Read Sehwi Gyenesise 29 Bible Online

Gyenesise 29 - Sehwi bible

Gyenesise 29

¹Yakob toale ye ateetulɛ ne aso, na oodwuli eyia afiteleɛfoɛ nemɔ maen nu.

²Na ɔtole ye nye ne, onwuni abura bie wɔ eburo berɛ, na edwirɛ nwanwa ne mmoaen kure nza lela ye nwo ɔ, ofikyɛ sɔ abura ne anu yeɛ né bɛsa nzue bɛma ngaka nemɔ ɔ. Né nyɔboɛ bɔ ɔkata abura ne aso ne te piri.

³Yiti sɛ mmoaen ne amukoraa bɛ noa baboa berɛ a, mmoaenneafoɛ nemɔ muni nyɔboɛ ne befi abura ne anoa koraka né bama ngaka nemɔ nzue maa bano. Na sɛ beyie a, né basa bamunu nyɔboɛ ne bakata abura ne noa.

⁴Yakob bisale bɛ kyɛ, “Aliɛmaa mɔ, ɛmɔfi ni?” Na bebuale ye kyɛ, “Yɛfi Haran.”

⁵Yakob sá bisale bɛ kyɛ, “Aso ɛmɔse Nahɔ anomaa Laban. Na bebuale ye kyɛ, “Yoo, yɛse ye.”

⁶Yakob sá bisale bɛ kyɛ, “Ye nwo te paa?” Na besele ye kyɛ, “Yoo, ye nwo te paa. Nea ɔwa brasua Rahɛl po yeɛ ɔne mmoaen nemɔ ba ne.”

⁷Na Yakob sele kyɛ, “Ɔtɛte eyiagyina; mmerɛ bɔ bɛfa bɛboaboa ngaka nemɔ noa ne onnya oddwuli. Ɛ́mɔma bɛ nzue ma bɛ no na ɛ́mɔfa bɛ bɛhɔ adidie.”

⁸Nakoso besele ye kyɛ, “Daabi, yɛngɔhora ngɔyɔ ye sɔ. Sana bɛboaboa ngaka ne amukoraa noa ná yɛmunu nyɔboɛ ne yɛfi abura ne anoa koraka né yama ngaka nemɔ nzue.”

⁹Na Yakob noa wɔ so bɔ ɔne bɛ dwudwo ne, Rahɛl ne ɔse mmoaen ne wale, ofikyɛ ye yeɛ né ɔnea bɛ so ɔ.

¹⁰Yakob nwuni ye wɔfa Laban awa Rahɛl ɔne Laban mmoaen nen, ɔhɔle oomununi nyɔboɛ ne fili abura ne anoa, na ɔmane ye wɔfa Laban mmoaen nemɔ nzue.

¹¹Yakob fele Rahɛl noa, na ɔteateane nu osuni.

¹²Yakob sele Rahɛl kyɛ ɔte ɔse busuaniɛ, na Rebɛka awa ole ye. Na Rahɛl tuli amirika ɔbɔle ɔse amaneɛ.

¹³Laban tele ye awosea Yakob nga nen, ole amirika ooyiale ye, ɔtɔle ye nu, na ɔfele ye noa, na ɔfale ye wale ye awuro. Yakob fale edwirɛ ne amukoraa bɔle Laban amaneɛ,

¹⁴na Laban sele ye kyɛ, “Amba ɛte me dehyeɛ kaenn.” Na Yakob tenane Laban nwo berɛ ɛsraen ko.

¹⁵Yeɛ Laban sele Yakob kyɛ, “Ɛte me dehyeɛ ne ati, aso odi kyɛ ɛso me mbaen anaa? Ka kyire me, akatuaa sɛɛ yeɛ ekole ɔ?”

¹⁶Né Laban le mmaa mmrasua nyɔ; panyi ne li Lea, yeɛ kãa ne li Rahɛl.

