Read Sehwi Gyenesise 39 Bible Online

Gyenesise 39 - Sehwi bible

Gyenesise 39

¹ Yismaelfoɛ nemɔ fale Yosef bɛhɔle Misraim. Na Faro ye panyi ko bɔ bɛfrɛ ye Pɔtifa, bɔ ɔte Misraimniɛ na osa te ye angɔbeahene ne, ɔtɔle ye fili Yismaelfoɛ nemɔ berɛ.

² Na AWURADE gyinane Yosef si, maa ɔɔyɛle sona bɔ ye nwo ba mvorɛ ɔ, na ɔtenane ye mene Misraimniɛ n’awuro.

³Na ye mene nwuni kyɛ AWURADE gyi ye si, na AWURADE sá ma nikyee biala bɔ ɔyɔ yɛ yee.

⁴Yosef sɔle ye mene nye. Ɔsole ye, na biaa ne fale ye tuale ye awuro ne anoa, na ɔfale bɔ ole ye amukoraa wurale ye sa.

⁵Ofi mmerɛ bɔ ɔfale ye tuale ye awuro noa, na ɔfale bɔ ole ye amu wurale ye sa ne, Yosef ti, AWURADE yirale Misraimniɛ n’awuro ama, na AWURADE saleɛ wale bɔ ole ye amukoraa so, wɔ awuro ne fieso.

⁶Yiti ɔfale ye nningyein amukoraati wurale Yosef sa. Na ɔnate kyɛ Yosef wɔ berɛ ne ati, né ɔnha ye nwo wɔ nikye fee nwo, sana aleɛ bɔ okoli angome. Né Yosef nwo yɛ nyemene na ɔbɔ pe.

⁷Mmerɛ bie asi ne, Yosef ye mene aye tuli ye nye siele ye so, na ɔhane kyɛ, “Ɛne me la.”

⁸Nakoso Yosef ambene, na osele ye mene aye ne kyɛ, “Eh, ɔnate me bɔ nwɔ wa ne ati, me mene ɔnha ye nwo wɔ awuro wa nikyee biala nwo; wafa ye nningyein amukoraati wawura me sa.

⁹Awuro wa de, ebiala nni mu ndra me, yeɛ ɔmva hwee mmɔ me aheɛ, sana wɔ ngome, ofikyɛ ɔye ole wɔ. Nzu ati yeɛ nyɔ sɔ amumuyɛɛ piri ye na nyɔ bɔne ndia Nyameɛ ɔ?”

¹⁰Ɔwɔ nu kyɛ daa biala né ɔka sɔ dwirɛ ne kyire Yosef de, nakoso Yosef ambene so ɔne ye banna anaakyɛ wanga wangɔ ye nwo.

¹¹Ɛlɛho bie, Yosef hɔle awuro berɛ kyɛ ɔkwaayɔ ye adwuma, na né sona fee nne awuro berɛ.

¹²Braa ne sɔle Yosef ataadeɛ nu hyɛle ye kyɛ, “Ɛne me la!” Nakoso ofotili, na ɔyakyili ye ataadeɛ ne wɔ braa ne sa nu nwatili fili awuro berɛ.

¹³Braa ne nwuni kyɛ Yosef ayakyi ye ataadeɛ ne wɔ ye sa nu na wanwati wafi awuro berɛ nen,

¹⁴ɔteane nu frɛfrɛle awuro berɛ ama sele bɛ kyɛ, “Ɛ́mɔnea oo, me hu waafa Hebriniɛ wawa yɛ wa kyɛ ɔɔgoro yɛ nwo; ɔwale kyɛ ahaa ɔne me baala, nakoso ndeateane nu serɛ paa!

¹⁵Na onwuni kyɛ meteatea nu ne, ɔyakyili ye ataadeɛ ne wɔ me sa nu, na ɔnwatili fili awuro wa.”

¹⁶Ɔfale Yosef ataadeɛ ne guale ye nwo berɛ maa oodwuli kyɛ ye mene wale awuro ɔ.

¹⁷Na braa ne fale sɔ edwirɛ ne bɔle ye amaneɛ kyɛ, “Hebriniɛ akoaa bɔ aafa ye awa yɛ wa ne, ɔwale kyɛ ɔbaagoro me nwo.

¹⁸Nakoso nhyɛle ye bo kyɛ meteatea nu ne, ɔyakyili ye ataadeɛ me sa nu, na ɔnwatili fili awuro wa.”

¹⁹Na mmerɛ bɔ Yosef mene ne tele amaneɛ bɔ ɔye fa bɔle ye kyɛ, “Atee bɔ w’akoaa ne afa me afa so ɛhe” nen, ɔfɛle yaa.

²⁰Yiti Yosef ye mene fale Yosef ɔɔtole kuku nu, nekaa bɔ bɛfa Faro kukunufoɛ begua ne, na ɔlale kuku nu.

²¹ Nakoso AWURADE gyinane Yosef si, na ɔlole ye; onwuni ye anwumvoin maa kuku nu neafoɛ ne hurole ye dwirɛ.

²²Kuku nu neafoɛ ne fale bɛ bɔ begua kuku nu berɛ amukoraa wurale Yosef sa, na bɔ ɔhɔle so berɛ biala Yosef yeɛ né ɔnea so ɔ.

²³Nikyee biala bɔ né owura Yosef sa ne, kuku nu neafoɛ ne anha ye nwo wɔ ye nwo, ofikyɛ né AWURADE gyi Yosef si, na bɔ ɔyɔle biala AWURADE maa ɔyɛle yee.