Read Scots Gaelic 1992 – Am Bìoball Gàidhlig 199 Còigeamh Leabhar Mhaois Don Ainm Deuteronomi 8 Bible Online

Còigeamh Leabhar Mhaois Don Ainm Deuteronomi 8 - Scots Gaelic 1992 – Am Bìoball Gàidhlig 199 bible

Còigeamh Leabhar Mhaois Don Ainm Deuteronomi 8

¹Na h‑àitheantan uile a tha mi ag àithneadh dhut an‑diugh, bheir sibh an aire gun dèan sibh iad, a‑chum gum bi sibh beò, agus gum fàs sibh lìonmhor, agus gun tèid sibh a‑steach, agus gun sealbhaich sibh am fearann, a mhionnaich an Tighearna dur n‑athraichean.

²Agus cuimhnichidh tu an t‑slighe sin uile air an do threòraich an Tighearna do Dhia thu rè an dà‑fhichead bliadhna seo anns an fhàsach, gud irioslachadh, gud dhearbhadh, a‑chum gum biodh fios ciod a bha ann ad chridhe, an gleidheadh tu a àitheantan, no nach gleidheadh.

³Agus dh’irioslaich e thu, agus thug e ort acras fhulang, agus bheathaich e thu le mana (nì nach b’aithne dhut fhèin, cha mhò a b’aithne dod athraichean e), a‑chum gun tugadh e ort fios a bhith agad nach ann le aran a‑mhàin a bheathaichear duine, ach leis gach facal a thig a‑mach à beul an Tighearna bidh duine beò.

⁴Cha do chaitheadh d’aodach dhìot le aois, cha mhò a dh’at do chas rè an dà‑fhichead bliadhna seo.

⁵Bheir thu mar an ceudna fa‑near ann ad chridhe, mar a smachdaicheas duine a mhac, gur ann mar sin a tha an Tighearna do Dhia gad smachdachadh-sa.

⁶Uime sin gleidhidh tu àitheantan an Tighearna do Dhia, a‑chum gun gluais thu na shlighean, agus gum bi a eagal-san ort.

⁷Oir tha an Tighearna do Dhia gad thabhairt gu fearann math, fearann shruthan uisgeachan, thobraichean, agus dhoimhneachdan a tha ag èirigh suas air feadh ghleann agus air feadh bheann;

⁸Fearann cruithneachd, agus eòrna, agus fhìonainean, agus chraobhan fìgis, agus phomgranat, fearann ola na craoibh-ola, agus meala;

⁹Fearann anns an ith thu aran gun ghainne, cha bhi uireasbhaidh nì sam bith ort ann; fearann aig a bheil a chlachan nan iarann, agus as a bheanntan cladhaichear umha.

¹⁰Nuair a dh’itheas tu agus a shàsaichear thu, an sin beannaichidh tu an Tighearna do Dhia airson an fhearainn mhaith a thug e dhut.

¹¹Thoir an aire nach dìochuimhnich thu an Tighearna do Dhia, air chor is nach glèidh thu a àitheantan agus a bhreitheanais, agus a reachdan, a tha mise ag àithneadh dhut an‑diugh:

¹²Air eagal, nuair a dh’itheas tu, agus a shàsaichear thu, agus a thogas tu taighean matha, agus a chòmhnaicheas tu annta:

¹³Agus a dh’fhàsas do bhuar agus do chaoraich, agus a mheudaichear d’airgead agus d’òr, agus a mheudaichear gach nì a tha agad;

¹⁴Gum bi an sin do chridhe air a thogail suas, agus gun dìochuimhnich thu an Tighearna do Dhia, a thug a‑mach thu à tìr na h‑Eiphit, agus à taigh na daorsa;

¹⁵A threòraich thu tron fhàsach mhòr agus uamhasach sin, far an robh nathraichean loisgeach, agus sgorpionan, agus ionadan tartmhor far nach robh uisge; a thug a‑mach dhut uisge as a’ charraig ailbhinn;

¹⁶A bheathaich thu anns an fhàsach le mana, nach b’aithne dod athraichean, a‑chum gun irioslaicheadh e thu, agus gun dearbhadh e thu, a dhèanamh maith dhut ann ad làithean deireannach;

¹⁷Agus gun abair thu ann ad chridhe, Fhuair mo chumhachd, agus neart mo làimhe, an saoibhreas seo dhomh.

¹⁸Ach cuimhnichidh tu an Tighearna do Dhia: oir is esan a bheir comas dhut beartas fhaghail, a‑chum is gun daingnich e a choicheangal a mhionnaich e dod athraichean, mar air an là‑an‑diugh.

¹⁹Agus tàrlaidh, ma dhìochuimhnicheas tu air chor sam bith an Tighearna do Dhia, agus gun gluais thu an dèidh dhiathan eile, agus gun dèan thu seirbhis dhaibh, agus gun dèan thu adhradh dhaibh, tha mi a’ toirt fianais nur n‑aghaidh an‑diugh, gun sgriosar gu tur sibh.

²⁰Mar na cinnich a tha an Tighearna a’ sgrios ro ur gnùis, is amhail sin a thèid as dhuibhse; a chionn nach b’àill leibh a bhith umhail do ghuth an Tighearna ur Dia.