Read Sehwi Gyenesise 32 Bible Online

Gyenesise 32 - Sehwi bible

Gyenesise 32

¹Yakob sili nu toale ye ateetulɛ ne aso, na Nyameɛ abɔfo mɔ yiale ye.

²Na Yakob nwuni bɛ ne, osele kyɛ, “Nyameɛ asraafoɛ mɔ ɛhe!” Yiti ɔtole berɛ dumaa Mahanaim.[51]

³Yakob tuli ɛbɔfoɛ maa belili ye nyunu bɛhɔle oliɛma Yisɔ berɛ wɔ Sɛre aseɛ so, Edom maen nu,

⁴na ɔhyɛle bɛ kyɛ, “Ɛmɔɔse me mene Yisɔ kyɛ, “W’akoaa Yakob nwa: ‘Ngɔndenane Laban berɛ, na matena berɛ maa waadwu sɔ mmerɛ ye.

⁵Kekesaala ye manya nandwie mɔ, afunum mɔ, mmoaen, ngoaa ne afaneɛ mɔ; na masoma kyɛ bɛɛbɔ me mene amaneɛ maa ole me ɔto nu.’ ”

⁶Ɛbɔfoɛ nemɔ sá wale Yakob berɛ, na beesele ye kyɛ, “Yɛhɔle yɛɛtole eliɛma Yisɔ, na ɔbaayia wɔ; mmienzua ɛyaa nna boka ye so.”

⁷Edwirɛ ne mane ɛserɛ piri hane Yakob; ɔhyɛle mmenia bɔ né bɛboka ye so ne anu nyɔ, ɔne mmoaen ne nandwie ne mbɔngɔ mɔ koso nu kure nyɔ.

⁸Né ɔdwene kyɛ, “Sɛ Yisɔ ba kuku kure ko ná ɔdwerɛm bɛ a, kure ko bɔ waha ne, bekonya atee bɛkɔnwati.”

⁹Na Yakob bɔle mbaeɛ kyɛ, “O me nana Abraham Nyameɛ bɔ ɛte me baba Yisake Nyameɛ, O AWURADE bɔ esele me kyɛ, ‘Sá kɔ wɔ maen nu ne wɔ mmenia berɛ, na ngogyina wɔ si’ ɔ,

¹⁰memvata ɔdɔ kandinga ne nahorɛlilɛ pee bɔ afa alo w’akoaa ne anu kaala po, ofikyɛ mmerɛ bɔ né mépɛ asue Yɔɔdan ne, né nnne hwee kyɛ me pɔmaa ye angome; nakoso kekesaala ye de, me boso atrɛ maa manya mmeni kure nyɔ.

¹¹Mesrɛ wɔ, de me fi nniɛma Yisɔ sa nu, ofikyɛ me suro ye; anyɔ a, né waahũhũ yɛ mukoraa: niɛ mɔ ne mmaa mɔ.

¹² Nakoso aha kyɛ, ‘Ngogyina wɔ si, na ngɔma wɔ bosofoɛ kɔsone kyɛ mboanoa anweaa bɔ bɛngora ye ka ɔ.’ ”

¹³Yiti ɔlale berɛ sɔ kɔngɔen ne, na ɔneaneane ye agyapadeɛ nu penane akyɛdeɛ mane oliɛma Yisɔ:

¹⁴ɔyeyele mbɔngye mmeleɛ ɛyaa nyɔ ne mbɔngye nyii aburanyɔ, mmoaen mmeleɛ ɛyaa nyɔ ne mmoaen nyii aburanyɔ,

¹⁵afupɔngɔ bɔ bɛma mmaa nyɔfone ɔ aburasa, ɔne bɛ mma, nandwie mmeleɛ aburanna ne nandwie nyii buru, yeɛ afunum mmeleɛ aburanyɔ ne afunum nyii aburanyɔ.

¹⁶Na ɔfa wurale ye ngoaa mɔ sa. Né kure biala akoaa ko yeɛ ɔla ye noa ɔ, na osele ngoaa nemɔ kyɛ, “Ɛ́mɔse beli me nyunu na ɛ́mɔma atee lela kure ne kure afia.”

