Read Scots Gaelic 1992 – Am Bìoball Gàidhlig 199 An Soisgeul a Rèir Mhata 20 Bible Online

An Soisgeul a Rèir Mhata 20 - Scots Gaelic 1992 – Am Bìoball Gàidhlig 199 bible

An Soisgeul a Rèir Mhata 20

¹Oir is cosmhail rìoghachd nèimh ri fear-taighe, a chaidh a‑mach moch air mhadainn a thuarasdalachadh luchd-obrach da ghàrradh-fìona.

²Agus an dèidh dha còrdadh ris an luchd-obrach air pèighinn Ròmanaich anns an là, chuir e da ghàrradh-fìona iad.

³Agus nuair a chaidh e a‑mach timcheall na treas uaire, chunnaic e dream eile nan seasamh dìomhanach anns a’ mhargadh,

⁴Agus thubhairt e riu, Imichibh-se mar an ceudna don ghàrradh-fhìona, agus ge bè nì a bhios ceart, bheir mi dhuibh e. Agus dh’imich iad.

⁵Nuair a chaidh e a‑mach a‑rìs timcheall na siathamh agus na naoidheamh uaire, rinn e mar an ceudna.

⁶Agus nuair a chaidh e a‑mach mu thimcheall na h‑aon-uaire-deug, fhuair e dream eile nan seasamh dìomhanach, agus thubhairt e riu, Carson a tha sibh nur seasamh an seo feadh an là dìomhanach?

⁷Thubhairt iad ris, A chionn nach do thuarasdalaich duine air bith sinn. Thubhairt esan riu, Imichibh-se mar an ceudna don ghàrradh-fhìona, agus ge bè nì a tha ceart, gheibh sibh e.

⁸Agus nuair a thàinig am feasgar, thubhairt tighearna a’ ghàrraidh-fhìona sin ra stiùbhard, Gairm an luchd-obrach, agus thoir dhaibh an tuarasdal, a’ tòiseachadh on dream a thàinig mu dheireadh gu ruig na ciad daoine.

⁹Agus nuair a thàinig iadsan a thuarasdalaicheadh mu thimcheall na h‑aon-uaire-deug, fhuair gach duine dhiubh pèighinn.

¹⁰Ach nuair a thàinig an ciad dream, shaoil iadsan gum faigheadh iad na bu mhò; ach fhuair gach aon dhiubh mar an ceudna pèighinn.

¹¹Agus air dhaibh a fhaotainn, rinn iad gearan an aghaidh fhir-an‑taighe.

¹²Ag ràdh, An dream sin a thàinig mu dheireadh, cha do rinn iad obair ach aon uair, agus rinn thu iad ionnan rinne, a ghiùlain uallach agus teas an là.

¹³Ach fhreagair esan agus thubhairt e ri fear dhiubh, A charaid, chan eil mi a’ dèanamh eucoir ort: nach do chòrd thu rium air pèighinn?

¹⁴Tog leat do chuid fhèin, agus imich romhad: is i mo thoil-sa a thabhairt don tì seo a thàinig mu dheireadh, mar a thug mi dhutsa.

¹⁵Nach eil e ceadaichte dhòmhsa an nì as àill leam a dhèanamh rim chuid fhèin? A bheil do shùil-sa olc, airson gu bheil mise math?

¹⁶Mar sin bidh an dream dheireannach air thoiseach, agus an dream a tha air thoiseach air dheireadh: oir tha mòran air an gairm, ach beagan air an taghadh.

¹⁷Agus a’ dol do Iosa suas gu Ierusalem, thug e an dà‑dheisciobal-dheug leis a lethtaobh anns an t‑slighe, agus thubhairt e riu,

¹⁸Feuch, tha sinn a’ dol suas gu Ierusalem; agus bidh Mac an Duine air a bhrath thairis do na h‑àrd-shagartan, agus do na sgrìobhaichean, agus dìtidh iad a‑chum bàis e.

¹⁹Agus bheir iad thairis e do na Cinnich a‑chum fanaid a dhèanamh air, agus a‑chum sgiùrsadh, agus a cheusadh: ach air an treas là èiridh e a‑rìs.

²⁰An sin thàinig da ionnsaigh màthair clann Shebede maille ra mic, a’ toirt adhraidh dha, agus ag iarraidh nì àraidh air.

²¹Agus thubhairt esan rithe, Ciod a b’àill leat? Thubhairt i ris, Abair gun suidh iad seo mo dhithis mhac, fear aca air do làimh dheis, agus am fear eile air do làimh chlì, ann ad rìoghachd.

²²Ach fhreagair Iosa agus thubhairt e, Chan eil fhios agaibh ciod a tha sibh ag iarraidh. A bheil sibh comasach air a’ chupan sin òl a dh’òlas mise, agus a bhith air ur baisteadh leis a’ bhaisteadh lem baistear mise? Thubhairt iad ris, Tha sinn comasach.

²³Agus thubhairt esan riu, Olaidh sibh gu deimhinn dem chupan-sa, agus baistear sibh leis a’ bhaisteadh lem baistear mise: ach suidhe air mo làimh dheis agus chlì, cha leamsa sin a thabhairt, ach dhaibhsan dom bheil e air ullachadh lem Athair.

²⁴Agus nuair a chuala an deichnear seo, bha iad diombach ris an dithis bhràithrean.

²⁵Ach ghairm Iosa iad da ionnsaigh, agus thubhairt e, Tha fhios agaibh gu bheil aig uachdarain nan Cinneach tighearnas orra, agus gu bheil aig an daoine mòra smachd orra.

²⁶Ach mar sin cha bhi e nur measg-se: ach ge bè neach lem b’àill a bhith mòr nur measg, biodh e dhuibh na fhear-frithealaidh.

²⁷Agus ge bè air bith lem b’àill toiseach a bhith aige nur measg, biodh esan na sheirbhiseach dhuibh:

²⁸Amhail mar nach tàinig Mac an Duine a‑chum gun dèante frithealadh dha, ach a dhèanamh frithealaidh, agus a thabhairt a anama fhèin mar èirig airson mhòran.

²⁹Agus a’ dol a‑mach dhaibh à Iericho lean sluagh mòr e:

³⁰Agus, feuch, dithis dhaoine dall, a bha nan suidhe ri taobh na slighe, nuair a chuala iad gu robh Iosa a’ dol seachad, ghlaodh iad, ag ràdh, Dèan tròcair oirnne, a Thighearna, a Mhic Dhaibhidh.

³¹Agus chronaich an sluagh iad, a‑chum gum biodh iad nan tosd: ach is mò a ghlaodh iadsan ag ràdh, Dèan tròcair oirnn, a Thighearna, a Mhic Daibhidh.

³²Agus sheas Iosa, agus ghairm e iad, agus thubhairt e, Ciod as àill leibh mise a dhèanamh dhuibh?

³³Thubhairt iadsan ris, A Thighearna, ar sùilean a bhith air am fosgladh.

³⁴Agus ghabh Iosa truas dhiubh, agus bhean e rin sùilean: agus air ball thàinig fradharc dan sùilean, agus lean iad e.