Read Sehwi Gyenesise 13 Bible Online

Gyenesise 13 - Sehwi bible

Gyenesise 13

¹Yiti Abram fili Misraim hɔle ngwaen dɔ aseɛ ne aso dɔ, ɔne ɔye ne bɔ wanya ye amukoraa, na Lɔto ne ye bɛhɔle.

²Né Abram anya ye nwo tam wɔ nyɛmmoa, ɛdwetɛ ne sikaa kɔkorɛ nu.

³Olili tutena toonn fili ngwaen dɔ aseɛ ne aso oodwuli Betel, na odwuli nekaa bɔ olili moa sili ye ɛtena sua ne, wɔ Betel ne Aye b’afia.

⁴Oodwuli nekaa bɔ olili moa sili afɔleɛ bokyea ne. Na Abram sɔnene AWURADE berɛ.

⁵Né Lɔto bɔ ɔne Abram bɛnate ne koso ole mmoaen ne nandwie ne ɛtena sua mɔ.

⁶Ye sɔ ne ati, né bɛnzo aseɛ bɔ bɛ munyɔ bɛte so ne aso; ofikyɛ né b’anwonya somaa ne mma bɛngora bɛndena mmɔ nu.

⁷Na edwudwolɛ wale Abram ngaka neafoɛ nemɔ ne Lɔto ngaka neafoɛ nemɔ afia. Na sɔ mmerɛ ne, né Kanaanfoɛ ne Perisifoɛ wɔ sɔ aseɛ ne aso.

⁸ Na Abram sele Lɔto kyɛ, “Mesrɛ wɔ, nnɛma aporowaa biala ba me ne wɔ afia, ɔne wɔ ngaka neafoɛ ne me ngaka neafoɛ afia, ofikyɛ yɛbɔ abusua.

⁹Aso nna aseɛ yeɛ ɔla wɔ nyunu tɛtrɛtɛɛ ye? Mesrɛ wɔ, te wɔ nwo fi me nwo. Na sɛ ɛfa bɛen so a, me wora ngɔfa famaa so; yeɛ sɛ ɛfa famaa so koso a, me wora ngɔfa bɛen so.”

¹⁰Lɔto totole ye nye neane Yɔɔdan noa aseɛ frɛtɛɛ ne amukoraa, bɔ ɔkɔ Soa bue nu dɔ ne, na onwuni kyɛ nzue doadoa ye nekaa biala te kyɛ AWURADE turo ne, kyɛ Misraim aseɛ. Ɛhe sili koraka yeɛ AWURADE baasɛkye Sodom ne Gomora ɔ.

¹¹Yiti Lɔto yele Yɔɔdan noa aseɛ frɛtɛɛ ne amukoraa, na ɔfale ye ti bɔle eyia afiteleɛ bue nu dɔ. Na bɛpakyepakyele nu.

¹²Abram tenane Kanaan aseɛ so, nakoso Lɔto de, ɔtenane Yɔɔdan noa aseɛ frɛtɛɛ nguro nemɔ aso, na oosili ye ɛtena sua pingyele Sodom.

¹³Né Sodomfoɛ te amumuyɛɛfoɛ, bɔ bɛyɔ bɔne mbirikua mbirikua betia AWURADE ɔ.

¹⁴Lɔto tele ye nwo fili Abram nwo ne, ye si ye AWURADE sele Abram kyɛ, “Gyina nekaa bɔ ɛwɔ ne, ná ma wɔ nye so nea sorɔ ne ngwaen, eyia afiteleɛ ne atɔleɛ.

¹⁵ Na ngɔfa aseɛ bɔ enwu ye ne amukoraa ngɔma wɔ ne wɔ boso ama afebɔɔ.

¹⁶Ngɔma wɔ boso ama kɔta kyɛ aseɛ so mvuture. Na sɛ ebie kora ka aseɛ so mvuture a, ye de ɔkɔhora kɔha wɔ boso ama koso.

¹⁷Ma wɔ nwo yɛ nyera, na nate fa aseɛ ne tendenn ne ye tɛtrɛtɛɛ nu, ofikyɛ mebaafa mema wɔ.”

¹⁸Yiti Abram tutuli ye ɛtena sua ne, na ɔɔtenane pingyele Mamre eluii mmakaa bɔ bɛwɔ Hebron ne, na osili afɔleɛ bokyea berɛ mane AWURADE.