Read Sehwi Gyenesise 37 Bible Online

Gyenesise 37 - Sehwi bible

Gyenesise 37

¹Yakob tenane Kanaan, aseɛ bɔ né ɔse te so ɛwɔfoɛ ne aso.

²Yakob abusua nwo dwirɛ ɛhe: Yosef lili afoɛ buru ne nzoo ne, né ɔne oliɛma mmienzua mɔ bɛ́fa mmoaen bɛkɔ adidie. Né ɔte abɛɛmaa bɔ ɔne ɔse aye mɔ Bilha ne Silpa mma mɔ yeɛ bɛyɔ sɔ adwuma ne ɔ. Na Yosef fale edwirɛ tɛɛ bɔ oliɛma nemɔ ali ne nwo amaneɛ ɔɔbɔle ye baba.

³Né Yisrael kuro Yosef dwirɛ tra ye mma mɔ ngaa ne amu, ofikyɛ ɔte ye nworowaa nu ba. Yiti ɔpale ataadeɛ tendenn bie mane ye.

⁴Na oliɛma mmienzua nemɔ nwuni kyɛ bɛ baba kuro Yosef dwirɛ tra bɛ mu nen, bɛpɔle ye, yiti né bɛ ne ye dwudwo ɛyaa so.

⁵Ɛlɛho bie, Yosef hyene laleɛ, na ɔhane laleɛ ne hyirele oliɛma nemɔ nen, bɛpɔle ye bɛtrale daa ne po.

⁶Osele bɛ kyɛ, “Ɛ́mɔtie laleɛ bɔ mahye ɔ:

⁷“Né yɛkyekye ɛmo tire tire wɔ fieso, na mvum nu, me mo tire bɔ makyekye ne dwɔsole gyinane kyirebeinn, na ɛmɔ mo tire deɛ nemɔ pɛle me deɛ ne anwo beyiale, na bɛkotole ye.”

⁸Na oliɛma nemɔ bisale ye kyɛ, “Ɛpena kyire kyɛ ɛbaayɛ yɛ so hene anaa? Anaakyɛ ɛbaali yɛ so tumi anaa?” Na ye laleɛ ɔne ye noa dwirɛ ne mane oliɛma nemɔ hɔle so bɛpɔle ye kɔkɔkɔkɔ.

⁹Yosef hyene laleɛ bieku, na ɔbɔle oliɛma nemɔ amaneɛ kyɛ, “Ɛ́mɔtie, mahye laleɛ bieku, na nwuni kyɛ eyia, ɛsraen ne nzramaa buru ne ko bɛkoto me.”

¹⁰Nakoso Yosef hane ɛhe hyirele ye baba ne oliɛma mmienzua nemɔ nen, ye baba teateane ye, na osele ye kyɛ, “Nzikyɛ laleɛ yeɛ ahye ye? Ekyire kyɛ me ne eni ne eliɛma mmienzua mɔ kɔɔkoto wɔ nyunu anaa?”

¹¹ Yosef aliɛma nemɔ nye borole ye, nakoso ɔse de ɔfale edwirɛ nemɔ siele ye ti anu.

¹²Ɛlɛho bie, oliɛma mmienzua nemɔ fale bɛ se mmoaen ne bɛhɔle adidie wɔ Sɛkem.

¹³Yeɛ Yisrael sele Yosef kyɛ, “Eliɛma nemɔ afa mmoaen bahɔ adidie wɔ Sɛkem, yiti bra maa nzoma wɔ bɛ berɛ.” Yosef sele ye kyɛ, “Me ɛhe.”

¹⁴Na Yakob sele ye kyɛ, “Kɔnea sɛ eliɛma nemɔ ne mmoaen ne bɛ nwo te paa a, na sá bra baabɔ me amaneɛ.” Yiti ɔsomane ye fili Hebron bɔnza ne anu maa ɔhɔle Sɛkem.

¹⁵Biaa bie nwuni kyɛ Yosef amini na ɔpɛ ye nwo wɔ porɛ ne anu nen, obisale ye kyɛ, “Nzikyɛ yeɛ ɛpena ɔ?”

¹⁶Na Yosef buale kyɛ, “Mepena nniɛma mmienzua mɔ. Mesrɛ wɔ, kyire me nekaa bɔ bafa mmoaen bahɔ adidie ne.”

¹⁷Biaa ne buale kyɛ, “Bafi wa bahɔ moa paa, ofikyɛ ndele kyɛ né bɛkeka kyɛ, ‘Ɛ́mɔma yɛhɔ Dotan.’ ” Yiti Yosef pole oliɛma nemɔ aso, na oonwuni bɛ wɔ Dotan.

