Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 3 Bible Online

Còigeamh Leabhar Mhaois Don Ainm Deuteronomi 3 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 3

¹An sin thill sinn, agus chaidh sinn suas air an t‑slighe gu Basan; agus thàinig Og rìgh Bhasain a‑mach nar n‑aghaidh, e fhèin agus a shluagh uile, gu cath aig Edrei.

²Agus thubhairt an Tighearna riumsa, Na biodh eagal ort roimhe; oir dod làimh-sa bheir mise thairis e fhèin, agus a shluagh uile, agus a fhearann; agus nì thu ris mar a rinn thu ri Sihon rìgh nan Amorach, a bha a chòmhnaidh aig Hesbon.

³Mar sin thug an Tighearna ar Dia thairis dar làimh-ne mar an ceudna Og rìgh Bhasain, agus a shluagh uile: agus bhuail sinn e, gus nach d’fhàgadh a h‑aon beò aige.

⁴Agus ghlac sinn a bhailtean uile anns an àm sin; cha robh baile nach tug sinn uapa, trì-fichead baile, dùthaich Argoib uile, rìoghachd Og ann am Basan.

⁵Bha na bailtean sin uile air an daingneachadh le balla àrd, le geatachan agus le crainn, a thuilleadh air bailtean gun bhalla, ro‑mhòran.

⁶Agus sgrios sinn gu tur iad, mar a rinn sinn air Sihon rìgh Hesboin, a’ lèirsgrios fir, mnathan agus clann gach baile.

⁷Ach ghabh sinn an sprèidh uile, agus creach nam bailtean mar chobhartach dhuinn fhèin.

⁸Agus thug sinn anns an àm sin à làimh dà rìgh nan Amorach am fearann a tha air an taobh seo de Iòrdan, o shruth Arnoin gu sliabh Hermoin:

⁹(Thug na Sìdonaich Sirion mar ainm air Hermon: agus thug na h‑Amoraich Senir mar ainm air:)

¹⁰Bailtean a’ chòmhnaird uile, agus Gilead uile, agus Basan uile, gu Salcha agus Edrei, bailtean rìoghachd Og ann am Basan:

¹¹Oir bha Og rìgh Bhasain a‑mhàin a làthair de fhuidheall nam famhairean; feuch, a leabaidh, bu leabaidh iarainn i: nach eil i ann an Rabat chloinn Amoin? B’iad naoi làmhan-coille a fad, agus ceithir làmhan-coille a leud, a rèir làmh-choille duine.

¹²Agus am fearann seo, a shealbhaich sinn anns an àm sin, o Aroer, a tha làimh ri sruth Arnoin, agus leth sliabh Ghilead, agus a bhailtean, thug mi do na Reubenich, agus do na Gadaich.

¹³Agus a’ chuid eile de Ghilead, agus Basan uile, eadhon rìoghachd Og, thug mi do leth-threubh Mhanaseh; dùthaich Argoib uile, maille ri Basan uile, don ainm fearann nam famhairean.

¹⁴Ghabh Iair, mac Mhanaseh, dùthaich Argoib uile gu crìochan Ghesuri, agus Mhaachati: agus thug e Basan-habhot-iair mar ainm oirre a rèir a ainme fhèin, gus an là‑an‑diugh.

¹⁵Agus thug mi Gilead do Mhachir.

¹⁶Agus do na Reubenich, agus do na Gadaich, thug mi o Ghilead eadhon gu sruth Arnoin, leth a’ ghlinne, agus an t‑iomall, eadhon gus an sruth Iaboc, crìoch chloinn Amoin:

¹⁷An còmhnard mar an ceudna, agus Iòrdan, agus a chrìochan, o Chineret, eadhon gu muir a’ chòmhnaird, a’ mhuir shalainn fo Asdot-pisgah a làimh na h‑àird an ear.

¹⁸Agus dh’àithn mi dhuibh anns an àm sin, ag ràdh, Thug an Tighearna ur Dia dhuibh am fearann seo ra shealbhachadh: thèid sibh a‑null fo ur n‑airm ro ur bràithrean clann Israeil, gach neach a tha foghainteach a‑chum cogaidh.

¹⁹Ach fanaidh ur mnathan, agus ur clann bheag, agus ur sprèidh (oir is aithne dhomh gu bheil mòran sprèidhe agaibh) nur bailtean a thug mi dhuibh;

²⁰Gus an toir an Tighearna fois dur bràithrean, cho math is dhuibhse, agus gus an sealbhaich iadsan mar an ceudna am fearann a thug an Tighearna ur Dia dhaibh an taobh thall de Iòrdan: agus an sin tillidh gach duine agaibh ga sheilbh, a thug mi dhuibh.

²¹Agus dh’àithn mi do Iosua anns an àm sin, ag ràdh, Chunnaic do shùilean na h‑uile nithean a rinn an Tighearna ur Dia ris an dà rìgh sin: mar sin nì an Tighearna ris na rìoghachdan uile gus a bheil thu a’ dol.

²²Cha bhi eagal oirbh romhpa: oir cogaidh an Tighearna ur Dia e fhèin air ur son.

²³Agus ghuidh mi air an Tighearna anns an àm sin, ag ràdh,

²⁴O Thighearna Dhè, thòisich thu air do mhòrachd agus do làmh chumhachdach a nochdadh dod òglach: oir cò an dia air nèamh no air talamh as urrainn a dhèanamh a rèir d’obrach-sa, agus a rèir do chumhachd-sa?

²⁵Guidheam ort, leig dhomh dol thairis, agus am fearann math sin fhaicinn a tha an taobh thall de Iòrdan, an sliabh math sin, agus Lebanon.

²⁶Ach bha fearg air an Tighearna rium air ur son-se, agus cha d’èisd e rium: agus thubhairt an Tighearna rium, Guma leòr leat e; na labhair nas mò rium mun chùis seo.

²⁷Falbh suas gu mullach Phisgah, agus tog suas do shùilean ris an àird an iar, agus ris an àird a tuath, agus ris an àird a deas, agus ris an àird an ear, agus amhairc led shùilean; oir cha tèid thu thar Iòrdan seo.

²⁸Ach thoir àithne do Iosua, agus thoir misneach dha, agus neartaich e: oir thèid esan thairis ron t‑sluagh seo, agus bheir e orra am fearann sin a chì thusa a shealbhachadh mar oighreachd.

²⁹Mar sin ghabh sinn còmhnaidh anns a’ ghleann thall fa chomhair Bhet-peoir.