Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 15 Bible Online

Còigeamh Leabhar Mhaois Don Ainm Deuteronomi 15 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 15

¹An ceann gach seachd bliadhna nì thu fuasgladh.

²Agus is e seo modh an fhuasglaidh: Gach fear-fiacha a bheir nì sam bith air iasad da choimhearsnach, fuasglaidh e e; chan iarr e air ais e o a choimhearsnach, no o a bhràthair, a chionn gun goirear fuasgladh an Tighearna dheth.

³O eilthireach faodaidh tu a iarraidh air ais; ach an nì as leat fhèin a tha aig do bhràthair, fuasglaidh do làmh e;

⁴Ach a‑mhàin nuair nach bi uireasbhaidheach sam bith nur measg: oir beannaichidh an Tighearna gu mòr thu anns an fhearann a tha an Tighearna do Dhia a’ toirt dhut mar oighreachd, ra shealbhachadh:

⁵A‑mhàin ma dh’èisdeas tu gu dùrachdach ri guth an Tighearna do Dhia, a thoirt an aire gun dèan thu na h‑àitheantan seo uile a tha mi ag àithneadh dhut air an là‑an‑diugh.

⁶Oir beannaichidh an Tighearna do Dhia thu, mar a gheall e dhut; agus bheir thu air iasad do mhòran chinneach, ach cha ghabh thu air iasad: agus bidh uachdaranachd agad air mòran chinneach, ach cha bhi uachdaranachd acasan ortsa.

⁷Ma bhios nur measg duine bochd, aon ded bhràithrean, an taobh a‑staigh aon ded gheatachan, ann ad fhearann a tha an Tighearna do Dhia a’ toirt dhut, cha chruadhaich thu do chridhe, cha mhò a dhruideas tu do làmh od bhràthair bochd;

⁸Ach fosglaidh tu do làmh gu farsaing dha, agus gu cinnteach bheir thu air iasad dha nas leòr airson a fheuma, den nì a tha a dh’easbhaidh air.

⁹Thoir an aire nach bi smuain ad chridhe aingidh, ag ràdh, Tha an seachdamh bliadhna, bliadhna an fhuasglaidh, am fagas; agus gum bi do shùil olc an aghaidh do bhràthar bhochd, agus nach toir thu a’ bheag dha, agus gun glaodh e ris an Tighearna ad aghaidh, agus gum bi e na pheacadh dhut.

¹⁰Bheir thu dha gu deimhinn, agus cha bhi doilgheas air do chridhe nuair a bheir thu dha; a chionn airson an nì seo gum beannaich an Tighearna do Dhia thu ad obraichean uile, agus anns gach nì ris an cuir thu do làmh.

¹¹Oir cha bhi an tìr a‑chaoidh gun bhochd: uime sin tha mi ag àithneadh dhut, ag ràdh, Fosglaidh tu do làmh gu farsaing dod bhràthair, dod bhochd, agus dod uireasbhaidheach, ad dhùthaich.

¹²Ma reicear riut do bhràthair Eabhraidheach, no ban-Eabhraidheach, agus gun dèan e seirbhis dhut sia bliadhna; an sin anns an t‑seachdamh bliadhna leigidh tu leis dol saor uat.

¹³Agus nuair a chuireas tu e a‑mach saor uat, cha chuir thu air falbh e falamh:

¹⁴Bheir thu dha gu pailt as do threud, agus as d’ùrlar, agus as d’fhìon-amar; as na nithean sin leis an do bheannaich an Tighearna do Dhia thu, bheir thu dha.

¹⁵Agus cuimhnichidh tu gu robh thu fhèin ad thràill ann an tìr na h‑Eiphit; agus shaor an Tighearna do Dhia thu: uime sin tha mi ag àithneadh seo dhut an‑diugh.

¹⁶Ach ma their e riut, Chan fhalbh mi uat (a chionn gur toigh leis thu agus do thaigh, do bhrìgh gu bheil e gu math agad);

¹⁷An sin gabhaidh tu minidh, agus cuiridh tu tro a chluais e anns an doras, agus bidh e na sheirbhiseach dhut gu bràth: agus mar an ceudna rid bhanoglaich nì thu mar sin.

¹⁸Na measar e cruaidh leat, nuair a chuireas tu uat saor e; oir bha e dà uair cho math dhutsa ri seirbhiseach tuarasdail, le seirbhis a dhèanamh dhut sia bliadhna: agus beannaichidh an Tighearna do Dhia thu anns gach nì a nì thu.

¹⁹Gach ciad-ghin fireann a bheirear am measg do chruidh, agus am measg do threud, naomhaichidh tu don Tighearna do Dhia: cha dèan thu obair sam bith le ciad-ghin do bhoin, cha mhò a lomas tu ciad-ghin do chaorach.

²⁰Am fianais an Tighearna do Dhia ithidh tu e o bhliadhna gu bliadhna, anns an ionad a thaghas an Tighearna, thu fhèin agus do theaghlach.

²¹Agus ma bhios gaoid sam bith ann, crùbaiche, no doille, no droch ghaoid sam bith, chan ìobair thu e don Tighearna do Dhia.

²²An taobh a‑staigh ded gheatachan ithidh tu e; ithidh an glan agus an neòghlan co‑ionnan dheth, mar den ruadh-bhoc, agus mar den fhiadh.

²³A‑mhàin a fhuil chan ith thu: air an talamh dòirtidh tu i mar uisge.