Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 33 Bible Online

Còigeamh Leabhar Mhaois Don Ainm Deuteronomi 33 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 33

¹Agus is e seo am beannachadh leis an do bheannaich Maois, òglach Dhè, clann Israeil ro a bhàs.

²Agus thubhairt e, Thàinig an Tighearna o Shinài, agus dh’èirich e suas dhaibh o Sheir; dhealraich e a‑mach o shliabh Pharain, agus thàinig e le deich mìle de naoimh: o a dheas làimh chaidh lagh teine a‑mach dhaibh.

³Seadh, ghràdhaich e an sluagh; tha a naoimh uile ad làimh: agus shuidh iad sìos aig do chasan; gheibh gach neach ded bhriathran.

⁴Dh’àithn Maois lagh dhuinn, mar oighreachd do cho-chruinneachadh Iàcoib.

⁵Agus bha e na rìgh ann an Iesurun, nuair a chruinnich ceannardan an t‑sluaigh agus treubhan Israeil an ceann a chèile.

⁶Biodh Reuben beò, agus na faigheadh e bàs; agus biodh a dhaoine lìonmhor an àireamh.

⁷Agus is e seo beannachadh Iùdah: agus thubhairt e, Eisd, a Thighearna, ri guth Iùdah, agus thoir e a‑chum a shluaigh: biodh a làmhan foghainteach dha, agus bi‑sa ad chòmhnadh aige o a naimhdean.

⁸Agus mu Lèbhi thubhairt e, Biodh do Thumin agus d’Urim aig d’aon naomh, a dhearbh thu aig Masah, ris an do rinn thu strì aig uisgeachan Mheribah;

⁹A thubhairt ra athair agus ra mhàthair, Chan fhaca mi e; agus cha do ghabh e ra bhràithrean, agus cha d’aithnich e a chlann fhèin: oir choimhead iad d’fhacail, agus ghlèidh iad do choicheangal.

¹⁰Teagaisgidh iad do bhreitheanais do Iàcob, agus do lagh do Israel: cuiridh iad tùis fad chomhair, agus làn ìobairt-loisgte air d’altair.

¹¹Beannaich, O Thighearna, a mhaoin, agus gabh ri obair a làmh: buail tro leasraidh na muinntir a dh’èireas na aghaidh, agus na muinntir leis am fuathach e, a‑chum nach èirich iad a‑rìs.

¹²Mu Bheniàmin thubhairt e, Gabhaidh aon gràdhach an Tighearna còmhnaidh ann an tèarainteachd làimh ris; agus còmhdaichidh an Tighearna e rè an là uile, agus gabhaidh e còmhnaidh eadar a ghuaillean.

¹³Agus mu Iòseph thubhairt e, Beannaichte on Tighearna gu robh a fhearann, a‑thaobh nithean luachmhor nèimh, a‑thaobh an drùchd, agus a‑thaobh na doimhne a tha na laighe shìos,

¹⁴Agus a‑thaobh nan toradh luachmhor a bheirear a‑mach leis a’ ghrèin, agus a‑thaobh nan nithean luachmhor a chuirear a‑mach leis gach mìos.

¹⁵Agus a‑thaobh prìomh nithean nam beann aosda, agus a‑thaobh nithean luachmhor nan sliabh sìorraidh,

¹⁶Agus a‑thaobh nithean luachmhor na talmhainn, agus a làin, agus deagh-ghean an Tì sin a bha a chòmhnaidh anns a’ phreas: thigeadh am beannachd air ceann Iòseiph, agus air mullach a chinn-san a sgaradh o a bhràithrean.

¹⁷Mar chiad-ghin a thairbh tha a sgèimh, agus mar adhaircean nan aon-adharcach tha a adhaircean-san: leo seo purraidh e an sluagh le chèile, gu iomallan na talmhainn: agus is iad seo deich mìltean Ephraim, agus is iad seo mìltean Mhanaseh.

¹⁸Agus mu Shebulun thubhairt e, Dèan gàirdeachas, a Shebuluin, ad dhol a‑mach; agus, Isachair, ad bhùthan.

¹⁹Gairmidh iad an sluagh a‑chum na beinne; an sin ìobraidh iad ìobairtean ionracais: oir pailteas nan cuan sùghaidh iad suas, agus ionmhais fhalaichte na gaineimh.

²⁰Agus mu Ghad thubhairt e, Beannaichte gu robh esan a leudaicheas Gad: mar leòmhann tha e a’ gabhail còmhnaidh, agus reubaidh e an gàirdean maille ri mullach a’ chinn.

²¹Agus dheasaich e a’ chiad chuid dha fhèin, a chionn an sin, ann an cuibhreann an lagh-thabhartair, gun do shuidhicheadh e; agus thàinig e maille ri ceannardan an t‑sluaigh; ceartas an Tighearna chuir e an gnìomh, agus a bhreitheanais ri Israel.

²²Agus mu Dhan thubhairt e, Is cuilean leòmhainn Dan: leumaidh e o Bhasan.

²³Agus mu Naphtali thubhairt e, O Naphtali, sàsaichte le deagh-ghean, agus làn de bheannachadh an Tighearna, sealbhaich thusa an àird an iar agus an àird a deas.

²⁴Agus mu Aser thubhairt e, Biodh Aser beannaichte le cloinn; biodh e taitneach da bhràithrean, agus tumadh e a chas ann an ola.

²⁵Bidh do bhrògan nan iarann agus nan umha; agus mar do làithean is amhlaidh a bhios do neart.

²⁶Chan eil neach cosmhail ri Dia Iesuruin, a tha a’ marcachd air nèamh ad chòmhnadh, agus na mhòrachd air na speuran.

²⁷Is e an Dia bithbhuan do thèarmann, agus foidhe tha na gàirdeanan sìorraidh: agus fuadaichidh e a‑mach an nàmhaid romhad, agus their e, Cuir as dha.

²⁸An sin gabhaidh Israel còmhnaidh gu tèarainte na aonar: bidh tobar Iàcoib air fearann arbhair agus fìona; mar an ceudna silidh a nèamhan a‑nuas drùchd.

²⁹Is sona thu, O Israeil; cò a tha cosmhail riut, O shluagh a shaoradh leis an Tighearna, sgiath do chòmhnaidh, agus neach as e claidheamh do mhòrachd? Agus gheibhear do naimhdean nam breugairean dhut, agus saltraidh tu air an àitean àrda.