.

¹⁰Eadhon mar a dh’àithn an Tighearna do Mhaois, mar sin rinn nigheanan Shelophehaid:

¹¹Oir phòsadh Mahlah, Tirsah, agus Meglah, agus Milcah, agus Nòah, nigheanan Shelophehaid, ri mic bràithrean an athar.

¹²Phòsadh iad ri fir de theaghlaichean mic Mhanaseh mhic Iòseiph, agus dh’fhan an oighreachd ann an treubh teaghlach an athar.

¹³Is iad sin na h‑àitheantan agus na breitheanais a dh’àithn an Tighearna le làimh Mhaois do chloinn Israeil ann an còmhnardan Mhòaib, làimh ri Iòrdan, am fagas do Iericho.