Read Sehwi Gyenesise 30 Bible Online

Gyenesise 30 - Sehwi bible

Gyenesise 30

¹Rahɛl nwuni kyɛ ɔne Yakob bɛnwo ne, ye nye borole oliɛma ne, na osele Yakob kyɛ, “Ɛne me wo mmaa, anyɔ sɔ a ngowu!”

²Na Yakob fɛle Rahɛl so yaa paa. Yiti obisale ye kyɛ, “Aso Nyameɛ bɔ wasi wɔ aworɛ nwo ate ne, me yeɛ ngyi ye gya nu anaa?”

³Na Rahɛl sele ye kyɛ, “M’afaneɛ Bilha ɛhe. Ɛne ye bɛla maa ɔwo to me gya so, amaa ɔnate ye so manya mmaa.”

⁴Yiti ɔfale ye afaneɛ Bilha mane Yakob maa ɔyɛle ɔye, na Yakob ne ye bɛlale.

⁵Bilha nwonzɛle, na ɔwole baa bienzua mane Yakob.

⁶Na Rahɛl hane kyɛ, “Nyameɛ ali me dwirɛ ama me. Watie me dwirɛ na wama me baa bienzua,” yiti ɔtole ye dumaa Dan.[41]

⁷Rahɛl afaneɛ Bilha nwonzɛle bieku, na ɔwole baa bienzua bɔ ɔtɔ so nyɔ ɔ mane Yakob.

⁸Na Rahɛl hane kyɛ, “Apereapereɛ yeɛ me ne nniɛma brasua ye yapere ɔ, na mali ye so ngonim.” Yiti ɔtole ye dumaa Nafetali.[42]

⁹Lea nwuni kyɛ ye aworɛ ate ahɔ nen, ɔfale ye afaneɛ Silpa mane Yakob maa ɔyɛle ɔye.

¹⁰Lea afaneɛ Silpa wole baa bienzua mane Yakob.

¹¹Na Lea sele kyɛ, “Me ti ayɛ paa.” Yiti ɔtole ye dumaa Gade.[43]

¹²Lea afaneɛ Silpa wole ɔwa bienzua bɔ ɔtɔ so nyɔ ɔ mane Yakob,

¹³na Lea hane kyɛ, “Me nye agye paa! Mmrasua kɔfrɛ me ‘bɔ ye nye agye ɔ’ ”. Yiti ɔtole ye dumaa Asɛ.[44]

¹⁴Mmerɛ bɔ atokoɔ telɛ dwuli ne, Ruben hɔle eburo, na ɔɔtetele nwonzɛenyire mmakaammaa, na ɔfa brɛle oni Lea. Yeɛ Rahɛl srɛle Lea kyɛ, “Mesrɛ wɔ, ma me ɛwa ne nwonzɛenyire bakaammaa ne bie.”

¹⁵Nakoso Lea bisale ye kyɛ, “Aso me hu bɔ ale ye ne, ɛhene angome anzo wɔ? Ɛpena kyɛ ede mma nwonzɛenyire mmakaammaa ne koso boka so?” Na Rahɛl sele kyɛ, “Nzaade maa ɔne wɔ bɛla ɛnɛ kɔngɔen ye na fa tua ɛwa ne nwonzɛenyire mmakaammaa ne kerɛ.”

¹⁶Yiti Yakob fili fieso wale nɔsoa nen, Lea ooyiale ye, na osele ye kyɛ, “Bra baala me berɛ, ofikyɛ mafa mma nwonzɛenyire mmakaammaa ne matua wɔ nnaa ne kerɛ. Na Yakob ne Lea bɛɛlale sɔ kɔngɔen ne.

¹⁷Nyameɛ tiele Lea, ɔnwonzɛle, na ɔne Yakob bɛwole ɔwa bienzua bɔ ɔtɔ so nnu ɔ.

¹⁸Lea sele kyɛ, “Nyameɛ afa m’akatuaa wama me, ofikyɛ mvale m’afaneɛ mane me hu.” Yiti ɔtole ye dumaa Yisaka.[45]

¹⁹Lea nwonzɛle bieku na ɔne Yakob bɛwole baa bienzua bɔ ɔtɔ so nzia ɔ.

²⁰Yeɛ Lea sele kyɛ, “Nyameɛ ahyɛ me akyɛdeɛ paa, afei de me hu kobu me bie, ofikyɛ mawo mmaa mmienzua nzia mama ye.” Yiti ɔtole ye dumaa Sebulɔn.[46]

²¹Ɛhe asi ne, ɔwole brasua, na ɔtole ye dumaa Dina.

²²Na Nyameɛ nwuni Rahɛl anwumvoin, otiele ye, na ɔmaa ɔhyɛle aworɛ bo.

²³Ɔnwonzɛle, ɔwole baa bienzua, na ɔhane kyɛ, “Nyameɛ akyikyi m’animguaseɛ”;

²⁴ɔtole ye dumaa Yosef,[47] na ɔhane kyɛ, “AWURADE, ma me baa bienzua bieku boka ɛhe aso!”

²⁵Rahɛl wole Yosef ne, ye si ye, Yakob sele Laban kyɛ, “Ma me ate maa ngɔ me kuro ne me maen nu.

²⁶Me ye mɔ bɔ bɛ ti yeɛ maso wɔ ne, fa bɛ ne me mma mɔ maa ngɔ; ofikyɛ wɔ bɔbɔ ɛse ɛsolɛ bɔ yeɛ maso wɔ ɔ.”

