Read Sehwi Gyenesise 31 Bible Online

Gyenesise 31 - Sehwi bible

Gyenesise 31

¹Yakob tele kyɛ Laban mma mmienzua nemɔ kekã kyɛ, “Yakob afa yɛ baba nningyein mukoraa; yɛ baba nwo yeɛ wafa wanya sɔ agyapadeɛ ye amu ɔ.”

²Onwuni kyɛ Laban olle ye nwo adwene paa kyɛ daa ne ko.

³Na AWURADE sele Yakob kyɛ, “Sá kɔ wɔ nana mɔ maen nu ne w’abusua nu, na ngogyina wɔ si.”

⁴Yiti Yakob somane maa bɛɛfrɛle Rahɛl ne Lea bɛbrɛle ye wɔ eburo dɔ nekaa bɔ né ye nyɛmmoa nemɔ wɔ ne,

⁵na osele bɛ kyɛ, “Manwu ye kyɛ ɛmɔ ase ɔne me y’asetena ne anu ɔnyɛ nyemene kyɛ daa ne ko, nakoso me nana mɔ Nyameɛ ne agyina me si.

⁶Ɛmɔse ye kyɛ mafia me kunu mafa m’anwoserɛ amu maso ɛmɔ ase.

⁷Nakoso ɛmɔ ase asisi me. Wasesã m’akatuaa sɔ alaa buru mumua, nakoso Nyameɛ amma ye ate maa wambura me.

⁸Sɛ ɔka kyɛ, ‘W’akatuaa kɔyɛ ngaka bɔ bɛ nwo te ndetaa ndetaa ne’ a, né ngaka ne amu bawo anwo ndetaa ndetaa. Yeɛ sɛ ɔka kyɛ w’akatuaa kɔyɛ ngaka bɛ nwo te kyerekyerɛɛ ne a, né ngaka ne amu bawo anwo kyerekyerɛɛ.

⁹Sɔ atee he aso yeɛ Nyameɛ nate wale ɛmɔ baba ngaka kure ne wafi ye sa nu na wafa wama me ye.

¹⁰Mmerɛ bɔ ngaka nemɔ sɔle ne, ngyene laleɛ. Laleɛ ne anu, mbagyale me ti, na nwuni kyɛ mbɔngye nyii bɔ bɛ́fo mmeleɛ nemɔ ne, bɛ nwo te kyerekyerɛɛ ne ndetaa ndetaa ne nworonworaen.

¹¹Laleɛ ne anu, Nyameɛ abɔfo frɛle me kyɛ, ‘Yakob.’ Na nzurole kyɛ, ‘Me ɛhe!’

¹²Osele me kyɛ, ‘Pagya wɔ ti na nea: ngaka nyii bɔ bɛ́fo mmeleɛ ne amukoraa bɛ nwo te kyerekyerɛɛ, ndetaa ndetaa ne nworonworaen; ofikyɛ me nye tua bɔ Laban ɔ́fa di wɔ ne amu.

¹³ Me ole Betel Nyameɛ, nekaa bɔ yeɛ ehwiele ngoo guale ngayeɛ nyɔboɛ so na ɛhyɛle me bɔ ne. Afei dwɔso na fi sɔ maen ye anu na sá kɔ aseɛ bɔ yeɛ bɛpɛle wɔ kotoa wɔ so ne aso.’ ”

¹⁴Yeɛ Rahɛl ne Lea buale ye kyɛ, “Aso nikyee anaa agyapadeɛ bie tɛ wɔ berɛ ma yɛ wɔ yɛ se awuro?

¹⁵Aso ommu yɛ amanvrafoɛ? Wayɛ yɛ atɔen, na ódi yɛ ti sikaa ne.

¹⁶Agyapadeɛ bɔ Nyameɛ ale afi yɛ baba sa nu ne amukoraa te yɛ ne yɛ mma deɛ. Yiti afei de, yɔ bɔ Nyameɛ aha ahyire wɔ biala.”

¹⁷Na Yakob dwɔsole fale ye mma mɔ ne ɔye mɔ tenatenane afupɔngɔ so.

¹⁸Ɔhane ye nyɛmmoa amukoraa lili ye nyunu, ɔsesale ye agyapadeɛ ne ye ngaka bɔ onyane ye wɔ Padan Aram amukoraati, na ɔfale ye nye hyirele Kanaan aseɛ so kyɛ ɔ́kɔ ɔse Yisake dɔ.

¹⁹Né Laban ahɔ kyɛ ɔkwaapepɛ ye mmoaen nwo nwiaa, na Rahɛl wuale ɔse awuro mmosoen.

²⁰Na Yakob feale ye nwo nwatili fili Aramniɛ Laban berɛ, ofikyɛ wammɔ ye amaneɛ kyɛ ofi berɛ kɔ ye kuro.

