Read Scots Gaelic 1992 – Am Bìoball Gàidhlig 199 Ciad Leabhar Shamueil 19 Bible Online

Ciad Leabhar Shamueil 19 - Scots Gaelic 1992 – Am Bìoball Gàidhlig 199 bible

Ciad Leabhar Shamueil 19

¹Agus labhair Saul ra mhac Ionatan, agus ra sheirbhisich uile, iad a mharbhadh Daibhidh.

²Ach bha tlachd mòr aig Ionatan mac Shauil ann an Daibhidh: agus dh’innis Ionatan do Dhaibhidh, ag ràdh, Tha m’athair Saul ag iarraidh do mharbhadh; a‑nis uime sin, guidheam ort, thoir an aire dhut fhèin anns a’ mhadainn, agus fan ann an àite diamhair, agus falaich thu fhèin.

³Agus thèid mise a‑mach, agus seasaidh mi làimh rim athair anns a’ mhachair anns am bi thu, agus labhraidh mi mud thimcheall rim athair; agus an nì a chì mi, sin innsidh mi dhut.

⁴Agus labhair Ionatan math mu Dhaibhidh ra athair Saul, agus thubhairt e ris, Na peacaicheadh an rìgh an aghaidh a sheirbhisich, an aghaidh Dhaibhidh; do bhrìgh nach do pheacaich esan ad aghaidh-sa, agus do bhrìgh gu robh a obraichean dod thaobh-sa ro‑mhath:

⁵Oir chuir e a anam na làimh, agus mharbh e am Philisteach; agus dh’obraich an Tighearna saorsa mhòr airson Israeil uile: chunnaic thu e agus rinn thu gàirdeachas: carson matà a pheacaicheas tu an aghaidh fala neo-chiontaich, le Daibhidh a mharbhadh gun adhbhar?

⁶Agus dh’èisd Saul ri guth Ionatain; agus mhionnaich Saul, Mar as beò an Tighearna, cha mharbhar e.

⁷Agus ghairm Ionatan air Daibhidh, agus chuir Ionatan an cèill dha na briathran sin uile: agus thug Ionatan Daibhidh a dh’ionnsaigh Shauil, agus bha e na fhianais mar a bha e roimhe.

⁸Agus bha cogadh a‑rìs ann: agus chaidh Daibhidh a‑mach, agus chog e ris na Philistich, agus bhuail e iad le àr mòr; agus theich iad roimhe.

⁹Agus bha an droch spiorad on Tighearna air Saul nuair a shuidh e na thaigh, agus a shleagh na làimh: agus chluich Daibhidh le a làimh.

¹⁰Agus dh’iarr Saul Daibhidh a bhualadh gu ruig am balla leis an t‑sleagh; ach tharraing e air falbh à làthair Shauil, agus bhuail e an t‑sleagh a‑steach anns a’ bhalla: agus theich Daibhidh, agus chaidh e as air an oidhche sin.

¹¹Agus chuir Saul teachdairean a dh’ionnsaigh taigh Dhaibhidh, ga choimhead agus ga mharbhadh anns a’ mhadainn: agus dh’innis Michal a bhean do Dhaibhidh e, ag ràdh, Mura teasairg thu d’anam a‑nochd, a‑màireach cuirear gu bàs thu.

¹²Agus leig Michal sìos Daibhidh tro uinneig: agus dh’fhalbh e, agus theich e, agus chaidh e as.

¹³Agus ghabh Michal dealbh, agus chuir i anns an leabaidh e, agus chuir i adhartan de fhionnadh ghobhar fo a cheann, agus chòmhdaich i le aodach e.

¹⁴Agus nuair a chuir Saul teachdairean a ghlacadh Dhaibhidh, thubhairt i, Tha e tinn.

¹⁵Agus chuir Saul na teachdairean a‑rìs a dh’fhaicinn Dhaibhidh, ag ràdh, Thugaibh a‑nìos anns an leabaidh am ionnsaigh-sa e, a‑chum gum marbh mi e.

¹⁶Agus nuair a thàinig na teachdairean a‑steach, feuch, bha dealbh anns an leabaidh, agus adhartan de fhionnadh ghobhar fo a cheann.

¹⁷Agus thubhairt Saul ri Michal, Carson a mheall thu mi mar seo, agus a chuir thu air falbh mo nàmhaid, air chor is gun deachaidh e as? Agus fhreagair Michal Saul, Thubhairt e rium, Leig dhomh imeachd; carson a mharbhainn thu?

¹⁸Agus theich Daibhidh, agus chaidh e as, agus thàinig e a dh’ionnsaigh Shamueil gu Ramah, agus dh’innis e dha gach nì a rinn Saul ris: agus dh’imich esan agus Samuel, agus ghabh iad còmhnaidh ann an Naiot.

¹⁹Agus dh’innseadh do Shaul, ag ràdh, Feuch, tha Daibhidh aig Naiot ann an Ramah.

²⁰Agus chuir Saul teachdairean a ghlacadh Dhaibhidh: agus nuair a chunnaic iad cuideachd nam fàidhean ri fàidheadaireachd, agus Samuel na sheasamh mar air a shuidheachadh os an cionn, bha spiorad Dhè air teachdairean Shauil, agus rinn iadsan fàidheadaireachd mar an ceudna.

²¹Agus nuair a dh’innseadh sin do Shaul, chuir e uaithe mar an ceudna teachdairean eile, agus rinn iadsan cuideachd fàidheadaireachd. Agus chuir Saul teachdairean a‑rìs an treas uair, agus rinn iadsan cuideachd fàidheadaireachd.

²²An sin chaidh e fhèin mar an ceudna gu Ramah, agus thàinig e gu tobar mòr a tha ann an Sechu, agus dh’fheòraich e, agus thubhairt e, Càit a bheil Samuel, agus Daibhidh? Agus thubhairt aon, Feuch, tha iad aig Naiot ann an Ramah.

²³Agus chaidh e an sin gu Naiot ann an Ramah: agus bha spiorad Dhè air-san mar an ceudna, agus chaidh e air aghaidh, agus rinn e fàidheadaireachd, gus an tàinig e gu Naiot ann an Ramah.

²⁴Agus chuir esan cuideachd a aodach dheth, agus rinn e fàidheadaireachd am fianais Shamueil air an dòigh cheudna: agus laigh e sìos lomnochd rè an là sin agus rè na h‑oidhche. Uime sin their iad, A bheil Saul mar an ceudna am measg nam fàidhean?