Read Sehwi Gyenesise 12 Bible Online

Gyenesise 12 - Sehwi bible

Gyenesise 12

¹ Na AWURADE sele Abram kyɛ, “Tu fi wɔ maen nu, w’abusuafoɛ nu, ɔne ɛse awuro, ná kɔ aseɛ bɔ mebaahyire wɔ ne aso.

² Ngɔmaa ɛkɔyɛ maen pirikua, ngoyira wɔ, ná mama wɔ dumaa ahɔ anwuro, amaa ɔnate so ayɛ saleɛ.

³ Ngoyira bɛ bɔ beyira wɔ, na ebiala bɔ ɔnoma wɔ ne, me koso ngɔnoma ye; na ɔnate wɔ so yeɛ aseɛ so mmusua amukoraa bekonya saleɛ ɔ.”

⁴Yiti Abram hɔle, kyɛbɔ AWURADE ha hyirele ye ne, na Lɔto ne ye bɛhɔle. Mmerɛ bɔ Abram tu fili Haran nen, né wali afoɛ aburasoo ne nnu.

⁵Na Abram fale ɔye Sarae, oliɛma bienzua awa Lɔto, bɛ nwo nningyein bɔ banya amukoraa, ɔne mmenia bɔ benyane bɛ wɔ Haran, na besili nu kyɛ bɛ́kɔ Kanaan aseɛ so. Beedwuli Kanaan aseɛ so.

⁶Abram pɛle nu wɔ aseɛ ne aso, na oodwuli More eluii bakaa bɔ ɔwɔ Sɛkem ne anwo. Sɔ mmerɛ ne, né Kanaanfoɛ wɔ aseɛ ne aso.

⁷ Na AWURADE yele ye nwo ali hyirele Abram, na osele kyɛ, “Wɔ bosofoɛ yeɛ ngɔfa sɔ aseɛ he ngɔma bɛ ɔ.” Yiti Abram sili afɔleɛ bokyea berɛ mane AWURADE bɔ ɔyele ye nwo ali hyirele ye ne.

⁸Afei otu fili berɛ hɔle mmokaa aseɛ bɔ ɔwɔ Betel eyia afiteleɛ ne aso dɔ, na osili ye ɛtena sua wɔ berɛ; bɔ né Betel wɔ ye eyia atɔleɛ, yeɛ Aye koso wɔ ye eyia afiteleɛ. Osili afɔleɛ bokyea berɛ mane AWURADE, na ɔsɔnene AWURADE.

⁹Abram toale ye ateetulɛ ne aso fale ye nye hyirele ngwaen dɔ aseɛ[10] ne.

¹⁰ Afei ɛhɔen piri bie wale aseɛ ne aso. Na ɔnate kyɛ ɛhɔen ne te piri ne ati, Abram hɔle Misraim ɔɔtenane berɛ yɛle wɔfoɛ.

¹¹Na ɔka kãa maa odwu Misraim nen, osele ɔye Sarae kyɛ, “Mese kyɛ ɛte brasua bɔ wɔ nwo yɛ nyemene ɔ;

¹²na sɛ Misraimfoɛ nwu wɔ a, bɛkɔhã kyɛ, ‘Ɔye ɔ’; ná bahu me, nakoso wɔ de bɛkɔyakyi wɔ.

¹³Yiti ka kyɛ nniɛma ole wɔ, amaa ɔnate wɔ ti bale me nyemene so, na ɔnate wɔ ti manya me ti madidi nu.”

¹⁴Abram dwuli Misraim nen, Misraimfoɛ nemɔ nwuni kyɛ braa ne nwo yɛ nyemene paa.

¹⁵Faro mbanyi nemɔ nwuni ye, na bɛkamvole ye behyirele Faro. Na bɛfale braa ne bɛhɔle Faro awuro.

¹⁶Na ɔnate ye ti Faro lele Abram nyemene so; na Abram nyane mmoaen, nandwie, afunum nyii mɔ, ngoaa ne afaneɛ mɔ, afunum beleɛ mɔ ne afupɔngɔ mɔ.

¹⁷Na ɔnate Abram aye Sarae ti, AWURADE fale amaneɛ pirikua tole Faro ne ye awuro ama so.

¹⁸Yiti Faro frɛle Abram bisale ye kyɛ, “Nzikyɛ dwirɛ paa yeɛ afa ali me e? Nzu ati yeɛ anga angyire me kyɛ ɛye ahɔ ɔ?

¹⁹Nzu ati yeɛ ɛhane kyɛ ‘Nniɛma ɔ,’ bɔ ahaa ɛmaa mefa ye meyɛ me ye ɔ? Nea, ɛye ne ɛhe. Fa ye na ɛne ye befi wa bɛhɔ!”

²⁰Na Faro hyɛle mmenia kyɛ bɛma Abram ɔhɔ, na bɛhane Abram ne ɔye, ɔne bɔ banya ye amukoraa beguale atee so maa bɛhɔle.