²¹Ɔsesale ye bɔbɔ ye nwo nningyein amukoraa nwatili, ɔpɛle asue Yufreti, na ɔfale ye nye hyirele Gileade mmokaa aseɛ ne aso.

²²Ye ɛlɛsa ne aso, bɛbɔle Laban amaneɛ kyɛ Yakob anwati,

²³yiti ɔfale ye awuro ama bokale ye nwo so, na ɔpole Yakob so alaa ɛlɛsoo, maa oodwuli kyɛ opingyele Yakob wɔ Gileade mmokaa aseɛ ne aso ɔ.

²⁴Nakoso Nyameɛ yele ye nwo ali hyirele Aramniɛ Laban kɔngɔen ne wɔ laleɛ nu, na ɔkanzole ye kyɛ, “Nea yé né anga edwirɛ biala, paa anaakyɛ tɛɛ angyire Yakob.”

²⁵Laban ɔɔtole Yakob. Né Yakob asi ye ɛtena sua wɔ mmokaa aseɛ ne aso. Na Laban ne ye mmenia koso sili bɛ deɛ wɔ Gileade mmokaa aseɛ ne aso.

²⁶Na Laban bisale Yakob kyɛ, “Nzikyɛ nikye yeɛ ayɔ ye, bɔ alakalaka me na asesa me mma mmrasua mɔ anwati kyɛ mmenia bɔ bele ngrandɛ bahye bɛ nnure ye?

²⁷Nzu ati yeɛ ɛyɛle kudɛɛ nwatili na ɛlakalakale me ɔ? Nzu ati yeɛ ammɔ me amaneɛ maa mamva anigye ne edwein ne akasaa ne sangoo mangua wɔ ate ɔ?

²⁸Na nzu ati yeɛ amma mamve me nnomaa ne me mma mɔ noa, na me ne bɛ yanni ngraa ɔ? Ali ngwaseasɛm!

²⁹Ahaa nne ye nwo ate kyɛ me ne ɛmɔ di ye weewee, nakoso wɔ baba ye Nyameɛ ɔne me dwudwole ɛnɛ kɔngɔen kyɛ, ‘Nea yé né anga edwirɛ biala, paa anaakyɛ tɛɛ angyire Yakob.’

³⁰Kekesaala ye de, wɔ wora adɔ ɛse awuro ti yeɛ ɛkɔ ɔ, na nzu ati yeɛ ewuale me mmosoen ɔ?”

³¹Na Yakob buale Laban kyɛ, “Né mesuro, ofikyɛ né medwene kyɛ ɛkɔhyɛ me kole wɔ mma mmrasua nemɔ kofi me sa nu.

³²Wɔ mmosoen nemɔ de, ebiala bɔ ekonwu bɛ wɔ ye dɔ ne, odi kyɛ beku ye ɔ. Y’eliɛma ye mɔ anyunu wa ala, neanea me nningyein nu nea sɛ wɔ nikyee bie wɔ nu a, ye.” Né Yakob nze kyɛ Rahɛl awua mmosoen ne ɔ.

³³Yiti Laban hɔle Yakob ɛtena sua nu, Lea ɛtena sua nu, ɔne afaneɛ nyɔ nemɔ deɛ nu (ɔɔpenane mmosoen nemɔ) nakoso wannwu bɛ. Na ofili Lea ɛtena sua ne anu oowurale Rahɛl deɛ nu.

³⁴Né Rahɛl asesa awuro mmosoen ne wafea afupɔngɔ so atɛ ne anu watena so. Laban tuli ɛtena sua ne anu nningyein amu, nakoso wannwu bɛ.

³⁵Na Rahɛl sele ɔse kyɛ, “Nnɛma me mene fɛ ɛyaa kyɛ mengɔhora dwɔso wɔ wɔ nyunu ɔ, ofikyɛ mabu me sa.” Yiti Laban hɔle so penane, nakoso wannwu ye awuro mmosoen nemɔ.

³⁶Yiti Yakob fɛle ɛyaa, na ɔbɔle Laban kwaadu kyɛ, “Me mvomsoɛ ole sɛɛ? Ɛtɛɛ beni yeɛ mayɔ bɔ yeɛ egu me so anyeborolɛ so sɔa ye?

³⁷Aso etuli me nningyein amukoraati ne, enwuni w’awuro nikyee bie wɔ nu? Sɛ anwu bie a, fa baato nniɛma mɔ ne eliɛma ye mɔ anyunu wa maa bebua yɛ munyɔ y’afia ndɛen.

³⁸Afoɛ aburanyɔ ye bɔ me ne wɔ yɛtenane ye, wɔ mmoaen ne wɔ mbɔngye annwonzɛ maa wanye wandɔ le, na mangu wɔ mmoaen kure ne anu boaen nyii biala manni.

