Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 17 Bible Online

Còigeamh Leabhar Mhaois Don Ainm Deuteronomi 17 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 17

¹Chan ìobair thu don Tighearna do Dhia tarbh, no caora, anns a bheil gaoid, no mì‑mhaise sam bith: oir is gràinealachd sin don Tighearna do Dhia.

²Ma gheibhear nur measg, an taobh a‑staigh aoin ded gheatachan a bheir an Tighearna do Dhia dhut, fear no bean a rinn aingidheachd ann an sùilean an Tighearna do Dhia, le a choicheangal a bhriseadh,

³Agus gun deachaidh e agus gun do rinn e seirbhis do dhiathan eile, agus gun do rinn e adhradh dhaibh, aon chuid don ghrèin, no don ghealaich, no do uile armailt nèimh, nach d’àithn mise;

⁴Agus gun d’innseadh dhut e, agus gun cuala tu e, agus gun do rannsaich thu gu math, agus, feuch, gur fìor e, agus gu bheil a’ chùis dearbhte, gun do rinneadh a’ ghràinealachd sin ann an Israel;

⁵An sin bheir thu a‑mach am fear sin no a’ bhean sin, a rinn an nì aingidh sin, a‑chum do gheatachan, eadhon am fear sin no a’ bhean sin, agus clachaidh tu iad le clachan gus am bàsaich iad.

⁶Aig beul dà fhianais, no trì fianaisean, cuirear gu bàs esan a tha toillteanach air bàs: cha chuirear gu bàs e aig beul aon fhianais.

⁷Bidh làmhan nam fianaisean air an toiseach, ga chur gu bàs; agus na dhèidh sin làmhan an t‑sluaigh uile: mar sin cuiridh tu an t‑olc air falbh o ur measg.

⁸Ma dh’èireas cùis a bhios ro‑chruaidh ort ann am breitheanas, eadar fuil agus fuil, eadar breith agus breith, agus eadar buille agus buille, eadhon cùisean connspaid an taobh a‑staigh ded gheatachan; an sin èiridh tu, agus thèid thu suas don ionad a thaghas an Tighearna do Dhia:

⁹Agus thig thu a‑chum nan sagart, nan Lèbhitheach, agus a‑chum a’ bhritheimh a bhios anns na làithean sin, agus fiosraichidh tu; agus nochdaidh iad dhut facal a’ bhreitheanais:

¹⁰Agus nì thu a rèir na breithe a nochdas muinntir an àite sin (a thaghas an Tighearna) dhut, agus bheir thu an aire gun dèan thu a rèir gach nì a theagaisgeas iad dhut:

¹¹A rèir breith an lagha a theagaisgeas iad dhut, agus a rèir a’ bhreitheanais a dh’innseas iad dhut, nì thu: cha chlaon thu on bhreith a nochdas iad dhut, a‑chum na làimhe deise no na làimhe clìthe.

¹²Agus an duine a nì gu h‑an‑dàna, agus nach èisd ris an t‑sagart, a sheasas gu frithealadh an sin an làthair an Tighearna do Dhia, no ris a’ bhritheamh, bàsaichidh eadhon an duine sin, agus cuiridh tu an t‑olc air falbh o Israel.

¹³Agus cluinnidh an sluagh uile, agus bidh eagal orra, agus cha dèan iad gu h‑an‑dàna nas mò.

¹⁴Nuair a thig thu a‑chum an fhearainn a bheir an Tighearna do Dhia dhut, agus a shealbhaicheas tu e, agus a ghabhas tu còmhnaidh ann, agus a their thu, Cuiridh mi rìgh os mo chionn, mar na cinnich uile a tha mun cuairt orm:

¹⁵Cuiridh tu, air gach aon chor, esan na rìgh os do chionn a thaghas an Tighearna do Dhia; aon o mheasg do bhràithrean cuiridh tu na rìgh os do chionn: chan fhaod thu coigreach a chur os do chionn, nach eil na bhràthair dhut.

¹⁶Ach cha chuir e eich an lìonmhorachd dha fhèin, cha mhò a bheir e air an t‑sluagh tilleadh don Eiphit, a‑chum is gun cuir e eich an lìonmhorachd: do bhrìgh gun dubhairt an Tighearna ribh, Cha till sibh o seo a‑mach nas mò air an t‑slighe sin.

¹⁷Cha mhò a chuireas e mnathan an lìonmhorachd dha fhèin, a‑chum nach claon a chridhe air falbh; cha mhò a mheudaicheas e gu mòr dha fhèin airgead agus òr.

¹⁸Agus nuair a shuidheas e air rìgh-chathair a rìoghachd, an sin ath-sgrìobhaidh e dha fhèin an lagh seo ann an leabhar, as an leabhar sin a tha an làthair nan sagart, na Lèbhithich.

¹⁹Agus bidh e aige, agus leughaidh e ann, uile làithean a bheatha: a‑chum gum fòghlaim e eagal an Tighearna a Dhia a bhith air, uile bhriathran an lagha seo a ghleidheadh, agus na reachdan seo, a‑chum an dèanamh:

²⁰A‑chum nach bi a chridhe air a thogail suas os cionn a bhràithrean, agus nach claon e on àithne a‑chum na làimhe deise no na làimhe clìthe; air chor is gum buanaich e a làithean na rìoghachd, e fhèin agus a chlann ann am meadhon Israeil.