Read Sehwi Gyenesise 17 Bible Online

Gyenesise 17 - Sehwi bible

Gyenesise 17

¹Mmerɛ bɔ Abram lili afoɛ aburahona ne ngona ne, AWURADE yele ye nwo ali hyirele ye, na osele ye kyɛ, “Me ole Tuminiɛ Nyameɛ, di me dwirɛ so, ná ma wɔ bra yɛ sannwuu.

²Ngɔma m’apam kɔla me ne wɔ y’afia, na mama wɔ boso ata pee.”

³Afei Abram fale ye nyunu butuli berɛ, na Nyameɛ sele ye kyɛ,

⁴“Tie, me de, m’apam bɔ me ne wɔ yayɛ hɔ ɛhe: ɛkɔyɛ maen maen pee bɛ baba.

⁵ Bɛngɔfrɛ wɔ Abram[14] ko, na mmom bɛkɔfrɛ wɔ Abraham,[15] ofikyɛ mayɛ wɔ maen maen pee bɛ baba.

⁶Ngɔma wɔ boso kɔta pee; ngɔmaa ekosu maen maen pee, na mama ahemvo mɔ afi wɔ nu awa.

⁷ Ngɔyɛ m’apam maa ɔkɔyɛ apam afebɔɔ, bɔ ɔwɔ berɛ ma me ne wɔ ne kyẽa bie wɔ boso ama wɔ b’aworɛ ndoatoasoɛ mukoraa nu. Na ngɔyɛ wɔ ne kyẽa bie wɔ boso ama Nyameɛ.

⁸ Ngɔfa aseɛ bɔ aayɛ so wɔfoɛ ne, yeɛ Kanaan aseɛ mukoraa ngɔma wɔ ne kyẽa bie wɔ boso ama maa ɔkɔyɛ ɛmɔ deɛ afebɔɔ; na ngɔyɛ bɛ Nyameɛ”

⁹Na Nyameɛ sele Abraham kyɛ, “Odi kyɛ edi m’apam ne aso, ɛne kyẽa bie wɔ boso ama ne b’aworɛ ndoatoasoɛ mukoraa nu.

¹⁰ Na m’apam he yeɛ odi kyɛ ɛmɔdi so ɔ, mekyire bɔ ɔla me ne wɔ ne wɔ boso ama y’afia ne: Odi kyɛ bɛpɛ ɛmɔ nu biala ye bienzua.

¹¹ Odi kyɛ ɛmɔpɛ ɛmɔ bienzua, na ɛhe yeɛ ɔkɔyɛ apam bɔ ɔwɔ me ne ɛmɔ afia ne nwo sɛngyerɛnneɛ ɔ.

¹²Na ɛmɔ aworɛ ndoatoasoɛ mukoraa nu, sɛ bienzua biala di ɛlɛbɔtwɛ a, odi kyɛ bɛpɛ ye bienzua. Yeɛ sɛ bɛwo kanganiɛ wɔ w’awuro, anaa ɛfale sikaa tɔle ye fili amanvraniɛ biala, bɔ nna wɔ nwoniɛ ahɔ berɛ a, odi kyɛ ɛpɛ ye bienzua.

¹³Sɛ bɛwole ye w’awuro oo, sɛ sikaa yeɛ ɛfa tɔle ye hɔ oo, odi kyɛ ɛpɛ ye bienzua. Na ɛhe kɔma m’apam ne kɔtena ɛmɔ nwonaen nu afebɔɔ.

¹⁴Na bienzua biala bɔ bambɛ ye bienzua nen, bɛkɔpɛ ye asue bekofi ye maen nu, ofikyɛ wabu m’apam ne aso.”

¹⁵Na Nyameɛ sele Abraham kyɛ, “Ɛye Sarae de, nnɛfrɛ ye Sarae ko, ye dumaa ole Sara.[16]

¹⁶Ngoyira ye, ná afei mamaa ɛne ye bawo bienzua. Ngoyira ye, na ɔkɔyɛ maen maen bɛ maame; na ye boso ama kɔyɛ ahemvo mɔ.”

¹⁷Afei Abraham fale ye nyunu butuli berɛ, na ɔserele, na ɔhane ye ye ti anu kyɛ, “Aso bienzua bɔ wali afoɛ ɛyaa kɔhora kɔwo baa? Sara bɔ wali afoɛ aburahona ye, aso ɔkɔhora kɔwo?”

¹⁸Na Abraham sele Nyameɛ kyɛ, “Sɛ ahaa ɛma Yismael sɔ wɔ nye a!”

¹⁹Nakoso Nyameɛ sele kyɛ, “Daabi, ɛye Sara kɔwo baa bienzua kɔma wɔ, na ɛkɔto ye dumaa Yisake.[17] Me ne ye yɛkɔyɛ m’apam maa ɔkɔyɛ apam afebɔɔ kɔma ye boso ama.

²⁰Yeɛ Yismael deɛ ne wora, mate bɔ aha ne; ngoyira ye, na mama ye boso ata, na basone pee. Ɔkɔwo atitirefoɛ buru ne nyɔ, na ngɔmaa ɔkɔyɛ maen piri.

²¹Nakoso m’apam ne de, Yisake bɔ afoɛ bieku bekye sɔa ala né ɛne Sara bawo ye ne, yeɛ me ne ye yɛkɔyɛ ɔ.”

²²Na Nyameɛ ne Abraham dwudwole yiele nen, Nyameɛ yakyili ye berɛ hɔle anwuro.

²³Na Abraham fale ɔwa Yismael, nganga mukoraa bɔ bɛwole bɛ wɔ ye awuro, ɔne bɛ bɔ ɔfale ye sikaa tɔle bɛ, ɔne bienzua biala bɔ ɔwɔ ye awuro, na ɔpɛle bɛ bienzua sɔ kyẽa ne kyɛbɔ Nyameɛ ha hyirele ye ne.

²⁴Bɛpɛle Abraham bienzua ɔ, né wali afoɛ aburahona ne ngona,

²⁵na ɔwa Yismael koso olili afoɛ buru ne nza nen yeɛ bɛpɛle ye bienzua ɔ.

²⁶Sɔ kyẽa ne, bɛpɛle Abraham ne ɔwa Yismael bɛ bienzua;

²⁷ye awuro mmienzua mukoraa, bɛ bɔ bɛwole bɛ wɔ ye awuro, ɔne bɛ bɔ ɔtɔle bɛ fili amanvrafoɛ berɛ koso bɛpepɛle bɛ bienzua bɛbokale ye so.