Read Scots Gaelic 1992 – Am Bìoball Gàidhlig 199 Dara Litir an Abstoil Pòl A‑Chum Thimòteuis 4 Bible Online

Dara Litir an Abstoil Pòl A‑Chum Thimòteuis 4 - Scots Gaelic 1992 – Am Bìoball Gàidhlig 199 bible

Dara Litir an Abstoil Pòl A‑Chum Thimòteuis 4

¹Tha mi a’ sparradh ort uime sin am fianais Dhè, agus an Tighearna Iosa Crìosd, a bheir breith air beò agus marbh, aig a theachd dealrach agus na rìoghachd:

²Searmonaich am facal, bi dùrachdach ann an àm agus ann an an‑àm; spreig, cronaich, earalaich leis an uile fhad-fhulangas agus theagasg.

³Oir thig an t‑àm anns nach bi fulang aca air teagasg fallain: ach air do chluasan tachasach a bhith aca, càrnaidh iad suas dhaibh fhèin luchd-teagaisg a rèir an ana-miann;

⁴Agus tionndaidhidh iad an cluasan air falbh on fhìrinn, agus tionndaidhear iad a‑chum sgeulachdan faoine.

⁵Ach dèan thusa faire anns na h‑uile nithean, fuiling cruaidh-chàs, dèan obair soisgeulaiche, làn-choilean do mhinistrealachd.

⁶Oir tha mise a‑nis gu bhith air m’ìobradh, agus tha àm mo shiubhail am fagas.

⁷Chòmhraig mi an deagh chòmhrag, chrìochnaich mi mo thuras, ghlèidh mi an creideamh.

⁸O seo a‑mach tha air a thasgadh fam chomhair crùn fìreantachd, a bheir an Tighearna, am britheamh cothromach, dhomh anns an là ud: agus chan ann dhòmhsa a‑mhàin, ach dhaibhsan uile mar an ceudna, leis an ionmhainn a theachd-san.

⁹Dèan do dhìcheall air tighinn am ionnsaigh gu luath:

¹⁰Oir thrèig Dèmas mi, air dha an saoghal seo a tha an làthair a ghràdhachadh, agus chaidh e do Thesalonìca; Crescens do Ghalàtia, Tìtus do Dhalmàtia.

¹¹Tha Lùcas na aonar maille rium. Gabh Marcus agus thoir leat e: oir tha e feumail dhòmhsa a‑chum na ministrealachd.

¹²Ach chuir mi Tichicus gu Ephesus.

¹³An fhallaing a dh’fhàg mi ann an Tròas aig Carpus, nuair a thig thu, thoir leat, agus na leabhraichean, ach gu h‑àraidh na meambranan.

¹⁴Rinn Alecsander an ceàrd-umha iomadh olc orm: gun tugadh an Tighearna dha a rèir a ghnìomharan:

¹⁵Bi thusa mar an ceudna air d’fhaicill uaithe, oir chuir e gu mòr an aghaidh ar briathar-ne.

¹⁶Aig mo chiad fhreagradh cha robh aon neach leam, ach thrèig na h‑uile mi: nar agrar orra e.

¹⁷Gidheadh, sheas an Tighearna làimh rium, agus neartaich e mi; a‑chum tromhamsa gum biodh an searmonachadh air a làn-fhoillseachadh, agus gun cluinneadh na cinnich uile e: agus shaoradh mi à beul an leòmhainn.

¹⁸Agus saoraidh an Tighearna mi o gach uile dhroch obair, agus gleidhidh e mi a‑chum a rìoghachd nèamhaidh fhèin: dhàsan gu robh glòir gu saoghal nan saoghal. Amen.

¹⁹Cuir fàilte air Prisca, agus air Acuila, agus air teaghlach Onesiphoruis.

²⁰Dh’fhan Erastus ann an Corintus: ach dh’fhàg mi Trophimus gu tinn ann am Miletum.

²¹Dèan dìcheall air teachd ron gheamhradh. Tha Eubulus, agus Pudens, agus Linus, agus Claudia, agus na bràithrean uile a’ cur fàilte ort.

²²Gu robh an Tighearna Iosa Crìosd maille rid spiorad. Gràs maille ribh. Amen.