¹⁸Oliɛma nemɔ nwuni ye wɔ nziɛ nziɛ kyɛ ɔba ɔ, na anzana ɔbaadwu bɛ nwo berɛ ne, bɛbɔle ye nwo porɛ kyɛ bekohu ye.

¹⁹Besisele bɛ nwo kyɛ, “Laleɛhyenɛniɛ ne yeɛ ɔ́ba ne!

²⁰Ɛmɔma yɛhu ye ná yɛgyi ye yɛto ngono ne ko anu; yɛkɔɔha kyɛ kaka aboyaa bie ahye ye ali, ná yanea sɛ ye laleɛ nemɔ kɔwa nu a.

²¹Nakoso Ruben tele ne, ɔpepɛ lele ye, na ɔhane kyɛ, “Nnɛmɔmaa yɛku ye.”

²²Ruben sele bɛ kyɛ, “Nnɛma ɛmɔkã mogya begua, ɛ́mɔgyi ye bɛ́to kumaa ye anu ɛserɛ ye aso wa, na mmom nnɛma ebiala fa ye sa ka ye.” Né wayɛ ye adwene kyɛ ode ye fi bɛ sa nu na ɔfa ye sa kɔma ye baba.

²³Yiti Yosef oodwuli oliɛma nemɔ anwo berɛ ne, bepurole ye ataadeɛ tendenn bɔ owura ye ne,

²⁴na bɛsɔle ye nu begyili ye bɛtole abura bie anu. Né sɔ abura ne anu te wosee.

²⁵Ye si ye, bɛtenane ase kyɛ bedidi. Na bɛmane bɛ ti so ne, benwuni Yismaelfoɛ dwadifoɛ bɔ bɛtete afupɔngɔ so, bɔ befi Gileade bɛ́kɔ Misraim ɔ. Né b’afupɔngɔ mɔ bɛsoso pɔweɛ, sakyeɛ ne asãa.

²⁶Yeɛ Yuda sele oliɛma nemɔ kyɛ, “Mvasoɛ beni yeɛ ɔwɔ so kyɛ yɛkohu y’eliɛma bienzua na yɛkɔkata ye mogya so ɔ?”

²⁷Ɛ́mɔma yɛ́yɛ ye atɔen yɛ́ma Yismaelfoɛ ne. Nnɛmɔmaa yɛfa yɛ sa yɛkã ye, ofikyɛ ɔte y’eliɛma ne yɛ bɔbɔ yɛ deɛ.” Na oliɛma nemɔ penene so.

²⁸ Né Midianfoɛ dwadifoɛ biemɔ bɛbaase. Yosef aliɛma nemɔ yele ye befili abura ne anu, na bɛtɔnene ye ɛdwetɛ kilo ko bɔ bahyɛ nu nnu bɛmane Yismaelfoɛ nemɔ maa bɛfale ye bɛhɔle Misraim.

²⁹Ruben sa wale abura ne anwo, na onwuni kyɛ Yosef nne nu ne, osunzuale ye ndaadeɛ nu;

³⁰osa wale oliɛma nemɔ berɛ, na oosele kyɛ, “Abɛɛmaa ne nne berɛ, na nyɔ me nwo sɛ?”

³¹Na bɛfale Yosef ataadeɛ ne, behuni abɔngye, na bɛfale ataadeɛ ne bɛfɔlefɔlele ye mogya ne.

³²Bɛfale ataadeɛ tendenn ne bɛbrɛle bɛ baba, na besele kyɛ, “Nea ataadeɛ bie bɔ yanwu ye ɔ, sɛ ɛwa ne deɛ ne ahɔ a.”

³³Ɔneane, na ɔhane kyɛ, “Mma ne deɛ ne ɔ. Kaka aboyaa bie ahye ye ali. Aporowaa biala nne ye nwo kyɛ watete Yosef nu pasaa.”

³⁴Yiti Yakob sunzuale ye ndaadeɛ nu, ɔfale ɛsɛen tena pɛle ye bo, na olili ɔwa ne wue nwo aworabɔlɛ ngyẽa pee.

³⁵Na ye mma mmienzua mukoraa ne ye mma mmrasua mukoraa bɔle mmɔden kyɛ bɛkɔkyekye ye wora, nakoso wambene. Yakob sele kyɛ, “Méfa aworabɔlɛ mépo mma ne wɔ ɛborɔ.” Na ye baba suni ye paa.

³⁶Midianfoɛ nemɔ tɔnene ye wɔ Misraim bɛmane Faro ye panyi ko bɔ bɛfrɛ ye Pɔtifa. Né ɔte ye angɔbeahene.