¹⁷Lea nye mmaa te mmosonoo, nakoso Rahɛl de, né ye nwo yɛ nyemene, yeɛ ye nwo yɛ ahomeka.

¹⁸Né Yakob kuro Rahɛl, yiti ɔhane kyɛ, “Ɛwa kãa Rahɛl ti ngɔso wɔ afoɛ nzoo.”

¹⁹Laban sele kyɛ, “Ɔte paa kyɛ ngɔfa ye ngɔma wɔ tra kyɛ ngɔfa ye ngɔma biaa foforɛ ɔ; yiti ɛne me tena.”

²⁰Rahɛl ti, Yakob sole afoɛ nzoo, na ɔnate ehurolɛ bɔ né okuro ye ne ati, ɔyɛle ye nye so kyɛ ngyẽa kãa bie.

²¹Nziɛ ye Yakob sele Laban kyɛ, “Fa me ye ne ma me maa me ne ye yɛɛla, ofikyɛ mmerɛ bɔ mefa me so wɔ ne awa ayieleɛ.”

²²Yiti Laban tole ye sa frɛle kuro berɛ ama mukoraa, na ɔtole poen.

²³Nakoso aleɛ dwole ne, ɔfale ɔwa brasua Lea brɛle Yakob, na ɔne ye lale.

²⁴(Laban fale ye afaneɛ Silpa mane ɔwa Lea kyɛ ɔyɛ ye abaawa.)

²⁵Aleɛ hyene ne, Yakob kwaanea a, saa Lea mmom ɔ! Yiti obisale Laban kyɛ, “Nzikyɛ dwirɛ yeɛ afa ali me ye? Nna Rahɛl ti yeɛ nzole wɔ ɔ? Nzu ati yeɛ alakalaka me ye?”

²⁶Laban buale ye kyɛ, “Yɛ maen ye anu de yɛnyɔ ye sɔ; yɛmva baa kãa yɛmma agyaa koraka né yafa bamuɛbaa yama.

²⁷Ɛne ye beli atɔmvorɛ poentolɛ ɛlɛbɔtwɛ ne beyie. Ye si ye, yɛkɔfa ko ne koso yɛkɔma wɔ, na sana ɛso me afoɛ nzoo boka so.”

²⁸Yiti Yakob penene so, na ngyẽa ɛlɛbɔtwɛ ne sone ne, Laban fale ɔwa Rahɛl mane Yakob maa ogyale.

²⁹(Laban fale ye afaneɛ Bilha mane ɔwa Rahɛl kyɛ ɔyɛ ye abaawa).

³⁰Yiti Yakob ne Rahɛl koso lale; né okuro Rahɛl tra Lea, na osa sole Laban afoɛ nzoo bieku.

³¹AWURADE nwuni kyɛ Yakob nguro Lea, yiti ɔmane Lea wole mmaa, nakoso Rahɛl de ɔyɛle mmotaen.

³²Lea nwonzɛle, na ɔwole baa bienzua, na ɔtole ye dumaa Ruben.[37] Na ɔhane kyɛ, “AWURADE anwu m’amaneɛ bɔ méfa nu ne ati, kekesaala ye de me hu kohuro me.”

³³Ɔnwonzɛle bieku na ɔwole bienzua, na ɔhane kyɛ, “Ɔnate kyɛ AWURADE anwu kyɛ benguro me ne ati yeɛ watie me na wafa baa bienzua he koso wahyɛ me ɔ.” Na ɔtole ye dumaa Simeon.[38]

³⁴Osa nwonzɛle na ɔwole bienzua, na ɔhane kyɛ, “Afei de me hu kɔha kɔwa me nwo, ofikyɛ mawo mmaa mmienzua nza mama ye. Yiti ɔfrɛle ye Lewi.[39]

³⁵Osa nwonzɛle bieku na ɔwole bienzua, na ɔhane kyɛ, “Afei de ngɔye AWURADE ayɛ,” yiti ɔtole ye dumaa Yuda.[40] Na ye aworɛ te hɔle.