Read Scots Gaelic 1992 – Am Bìoball Gàidhlig 199 Leabhar Iosua 2 Bible Online

Leabhar Iosua 2 - Scots Gaelic 1992 – Am Bìoball Gàidhlig 199 bible

Leabhar Iosua 2

¹Agus chuir Iosua mac Nuin a‑mach à Sitim dithis dhaoine a rannsachadh a‑mach gu h‑uaigneach, ag ràdh, Imichibh, rannsaichibh a‑mach an tìr, agus Iericho: agus dh’imich iad, agus chaidh iad a‑steach do thaigh strìopaich, dom b’ainm Rahab, agus laigh iad an sin.

²Agus dh’innseadh do rìgh Iericho, ag ràdh, Feuch, thàinig daoine an seo a‑nochd, de chloinn Israeil, a rannsachadh a‑mach na tìre.

³Agus chuir rìgh Iericho teachdaire gu Rahab, ag ràdh, Thoir a‑mach na daoine a thàinig ad ionnsaigh, a chaidh a‑steach dod thaigh: oir is ann a rannsachadh a‑mach na tìre uile a thàinig iad.

⁴Agus ghabh a’ bhean an dithis dhaoine, agus dh’fhalaich i iad, agus thubhairt i mar seo, Thàinig gun amharas daoine am ionnsaigh, ach cha robh fhios agam cia as a thàinig iad:

⁵Agus thachair mu àm druideadh a’ gheata, nuair a bha e dorcha, gun deachaidh na daoine a‑mach: càit an deachaidh na daoine, chan fhios dhomh: leanaibh gu luath air an tòir, oir beiridh sibh orra.

⁶Ach bha i air an toirt suas gu mullach an taighe, agus air am falach le cuiseagan an lìn, a leag i an òrdagh air mullach an taighe.

⁷Agus lean na daoine air an tòir anns an t‑slighe gu Iòrdan, gu ruig na h‑àthan; agus cho luath is a chaidh a’ mhuinntir a bha air an tòir a‑mach, dhruid iad an geata.

⁸Agus mun robh iad air laighe sìos, chaidh i suas dan ionnsaigh air mullach an taighe;

⁹Agus thubhairt i ris na daoine, Tha fhios agam gu bheil an Tighearna air toirt dhuibh na tìre, agus gu bheil ur n‑uamhas air tuiteam oirnne, agus gu bheil luchd-àiteachaidh na tìre uile air leaghadh as le eagal romhaibh:

¹⁰Oir chuala sinne cionnas a thiormaich an Tighearna suas uisge na mara ruaidhe romhaibh, nuair a thàinig sibh a‑mach as an Eiphit; agus ciod a rinn sibh air dà rìgh nan Amorach, a bha air an taobh eile de Iòrdan, Sihon agus Og, a sgrios sibh gu tur.

¹¹Agus cho luath is a chuala sinne na nithean sin, leagh ar cridheachan, agus cha d’fhan tuilleadh a’ bheag de mhisnich ann an duine sam bith air ur son-se: oir an Tighearna ur Dia, is esan Dia anns na nèamhan shuas, agus air an talamh a‑bhos.

¹²A‑nis uime sin guidheam oirbh, mionnaichibh dhomh air an Tighearna, a chionn gun do nochd mi coibhneas dhuibh, gun nochd sibhse mar an ceudna coibhneas do thaigh m’athar-sa, agus gun toir sibh dhomh comharradh cinnteach;

¹³Agus gun glèidh sibh beò m’athair, agus mo mhàthair, agus mo bhràithrean, agus mo pheathraichean, agus na h‑uile a tha aca, agus gun saor sibh ar n‑anaman on bhàs.

¹⁴Agus fhreagair na daoine i, Ar n‑anam-ne air ur son-se gu bàs, mura foillsich sibh an gnothach seo againn. Agus tàrlaidh, nuair a bheir an Tighearna dhuinn an tìr, gum buin sinn gu coibhneil agus gu fìrinneach riutsa.

¹⁵An sin leig i sìos iad air còrd tron uinneig: oir bha a taigh air balla a’ bhaile, agus bha i a chòmhnaidh air a’ bhalla.

¹⁶Agus thubhairt i riu, Thugaibh am monadh oirbh, air eagal gun coinnich an luchd-tòrachd sibh; agus falaichibh sibh fhèin an sin trì làithean, gus am bi an luchd-tòrachd air tilleadh, agus an dèidh sin faodaidh sibh imeachd air ur slighe.

¹⁷Agus thubhairt na daoine rithe, Bidh sinne neochiontach a‑thaobh iad seo do mhionnan a thug thu oirnn a mhionnachadh.

¹⁸Feuch, nuair a thig sinn don tìr, ceanglaidh tu an stìom seo de shnàth sgàrlaid anns an uinneig tron do leig thu sìos sinn: agus bheir thu d’athair, agus do mhàthair, agus do bhràithrean, agus teaghlach d’athar uile, dhachaigh ad ionnsaigh.

¹⁹Agus tàrlaidh, ge bè neach a thèid a‑mach air dorsan do thaighe don t‑sràid, gum bi a fhuil air a cheann fhèin, agus bidh sinne neochiontach: agus ge bè neach a bhios maille riut anns an taigh, bidh a fhuil air ar ceann-ne ma bheanas làmh ris.

²⁰Agus ma dh’fhoillsicheas tu an gnothach seo againn, an sin bidh sinne saor od mhionnan a thug thu oirnn a mhionnachadh.

²¹Agus thubhairt ise, A rèir ur briathran mar sin biodh e. Agus chuir i air falbh iad, agus dh’imich iad: agus cheangail i an stìom sgàrlaid anns an uinneig.

²²Agus dh’fhalbh iad, agus thàinig iad don mhonadh, agus dh’fhan iad an sin trì làithean, gus an do thill an luchd-tòrachd. Agus dh’iarr an luchd-tòrachd iad air feadh na slighe uile, ach cha d’fhuair iad iad.

²³Mar sin thill an dithis dhaoine, agus chaidh iad sìos on mhonadh, agus chaidh iad thairis, agus thàinig iad gu Iosua mac Nuin, agus dh’innis iad dha gach nì a thachair dhaibh.

²⁴Agus thubhairt iad ri Iosua, Gu fìrinneach thug an Tighearna thairis dar làimh am fearann uile: oir tha eadhon luchd-àiteachaidh na tìre uile air leaghadh far comhair.