Read Scots Gaelic 1992 – Am Bìoball Gàidhlig 199 Leabhar Rut 4 Bible Online

Leabhar Rut 4 - Scots Gaelic 1992 – Am Bìoball Gàidhlig 199 bible

Leabhar Rut 4

¹An sin chaidh Bòas suas a dh’ionnsaigh a’ gheata, agus shuidh e sìos an sin: agus, feuch, bha am fear-dàimh mun do labhair Bòas a’ dol seachad, agus thubhairt e ris, Ho, a leithid seo de fhear! Thig a lethtaobh, suidh sìos an seo. Agus thàinig e a lethtaobh, agus shuidh e sìos.

²Agus ghabh e deichnear dhaoine de sheanairean a’ bhaile, agus thubhairt e, Suidhibh sìos an seo. Agus shuidh iad sìos.

³Agus thubhairt e ris an fhear-dhàimh, Tha Naòmi, a thàinig air a h‑ais à fearann Mhòaib, gu earrann den achadh a bu le ar bràthair Elimelech a reic;

⁴Agus smaoinich mi air fios a thoirt dhut, ag ràdh, Ceannaich e am fianais an luchd-àiteachaidh, agus am fianais seanairean mo shluaigh: ma dh’fhuasgaileas tu e, fuasgail e: ach mura fuasgail thu e, innis dhomh, a‑chum gum bi fhios agam: oir chan eil neach air bith ann gu fhuasgladh ach thusa, agus mise ad dhèidh-sa. Agus thubhairt esan, Fuasglaidh mise e.

⁵An sin thubhairt Bòas, Anns an là anns an ceannaich thu an t‑achadh o làimh Naòmi, feumaidh tu cuideachd a cheannach o Rut, a’ bhan-Mhòabach, bean a’ mhairbh, a thogail suas ainm a’ mhairbh air a oighreachd-san.

⁶Agus thubhairt am fear-dàimh, Chan fhaod mi fhuasgladh dhomh fhèin, air eagal gum mill mi m’oighreachd fhèin: fuasgail thusa mo chòir dhut fhèin, oir chan fhaod mise a fuasgladh.

⁷A‑nis b’e seo o shean an gnàth ann an Israel a‑thaobh fuasglaidh, agus a‑thaobh iomlaid, a dhaingneachadh gach nì: chuireadh duine dheth a bhròg, agus bheireadh e da choimhearsnach i: agus bha seo mar fhianais ann an Israel.

⁸Uime sin thubhairt am fear-dàimh ri Bòas, Ceannaich air do shon fhèin e: agus chuir e dheth a bhròg.

⁹Agus thubhairt Bòas ris na seanairean agus ris an t‑sluagh uile, Is fianaisean sibhse an‑diugh gun do cheannaich mise gach nì a bu le Elimelech, agus gach nì a bu le Chileon, agus le Mahlon, à làimh Naòmi.

¹⁰Agus mar an ceudna Rut, a’ bhan-Mhòabach, bean Mhahloin, cheannaich mi dhomh fhèin gu bhith na mnaoi agam, a thogail suas ainm a’ mhairbh air a oighreachd, a‑chum nach gearrar as ainm a’ mhairbh à meadhon a bhràithrean, agus o gheata a àite fhèin: is fianaisean sibhse an‑diugh.

¹¹Agus thubhairt an sluagh uile a bha anns a’ gheata, agus na seanairean, Is fianaisean sinn: gun dèanadh an Tighearna a’ bhean a tha a’ teachd a dh’ionnsaigh do thaighe mar Rachel agus mar Lèah, a thog suas le chèile taigh Israeil: agus dèan thusa gu cubhaidh ann an Ephratah, agus bi cliùiteach ann am Betlehem:

¹²Agus bidh do thaigh mar thaigh Phareis (a rug Tàmar do Iùdah), den t‑sliochd a bheir an Tighearna dhut on mhnaoi òig seo.

¹³Agus ghabh Bòas Rut, agus bha i aige na mnaoi: agus chaidh e a‑steach da h‑ionnsaigh, agus thug an Tighearna torrachas dhi, agus rug i mac.

¹⁴Agus thubhairt na mnathan ri Naòmi, Beannaichte gu robh an Tighearna nach d’fhàg thusa an‑diugh gun fhear-dàimh, a‑chum gum bi a ainm cliùiteach ann an Israel.

¹⁵Agus bidh e dhut na fhear ath-nuadhachadh do bheatha, agus na fhear-altraim do sheann aois, oir is i do bhan-chliamhainn, aig a bheil gràdh dhut, as fheàrr dhut na seachd mic, a rug e.

¹⁶Agus ghabh Naòmi an leanabh, agus chuir i na h‑uchd e, agus bha i na banaltram aige.

¹⁷Agus thug na ban-choimhearsnaich ainm air, ag ràdh, Rugadh mac do Naòmi; agus thug iad Obed mar ainm air: Is esan athair Iese, athair Dhaibhidh.

¹⁸A‑nis is iad seo ginealaichean Phareis: Ghin Phares Hesron.

¹⁹Agus ghin Hesron Ram, agus ghin Ram Aminadab.

²⁰Agus ghin Aminadab Nahson, agus ghin Nahson Salmon.

²¹Agus ghin Salmon Bòas, agus ghin Bòas Obed.

²²Agus ghin Obed Iese, agus ghin Iese Daibhidh.