Read Scots Gaelic 1992 – Am Bìoball Gàidhlig 199 Ciad Leabhar Shamueil 10 Bible Online

Ciad Leabhar Shamueil 10 - Scots Gaelic 1992 – Am Bìoball Gàidhlig 199 bible

Ciad Leabhar Shamueil 10

¹An sin ghabh Samuel còrn ola, agus dhòirt e air a cheann e, agus phòg e e, agus thubhairt e, Nach ann a chionn gun d’ung an Tighearna thu gu bhith ad cheannard air a oighreachd fhèin?

²Nuair a dh’imicheas tu an‑diugh uamsa, an sin gheibh thu dithis dhaoine làimh ri uaigh Racheil, ann an crìch Bheniàmin ann an Selsah: agus their iad riut, Fhuaireadh na h‑asail a chaidh thu a dh’iarraidh; agus, feuch, leig d’athair dheth cùram nan asal, agus tha smuairean air mur timcheall-se, ag ràdh, Ciod a nì mi airson mo mhic?

³An sin thèid thu air d’aghaidh as a sin, agus thig thu a dh’ionnsaigh còmhnard Thaboir, agus coinnichidh tu an sin triùir dhaoine a’ dol suas a dh’ionnsaigh Dhè gu Betel, aon dhiubh a’ giùlan trì minn, agus aon eile a’ giùlan trì buileannan arain, agus aon eile a’ giùlan searrag fhìona:

⁴Agus cuiridh iad fàilte ort, agus bheir iad dhut dà bhuileann arain, agus gabhaidh tu as an làimh iad.

⁵Na dhèidh sin thig thu gu cnoc Dhè, far a bheil freiceadain nam Philisteach: agus tàrlaidh, nuair a thig thu an sin don bhaile, gun coinnich thu cuideachd fhàidhean a’ teachd a‑nuas on ionad àrd, le saltair, agus tiompan, agus pìob, agus clàrsach romhpa, agus iad ri fàidheadaireachd:

⁶Agus tùirlingidh Spiorad an Tighearna ort, agus nì thu fàidheadaireachd maille riùsan, agus tionndaidhear thu ad dhuine eile.

⁷Agus nuair a thig na comharraidhean sin ort, nì thu mar a fhreagras a’ chùis dhut, oir bidh Dia maille riut.

⁸Agus thèid thu sìos romhamsa gu Gilgal; agus, feuch, thèid mise sìos ad ionnsaigh, a thoirt suas thabhartasan-loisgte, agus a dh’ìobradh ìobairtean thabhartasan-sìth; seachd làithean fanaidh tu, gus an tig mise ad ionnsaigh, agus gun toir mi fios dhut ciod a nì thu.

⁹Agus nuair a thionndaidh e a chùl gu falbh o Shamuel, thug Dia dha cridhe eile, agus thàinig na comharraidhean sin uile gu crìch air an là sin fhèin.

¹⁰Agus thàinig e o sin don chnoc; agus, feuch, choinnich cuideachd fhàidhean e; agus thùirling spiorad Dhè air, agus rinn e fàidheadaireachd nam measg.

¹¹A‑nis nuair a chunnaic iadsan uile a ghabh eòlas air roimhe, feuch, gun do rinn e fàidheadaireachd maille ris na fàidhean, an sin thubhairt an sluagh gach aon ri chèile, Ciod e seo a thàinig air mac Chis? A bheil Saul cuideachd am measg nam fàidhean?

¹²Agus fhreagair duine as an àite sin, agus thubhairt e, Ach cò e an athair? Uime sin bha e na ghnàth-fhacal, A bheil Saul cuideachd am measg nam fàidhean?

¹³Agus nuair a chuir e crìoch air fàidheadaireachd a dhèanamh, thàinig e don ionad àrd.

¹⁴Agus thubhairt bràthair-athar Shauil ris, agus ra òganach, Càit an deachaidh sibh? Agus thubhairt esan, A dh’iarraidh nan asal: agus nuair a chunnaic sinn nach robh iad rim faotainn, thàinig sinn gu Samuel.

¹⁵Agus thubhairt bràthair-athar Shauil, Innis dhomh, guidheam ort, ciod a thubhairt Samuel ribh.

¹⁶Agus thubhairt Saul ri bràthair a athar, Dh’innis e dhuinn gu cinnteach gun d’fhuaireadh na h‑asail; ach a‑thaobh na rìoghachd, cha d’innis e dha ciod a thubhairt Samuel.

¹⁷Agus ghairm Samuel an sluagh ri chèile a dh’ionnsaigh an Tighearna gu Mispeh;

¹⁸Agus thubhairt e ri cloinn Israeil, Mar seo tha an Tighearna Dia Israeil ag ràdh, Thug mi a‑nìos Israel as an Eiphit, agus shaor mi sibh à làimh nan Eiphiteach, agus à làimh nan rìoghachdan uile, a bha a’ dèanamh ainneirt oirbh:

¹⁹Gidheadh, chuir sibhse an‑diugh cùl ri ur Dia, esan a shaor sibh o ur n‑uilc agus ur teanntachdan gu lèir: agus thubhairt sibh, Chan eadh, ach cuiridh tu rìgh os ar cionn. A‑nis uime sin, nochdaibh sibh fhèin am fianais an Tighearna, a rèir ur treubhan, agus a rèir ur mìltean.

²⁰Agus nuair a thug Samuel air uile threubhan Israeil teachd am fagas, ghabhadh treubh Bheniàmin.

²¹Agus nuair a thug e air treubh Bheniàmin teachd am fagas a rèir an teaghlaichean, ghabhadh teaghlach Mhatri: agus nuair a thug e air teaghlach Mhatri teachd am fagas a lìon fear agus fear, ghabhadh Saul mac Chis: agus nuair a dh’iarr iad e, cha d’fhuaireadh e.

²²Uime sin dh’fhiosraich iad fhathast den Tighearna, an tigeadh an duine fhathast an sin; agus fhreagair an Tighearna, Feuch, dh’fhalaich e e fhèin am measg na h‑àirneis.

²³Agus ruith iad, agus thug iad à sin e: agus nuair a sheas e ann am meadhon an t‑sluaigh, bha e na b’àirde na an sluagh uile, o a ghuaillean agus o sin suas.

²⁴Agus thubhairt Samuel ris an t‑sluagh uile, Am faic sibh esan a thagh an Tighearna, nach eil neach cosmhail ris am measg an t‑sluaigh uile? Agus rinn an sluagh uile iolach, agus thubhairt iad, Guma fada beò an rìgh.

²⁵An sin dh’innis Samuel don t‑sluagh lagh na rìoghachd, agus sgrìobh e ann an leabhar e, agus thaisg e suas am fianais an Tighearna e: agus leig Samuel an sluagh uile air falbh, gach duine da thaigh.

²⁶Agus chaidh Saul mar an ceudna dhachaigh gu Gibeah, agus chaidh maille ris daoine treuna, aig an do bhean Dia rin cridhe.

²⁷Ach thubhairt mic Bheliail, Cionnas a shaoras am fear seo sinn? Agus rinn iad dìmeas air, agus cha tug iad tìodhlac sam bith da ionnsaigh: ach dh’fhan esan na thosd.