Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 14 Bible Online

Còigeamh Leabhar Mhaois Don Ainm Deuteronomi 14 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 14

¹Is sibhse clann an Tighearna ur Dia: cha gheàrr sibh sibh fhèin, cha mhò a nì sibh lomadh air bith eadar ur sùilean airson mairbh:

²Oir is sluagh naomh thu don Tighearna do Dhia, agus thagh an Tighearna thu gu bhith ad shluagh sònraichte dha fhèin, thar gach uile chinneach a tha air aghaidh na talmhainn.

³Chan ith thu nì gràineil sam bith.

⁴Is iad seo na beathaichean a dh’itheas sibh: an damh, a’ chaora, agus a’ ghobhar.

⁵Am fiadh, agus an ruadh-bhoc, agus an dathais, agus a’ ghobhar fhiadhaich, agus an t‑earr-gheal, agus an damh fiadhaich, agus an somar.

⁶Agus gach beathach a roinneas an ionga, agus aig a bheil an ionga na dà roinn, agus a chnàmhas a’ chìr am measg nan ainmhidhean, sin ithidh sibh.

⁷Gidheadh, iad seo chan ith sibh dhiubhsan a chnàmhas a’ chìr, no dhiubhsan a roinneas an ionga sgoilte, mar an càmhal, agus a’ mhaigheach, agus an coinean; oir cnàmhaidh iad a’ chìr, ach cha roinn iad an ionga: neòghlan tha iad dhuibh.

⁸Agus a’ mhuc, a chionn, ged a roinneas i an ionga, nach cnàmh i a’ chìr, tha i neòghlan dhuibh: dem feòil chan ith sibh, agus rin cairbh cha bhean sibh.

⁹Iad seo ithidh sibh dhiubhsan uile a tha anns na h‑uisgeachan: gach nì air a bheil itean agus lannan, ithidh sibh;

¹⁰Agus gach nì air nach eil itean agus lannan, chan ith sibh: tha e neòghlan dhuibh.

¹¹Gach eun glan ithidh sibh.

¹²Ach is iad seo iadsan de nach ith sibh: an iolair, agus an cnàimh-bhristeach, agus an iolair-uisge.

¹³Agus an croman-gòbhlach, agus an clamhan, agus am fang a rèir a ghnè,

¹⁴Agus gach fitheach a rèir a ghnè,

¹⁵Agus a’ chailleach-oidhche, agus an t‑seabhag-oidhche, agus a’ chuach, agus an t‑seabhag a rèir a gnè,

¹⁶Agus a’ chailleach-oidhche bheag, agus a’ chailleach-oidhche mhòr, agus an eala,

¹⁷Agus am pelican, agus an iolair-fhionn, agus an sgarbh,

¹⁸Agus a’ chorra-bhàn, agus a’ chorra-ghlas a rèir a gnè, agus an t‑adharcan-luachrach, agus an ialtag.

¹⁹Agus tha gach nì snàigeach a dh’itealaicheas neòghlan dhuibh: chan ithear iad.

²⁰Gach eun glan ithidh sibh.

²¹Chan ith sibh nì sam bith a bhàsaicheas dheth fhèin: bheir thu e don choigreach a tha an taobh a‑staigh ded gheatachan, a‑chum gun ith e e; no reic e ris an eilthireach: oir is sluagh naomh thu don Tighearna do Dhia. Cha bhruith thu meann ann am bainne a mhàthar.

²²Bheir thu seachad gu ceart deicheamh uile chinneas do shìl, a bheir am fearann uaithe o bhliadhna gu bliadhna.

²³Agus ithidh tu am fianais an Tighearna do Dhia, anns an àit a thaghas e a‑chum a ainm a chur an sin, deicheamh d’arbhair, d’fhìona, agus d’ola, agus ciad-ghin do chruidh, agus do chaorach; a‑chum gum fòghlaim thu eagal an Tighearna do Dhia a bhith ort a‑ghnàth.

²⁴Agus ma bhios an t‑slighe ro‑fhada dhut, air chor is nach urrainn thu a ghiùlan, a chionn an t‑àit a bhith fada uat, a thaghas an Tighearna do Dhia a chur a ainme an sin, nuair a bheannaicheas an Tighearna do Dhia thu;

²⁵An sin nì thu airgead dheth, agus ceanglaidh tu suas an t‑airgead ad làimh, agus thèid thu a‑chum an àit a thaghas an Tighearna do Dhia:

²⁶Agus bheir thu an t‑airgead sin airson gach nì a mhiannaicheas d’anam, airson buair, no airson chaorach, no airson fìona, no airson dibhe làidir, no airson gach nì a mhiannaicheas d’anam: agus ithidh tu an sin an làthair an Tighearna do Dhia, agus nì thu gàirdeachas, thu fhèin, agus do theaghlach.

²⁷Agus an Lèbhitheach a tha an taobh a‑staigh ded gheatachan, cha trèig thu e: oir chan eil roinn no oighreachd aige maille riut.

²⁸Aig crìch trì bliadhna bheir thu a‑mach uile dheicheamh do chinneis air a’ bhliadhna sin fhèin, agus taisgidh tu suas e an taobh a‑staigh ded gheatachan:

²⁹Agus thig an Lèbhitheach (a chionn nach eil roinn no oighreachd aige maille riut), agus an coigreach, agus an dìlleachdan agus a’ bhantrach, a tha an taobh a‑staigh ded gheatachan, agus ithidh iad agus sàsaichear iad; a‑chum gum beannaich an Tighearna do Dhia thu ann an uile obraichean do làimhe a nì thu.