²⁷Nakoso Laban sele ye kyɛ, “Sɛ bɔ meka ye ekotie a, mafa abisa so manwu ye kyɛ wɔ ti AWURADE ayira me paa.

²⁸Ka akatuaa bɔ ekole ɔ, na ngotua.”

²⁹Yakob sele ye kyɛ, “Wɔ bɔbɔ deinn ɛse kyɛbɔ masi maso wɔ ɔ, ɔne kyɛbɔ wɔ nyɛmmoa asi ata wɔ me sa nu ɔ.

³⁰Mmmale ɛwa ne, né wɔ ngaka nemɔ anzo. Ɛnɛ nea bɛ somaa. AWURADE ayira wɔ nikyee biala bɔ mvale me sa nzɔle nu anwo. Na afei kyinzu yeɛ ngoli me bɔbɔ m’awuro so ɔ?”

³¹Laban bisale ye kyɛ, “Nzikyɛ yeɛ ede ɔ?” Na Yakob buale kyɛ, “Nnɛma me nikye fee; na mmom sɛ ɛkɔyɔ sɔ nikyee ye kɔma me a de a, ngɔhɔ so ngɔyɛne wɔ ngaka nemɔ na manea bɛ:

³²ɛnɛ kyẽa ye, maa mva wɔ mmoaen ne amu nu, na nyeye mmoaen bɔ bɛ nwo te kyerekyerɛɛ ne ndetaa ndetaa ɔne mmoaen mmaa bɔ bɛ nwo te bire, ɔne mbɔngye bɔ bɛ nwo te kyerekyerɛɛ ne ndetaa ndetaa; na sɔ ngaka nemɔ yeɛ bɛkɔyɛ m’akatuaa ɔ.

³³Yiti kyẽa bie sɛ ɛbaneanea m’akatuaa nu a, me nahorɛlilɛ kobua me be. Sɛ enwu abɔngye bɔ ye nwo ɔtte kyerekyerɛɛ anaa ndetaa ndetaa, anaakyɛ boaen ba bɔ ɔtte bire wɔ me deɛ nu a, bu sɔ kaka ne kyɛ mawua.”

³⁴Na Laban sele kyɛ, “Yoo, mede meto nu.”

³⁵Nakoso sɔ kyẽa ne ala, Laban yeyele mbɔngye nyii bɔ bɛ nwo te kyerekyerɛɛ ne ndetaa ndetaa ne, ɔne mbɔngye mmeleɛ bɔ bɛ nwo te kyerekyerɛɛ ne ndetaa ndetaa mukoraa, ɔne kaka biala bɔ fufue wɔ ye nwo, ɔne boaen ba biala bɔ ɔte bire, na ɔfale bɛ wurale ye mma mmienzua mɔ sa;

³⁶na ɔmane atee bɔ bɛfa ɛlɛsa yeɛ bɛpɛ ɔ lale ye ne Yakob b’afia, na Yakob hɔle so neane mmoaen ngaa nemɔ aso.

³⁷Yakob pepɛle tanure ne atonwaa ne ekue, na ɔwɔngyewɔngyele bɛ nwo boen maa ɔsesane nu, maa bɛ nwo fufue ne lale berɛ.

³⁸Ɔfale mmakaa bɔ wawɔngyewɔngye bɛ nwo ne guale nningyein bɔ ngaka nemɔ no nu nzue ne anwo. Né sɛ ngaka nemɔ ba kyɛ bɛbaano nzue a, berɛ yeɛ bɛfo bɛ nwo ɔ.

³⁹Ngaka nemɔ fole bɛ nwo wɔ nekaa bɔ mmakaa nemɔ gua ne, yiti bɛwole mmaa bɔ bɛ nwo te kyerekyerɛɛ, krukyerɛɛ ne ndetaa ndetaa ɔ.

⁴⁰Yakob yeyele mmoaen mmaa nemɔ siele ahameɛ, ɔmane bɛ ngaa ne fale bɛ nye hyirele Laban mmoaen bɔ bɛ nwo te krukyerɛɛ ɔne bɛ bɔ bɛ nwo te bire ne amukoraa. Yakob fale atee he aso siele ye ngaka deɛ mɔ wɔ nekaa foforɛ bɔ wamva bɛ wamvora Laban deɛ nu ɔ.

⁴¹Na sɛ ɔba ye kyɛ mmoaen bɔ bɛ nwo yɛ se ne bɛfo bɛ nwo a, né Yakob afa mmakaa ne agua nikyee bɔ bɛno nu nzue ne anu, kyɛbɔ ngaka nemɔ konwu mmakaa nemɔ ɔ, amaa ngaka nemɔ afo bɛ nwo wɔ nekaa bɔ mmakaa nemɔ gua ne.

⁴²Nakoso ngaka nemɔ bɔ bɛ nwo nyɛ se ne de, ɔmva mmakaa ne ngua berɛ. Ye sɔ ne ati, bɛ bɔ bɛ nwo nyɛ se ne yɛle Laban deɛ maa bɛ bɔ bɛ nwo yɛ se ne yɛle Yakob deɛ.

⁴³Ɔmaa Yakob nyane ye nwo tam; onyane mmoaen pee, ngoaa ne afaneɛ mɔ, afupɔngɔ ne afunum pee.