Read Scots Gaelic 1992 – Am Bìoball Gàidhlig 199 Ciad Leabhar Shamueil 8 Bible Online

Ciad Leabhar Shamueil 8 - Scots Gaelic 1992 – Am Bìoball Gàidhlig 199 bible

Ciad Leabhar Shamueil 8

¹A‑nis nuair a bha Samuel aosda, chuir e a mhic nam britheamhan os cionn Israeil.

²Agus b’e ainm a chiad-ghin mic Ioel, agus ainm a dhara mic Abiah: bha iad nam britheamhan ann am Beer-sèba.

³Agus cha do ghluais a mhic na shlighean-san, ach chlaon iad an dèidh buannachd, agus ghabh iad duais, agus dh’fhiar iad breitheanas.

⁴An sin chruinnich uile sheanairean Israeil iad fhèin an ceann a chèile, agus thàinig iad a dh’ionnsaigh Shamueil gu Ramah.

⁵Agus thubhairt iad ris, Feuch, tha thusa air fàs aosda, agus chan eil do mhic a’ gluasad ann ad shlighean: a‑nis matà dèan dhuinne rìgh gu breith a thoirt oirnn, mar na cinnich uile.

⁶Ach mhì-thaitinn an nì ri Samuel, nuair a thubhairt iad, Thoir dhuinn rìgh gu breith a thoirt oirnn: agus rinn Samuel ùrnaigh ris an Tighearna.

⁷Agus thubhairt an Tighearna ri Samuel, Eisd ri guth an t‑sluaigh anns gach nì a their iad riut: oir riutsa cha do chuir iad cùl, ach riumsa chuir iad cùl, a‑chum nach rìoghaichinn os an cionn.

⁸A rèir nan uile obraichean a rinn iad on là anns an tug mi a‑nìos iad as an Eiphit gu ruig an là‑an‑diugh, leis an do thrèig iad mi, agus an do rinn iad seirbhis do dhiathan eile, mar seo tha iad a’ dèanamh mar an ceudna riutsa.

⁹A‑nis uime sin èisd rin guth: gidheadh bheir thu gu cinnteach fianais nan aghaidh, agus cuiridh tu an cèill dhaibh lagh an rìgh a rìoghaicheas os an cionn.

¹⁰Agus dh’innis Samuel uile bhriathran an Tighearna don t‑sluagh, a bha ag iarraidh rìgh air.

¹¹Agus thubhairt e, Seo mar a bhios lagh an rìgh a rìoghaicheas os ur cionn: Gabhaidh e ur mic, agus òrdaichidh e dha fhèin iad a‑chum a charbad, agus gu bhith nam marcaichean aige, agus gu ruith ro a charbadan;

¹²Agus gan cur nan ceannardan dha fhèin air mhìltean, agus nan ceannardan air lethcheudan, agus a threabhadh a fhearainn, agus a bhuain a fhoghair, agus a dhèanamh innealan-cogaidh air a shon, agus innealan airson a charbad.

¹³Agus gabhaidh e ur nigheanan a dhèanamh ola-ungaidh cùbhraidh, agus gu bhith nam ban-chòcairean, agus nam ban-fhuineadairean.

¹⁴Agus gabhaidh e ur n‑achaidhean agus ur fìonliosan, agus ur liosan-ola, eadhon a’ chuid as fheàrr dhiubh, agus bheir e iad da òglaich.

¹⁵Agus gabhaidh e an deicheamh de ur sìol, agus de ur fìonliosan, agus bheir e da luchd-dreuchd e, agus da òglaich.

¹⁶Agus gabhaidh e ur n‑òglaich-se agus ur banoglaich, agus na h‑òganaich as fheàrr agaibh, agus ur n‑asail, agus cuiridh e a‑chum a obrach fhèin iad.

¹⁷Gabhaidh e an deicheamh de ur caoraich: agus bidh sibh nur seirbhisich aige.

¹⁸Agus glaodhaidh sibh a‑mach anns an là sin o làthair ur rìgh a thagh sibh dhuibh fhèin; agus chan èisd an Tighearna ribh anns an là sin.

¹⁹Gidheadh, dhiùlt an sluagh èisdeachd ri guth Shamueil, agus thubhairt iad, Chan eadh; ach bidh rìgh againne os ar cionn:

²⁰Agus bidh sinne mar an ceudna mar na cinnich uile, agus bheir ar rìgh breith oirnn, agus thèid e a‑mach romhainn, agus cuiridh e ar cathan.

²¹Agus chuala Samuel uile bhriathran an t‑sluaigh, agus dh’aithris e iad ann an cluasan an Tighearna.

²²Agus thubhairt an Tighearna ri Samuel, Eisd rin guth, agus dèan rìgh dhaibh. Agus thubhairt Samuel ri fir Israeil, Rachaibh, gach duine dhibh, da bhaile fhèin.