Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 25 Bible Online

Còigeamh Leabhar Mhaois Don Ainm Deuteronomi 25 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 25

¹Ma bhios connsachadh eadar daoine, agus gun tig iad gu breitheanas, a‑chum is gun toir na britheamhan breith orra; an sin saoraidh iad an t‑ionracan, agus dìtidh iad an ciontach.

²Agus tàrlaidh, mas airidh an duine aingidh a bhith air a bhualadh, gun toir am britheamh air laighe sìos, agus a bhith air a bhualadh na làthair, a rèir a choire, le àireamh àraidh de bhuillean.

³Dà‑fhichead buille bheir e dha: cha tèid e thairis, air eagal nan rachadh e thairis, agus gum buaileadh e e os an cionn sin le mòran bhuillean, an sin gum biodh do bhràthair tàireil ad shùilean.

⁴Cha chuir thu ceangal air beul an daimh nuair a tha e a’ saltairt an arbhair.

⁵Nuair a ghabhas bràithrean còmhnaidh maille ri chèile, agus gum faigh aon dhiubh bàs, agus gun duine cloinne aige, cha phòs bean a’ mhairbh a‑mach ri coigreach: thèid a bràthair-cèile a‑steach da h‑ionnsaigh, agus gabhaidh e dha fhèin i na mnaoi, agus nì e dlighe bràthar-chèile rithe.

⁶Agus èiridh an ciad-ghin mic a bheireas i suas ann an ainm a bhràthar a tha marbh, a‑chum nach dubhar a‑mach a ainm à Israel.

⁷Agus mura toigh leis an duine bean a bhràthar a ghabhail, an sin thèid bean a bhràthar suas don gheata a‑chum nan seanairean, agus their i, Tha mo bhràthair-cèile a’ diùltadh ainm a thogail suas da bhràthair ann an Israel, chan àill leis dlighe bràthar-chèile a dhèanamh rium.

⁸An sin gairmidh seanairean a’ bhaile air, agus labhraidh iad ris: agus ma sheasas e a‑mach, agus gun abair e, Chan àill leam a gabhail;

⁹An sin thig bean a bhràthar da ionnsaigh an làthair nan seanairean, agus fuasglaidh i a bhròg bhàrr a choise, agus tilgidh i smugaid na aodann, agus freagraidh agus their i, Mar seo nìthear ris an duine nach tog suas taigh a bhràthar.

¹⁰Agus goirear a ainm ann an Israel, Taigh an fhir aig a bheil a bhròg fuasgailte.

¹¹Nuair a bhios daoine ri còmhstri cuideachd, neach ri neach eile, agus gun tig bean aoin dhiubh am fagas a dh’fhuasgladh a fir-phòsda à làimh an fhir a tha ga bhualadh, agus gun sìn i a‑mach a làmh, agus gun gabh i greim air a bhuill dhiamhair,

¹²An sin gearraidh tu dhith a làmh: cha ghabh do shùil truas rithe.

¹³Cha bhi agad ann ad mhàla aon chothrom agus cothrom eile, cothrom mòr agus beag.

¹⁴Cha bhi agad ann ad thaigh aon soitheach agus soitheach eile tomhais, soitheach mòr agus beag.

¹⁵Cothrom iomlan agus ceart bidh agad, soitheach-tomhais iomlan agus ceart bidh agad, a‑chum gum buanaichear do làithean anns an fhearann a tha an Tighearna do Dhia a’ tabhairt dhut.

¹⁶Oir tha iadsan uile a nì na nithean sin, iadsan uile a nì gu h‑eucorach, nan gràinealachd don Tighearna do Dhia.

¹⁷Cuimhnich ciod a rinn Amalec ort anns an t‑slighe, nuair a thàinig sibh a‑mach as an Eiphit:

¹⁸Cionnas a choinnich e thu anns an t‑slighe, agus a bhuail e a’ chuid a bu deireannaiche dhìot, eadhon iadsan uile a bha lag ad dhèidh, nuair a bha thu fann agus sgìth, agus nach robh eagal Dhè air.

¹⁹Uime sin nuair a bheir an Tighearna do Dhia fois dhut od naimhdean uile mun cuairt, anns an fhearann a bheir an Tighearna do Dhia dhut mar oighreachd ra shealbhachadh, dubhaidh tu as cuimhne Amaleic o bhith fo nèamh; cha dìochuimhnich thu e.