¹⁷Ɔhyɛle bɔ oli anyunu paa ne kyɛ, “Sɛ nniɛma Yisɔ yia wɔ na obisa wɔ kyɛ, ‘Nwa akoaa yeɛ ole wɔ? Ɛkɔ ni? Na ɛhemɔ bɔ beli wɔ nyunu ye nwa deɛ ɔ?’ a,

¹⁸se ye kyɛ, “W’akoaa Yakob deɛ ɔ; ɔte akyɛdeɛ bɔ wasoma kyɛ yɛfa yɛbrɛ me mene Yisɔ ɔ. Ye bɔbɔ po oli yɛ si.”

¹⁹Sɔ ala yeɛ ɔha hyirele kure bɔ ɔtɔ so nyɔ ne bɔ ɔtɔ so nza ne bɛ bɔ beli ngaka kure ne asi amukoraa kyɛ, “Sɛ ɛmɔyia Yisɔ a, ɛmɔ koso ɛ́mɔhã sɔ ala,

²⁰na ɛmɔhã behyire ye kyɛ, ‘Asa koso, w’akoaa Yakob li yɛ si.’ ” Osusuli kyɛ, “Ngɔfa akyɛdeɛ bɔ wali me nyunu moa ye ngɔpata ye, na sɛ nziɛ ye me ne ye yɛyia a, mede medi kyɛ okole me kɔto nu.”

²¹Yiti akyɛdeɛ ne lili Yakob nyunu moa hɔle, na ye bɔbɔ de ɔlale asikyeleɛ ne anu berɛ maa aleɛ hyene.

²²Sɔ kɔngɔen ne ala, Yakob dwɔsole, na ɔfale ɔye nemɔ amunyɔ, ye afaneɛ nyɔ nemɔ ɔne ye mma buru ne ko ne, na ɔfale bɛ pɛle asue Yabɔko wɔ ye apɛleɛ so.

²³Ɔfale bɛ ne ye nningyein amukoraa pɛle asue ne.

²⁴ Ɔhale Yakob ngome né, biaa bie ne ye besuale ngɔtɔfaen maa aleɛ hyene.

²⁵Na biaa ne nwuni ye kyɛ ɔngora nni Yakob so ngonim ne, ɔbɔle Yakob taku so, na Yakob dwongu fandili wɔ ngɔtɔfaen ne anu.

²⁶Na osele kyɛ, “Yakyi me maa ngɔ na aleɛ ɔ́kye.” Nakoso Yakob buale kyɛ, “Mengɔma ɛngɔhɔ, sana eyira me koraka.”

²⁷Na obisale ye kyɛ, “Bɛfrɛ wɔ sɛ?” Na obuale kyɛ, “Yakob.”

²⁸ Na osele Yakob kyɛ, “Bɛngɔfrɛ wɔ Yakob ko, na mmom Yisrael,[52] ofikyɛ ɛne Nyameɛ ne mmenia apereapereɛ so, na ali ngonim.”

²⁹ Yeɛ Yakob sele ye kyɛ, “Mesrɛ wɔ, bɔ wɔ dumaa kyire me.” Na Biaa ne buale kyɛ, “Nzu ati yeɛ ebisa me dumaa ɔ?” Na oyirale Yakob wɔ berɛ.

³⁰Yiti Yakob frɛle berɛ Peniɛl,[53] ofikyɛ ɔnwa, “Me nye abɔ Nyameɛ nyunu, nakoso me ngoa tɛ tira me.”

³¹Mmerɛ bɔ ɔ́pɛ nu wɔ Penuel ne, né eyia afite, na ɔnate ye dwongu bɔ né wafandi ne ati, né ɔtɔ gua so.

³²Yiti ɔbaadwu ɛnɛ ye, Yisraelfoɛ nni ndii bɔ ɔsɔ adwonguɛ so ne, ofikyɛ abɔfo ne bɔle Yakob taku so ndii so.