³⁹Bɛ bɔ ngaka aboyaa huni bɛ ne po, mamva mammrɛ wɔ, na mmom mmaa ɔyɛle me kerɛ. Na bɛ bɔ bewuale bɛ eyia anaa kɔngɔen ne wora, ɛmaa nduale ye kerɛ.

⁴⁰Tebea he yeɛ mvale nu ɔ: eyia yerale me, na ɛyerɛ koso huni me, na mannya nnaa kaala manna.

⁴¹Sɔ afoɛ aburanyɔ bɔ nnili wɔ w’awuro berɛ ye, wɔ mma mmrasua ne ati nzole wɔ afoɛ buru ne nna, yeɛ wɔ mmoaen ne ati nzole wɔ afoɛ nzia. Ɛsesane m’akatuaa sɔ alaa buru mumua.

⁴²Me baba ye Nyameɛ bɔ yeɛ ɔte Abraham ye Nyameɛ, na osa te Nyameɛ bɔ Yisake suro ye ne, sɛ wangyina me si a, ahaa ɛmaa mvale nzanza ngɔle. Na Nyameɛ nwuni m’ateetee ne me fɛɛ, yiti yeɛ ɔmaa ɔhane wɔ nyunu anoma kɔngɔen ne.”

⁴³Na Laban buale Yakob kyɛ, “Ndaluwa ye mɔ, me bɔbɔ me mma ɔ, ngwadaa ye mɔ koso, me bɔbɔ me nnomaa ɔ, na ngaka kure ne ɔne bɔ wɔ nye tua ye amu, me deɛ ɔ. Nakoso me mma mmrasua anaakyɛ bɛ mma bɔ bawo bɛ ye, nzikyɛ yeɛ ngɔhora ngɔyɔ ngɔfa bɛ nwo ɛnɛ ɔ?

⁴⁴Afei bra maa yɛyɛ apam, na ɔyɛ adanzeɛ la me ne wɔ y’afia.”

⁴⁵Yiti Yakob fale nyɔboɛ penane berɛ yɛle ngayeɛ nyɔboɛ wɔ berɛ.

⁴⁶Yakob sele ye mmenia ne kyɛ, “Ɛ́mɔboaboa nyɔboɛ noa.” Yiti bɛboale nyɔboɛ noa maa ɔyɛle kure, ne bɛtenane nyɔboɛ kure ne anwo berɛ bedidili.

⁴⁷Laban frɛle nyɔboɛ kure ne Yega Sahaduta,[48] yeɛ Yakob wora ɔfrɛle ye Galeede.[49]

⁴⁸Na Laban hane kyɛ, “Sɔ nyɔboɛ kure ye te me ne wɔ afia adanzeɛ ɛnɛ.” Yiti yeɛ ɔmaa bɛfrɛle berɛ Galeede ɔ.

⁴⁹Na osa frɛle berɛ Misepa,[50] ofikyɛ ɔhane kyɛ, “Sɛ yɛpakyepakye nu a, AWURADE osisa yɛ munyɔ.

⁵⁰Sɛ ɛteetee me mma mmrasua nemɔ, anaa sɛ egya braa foforɛ boka me mma nemɔ aso a, ɔwɔ nu kyɛ sona biala ɔbboka yɛ so wɔ ɛwa de, nakoso kaye kyɛ Nyameɛ yeɛ ɔte yɛ munyɔ y’afia danzeniɛ ɔ.”

⁵¹Na Laban sá sele Yakob kyɛ, “Nea nyɔboɛ kure he ne ngayeɛ nyɔboɛ he bɔ mafa magyina me ne wɔ y’afia ye.

⁵²Nyɔboɛ kure he te adanzeɛ, yeɛ ngayeɛ nyɔboɛ ye koso te adanzeɛ kyɛ mengɔtra sɔ nyɔboɛ kure he mengɔwa wɔ so mengɔyɔ wɔ hwee, na wɔ koso ɛngɔtra sɔ nyɔboɛ kure ye ne ngayeɛ nyɔboɛ ye ɛngɔwa me so na ɛngɔyɔ me hwee.

⁵³Abraham Nyameɛ bɔ ɔte Nahɔ Nyameɛ na osa te bɛ baba Nyameɛ ne, óbua me ne wɔ y’afia ndɛen.” Yiti Yakob fale Nyameɛ bɔ ɔse Yisake suro ye ne tale ndaen.

⁵⁴Na Yakob bɔle afɔleɛ wɔ bokaa ne aso, na ɔfrɛle ye mmenia kyɛ beedidi; bedidili na bɛbɔle asiripɛ wɔ mmokaa aseɛ ne aso.

⁵⁵Laban dwɔsole ngyerɛmɔ tutututu, ɔfele ye nnomaa mɔ ne ye mma mmrasua nemɔ noa, na oyirale bɛ. Na osili nu hɔle ye kuro.