Read Sehwi Gyenesise 16 Bible Online

Gyenesise 16 - Sehwi bible

Gyenesise 16

¹Né Abram ne ɔye Sarae bɛwwole baa biala. Né Sarae le Misraimniɛ afaneɛ bie bɔ oli Hagar.

²Na Sarae sele Abram kyɛ, “Anwu ye kyɛ AWURADE mma menwo, yiti mesrɛ wɔ, ɛne m’afaneɛ ne bɛla; na ebiaa né ɔnate ye so manya mmaa.” Na Abram tiele bɔ Sarae hane ne.

³Yiti Abram lili afoɛ buru wɔ Kanaan aseɛ so nen, Abram aye Sarae fale ye afaneɛ Hagar bɔ ɔte Misraimniɛ ne mane ohu maa ɔyɛle ɔye.

⁴Ɔne Hagar bɛlale, na ɔnwonzɛle. Na mmerɛ bɔ Hagar nwuni kyɛ ɔnwonzɛ nen, afei né ommu ye mene aye ne.

⁵Na Sarae sele Abram kyɛ, “Edwirɛ tɛɛ bɔ ɔfa di me ne, ɔkɔbɔ wɔ ti so. Me yeɛ mvale m’afaneɛ mane wɔ kyɛ ɛne ye bɛla ɔ, nakoso onwuni kyɛ ɔnwonzɛ nen, afei de ommu me. Mesrɛ kyɛ AWURADE obua wɔ ne me y’afia ndɛen!”

⁶Yeɛ Abram buale Sarae kyɛ, “Tie, w’afaneɛ ɔ, na owura wɔ sa; ɛne ye beli ye kyɛbɔ ɛnea a ɔte paa ɔ.” Yiti Sarae tanene Hagar nye maa ɔnwatili fili ye nwo hɔle.

⁷AWURADE abɔfo nwuni Hagar wɔ ɛserɛ so nekaa bie bɔ nzue pu fi aseɛnwo ɔ. Sɔ nzue ne wɔ Sure atee so.

⁸Na obisale ye kyɛ, “Sarae afaneɛ Hagar, nisua yeɛ efi wale ɔ, na nisua yeɛ ɛkɔ ɔ?” Na obuale kyɛ, “Me mene aye Sarae sa nu yeɛ ménwati méfi ɔ.”

⁹ Na AWURADE abɔfo ne sele ye kyɛ, “Sá kɔ wɔ mene aye ne berɛ, na kɔbrɛ wɔ nwo ase ma ye.”

¹⁰Na AWURADE abɔfo ne sá sele ye kyɛ, “Ngɔma wɔ boso ama kɔta pee bɔ ebiala ngɔhora bɛ ka ɔ.”

¹¹Na AWURADE abɔfo ne sele ye bieku kyɛ, “Nea, ɛnwonzɛ, ɛkɔwo baa bienzua, na ɛkɔto ye dumaa Yismael,[12] ofikyɛ w’aworabɔlɛ ne adwu AWURADE nyunu.

¹² Ye suban kɔyɛ kyɛ eburo afunum; ɔkɔho kotia sona biala, ná sona biala koso aho atia ye, na ɛpɔen kɔla ye ne ye abusuafoɛ amukoraa b’afia.”

¹³Yiti Hagar frɛle AWURADE bɔ odwudwo hyirele ye ne kyɛ, “Ɛte Nyameɛ bɔ enwu nikye ɔ”, na Hagar hane kyɛ, “Aso manwu AWURADE yeɛ ndɛ te ase ye?”

¹⁴ Ye sɔ ne ati, bɛfrɛ sɔ abura ne Beɛ Lahai Roi,[13] na ɔwɔ Kadese ne Berede b’afia.

¹⁵Hagar wole baa bienzua mane Abram; na Abram tole ɔwa bɔ Hagar wole ye ne dumaa Yismael.

¹⁶Abram lili afoɛ aburawɔtwɛ ne nzia yeɛ Hagar wole Yismael mane ye ɔ.