Read Sehwi Gyenesise 4 Bible Online

Gyenesise 4 - Sehwi bible

Gyenesise 4

¹Adam ne ɔye Hawa bɛlale, ɔnwonzɛle, na ɔwole Kein. Na Hawa hane kyɛ, “AWURADE adaworoma, mawo bienzua.”

²Nziɛ ye, ɔwole oliɛma bienzua Abel. Né Abel te mmoaenneafoɛ, yeɛ Kein koso te kuaniɛ.

³Nziɛ ye ne, Kein fale fieso nningyein ne bie ɔɔbɔle afɔleɛ mane AWURADE.

⁴ Na Abel koso fale ye mmoaen ne anu nyii bɔ belili moa bɛwole bɛ ne, na ɔfale bɛ loe ne ɔɔbɔle afɔleɛ. Na AWURADE nye sɔle Abel ne ye afɔleɛ ne,

⁵nakoso ye nye anzɔ Kein ne ye afɔleɛ ne. Yiti Kein fɛle yaa hahii, na ye wora bɔle.

⁶Na AWURADE bisale Kein kyɛ, “Nzu ati yeɛ afɛ yaa ye? Nzu ati yeɛ wɔ wora abɔ ye?

⁷Aso ɛyɔ bɔ ɔte paa a, engonya animnyam? Nakoso anyɔ bɔ ɔte paa ne ati, bɔne tetɛ wɔ w’anoa nu berɛ. Ɔpena kyɛ onya wɔ nwo ate, nakoso odi kyɛ edi ye so”

⁸ Na Kein sele oliɛma Abel kyɛ, “Maa yɛhɔ fieso.” Na bɛwɔ fie ne aso nen, Kein hɔle oliɛma Abel so, na ohuni ye.

⁹Na AWURADE bisale Kein kyɛ, “Eliɛma Abel wɔ nisua?” Na obuale kyɛ, “Menze. Nniɛma ne, me yeɛ menea ye so hɔ ɔ?”

¹⁰ Na AWURADE sele kyɛ, “Nzikyɛ nikye yeɛ ayɔ ye? Eliɛma ne, ye mogya ɔteatea nu sũ frɛ me fi aseɛnwo.

¹¹Na aseɛ bɔ wabukye ye noa nu wano eliɛma ne mogya bɔ ɛha guale nen, musue ato wɔ wɔ so.

¹²Sɛ ɛyɔ aseɛ ne aso boo a, ɔngɔhye aleɛ ngɔma wɔ ko. Ɛkɔyɛ kobɔniɛ, na engonya amandena wɔ aseɛ so.”

¹³Na Kein sele AWURADE kyɛ, “M’asohwenɛ ne ɔbo me so.

¹⁴Ɛnɛ afoa me afi aseɛ ye aso, ngɔfa me nwo ngɔfea wɔ. Ngɔyɛ kobɔniɛ bɔ nnne amandena wɔ aseɛ ye aso ɔ, na ebiala bɔ okonwu me ne, okohu me.”

¹⁵Na AWURADE sele ye kyɛ, “Nna sɔ ɔ! Sɛ ebie ku Kein a, bɛkɔtɔ sɔ sona ne so wereɛ pɛen nzoo.” Na AWURADE hyɛle Kein nzorɛ, kyɛbɔ ɔkɔyɛ na ebie nwu ye a ongohu ye ɔ.

¹⁶Afei Kein fili AWURADE nyunu berɛ hɔle, na ɔɔtenane Nɔɔdo[3] aseɛ so wɔ Eden eyia afiteleɛ.

¹⁷Kein ne ɔye bɛlale, ɔnwonzɛle, na ɔwole Henɔke. Kein kyekyele kuro bie, na ɔfale ɔwa Henɔke dumaa tole kuro ne.

¹⁸Henɔke wole Yirade, Yirade wole Mehuyael, Mehuyael wole Metusael, yeɛ Metusael wole Lamɛke.

¹⁹Lamɛke gyale mmraa nyɔ: ko dumaa li Ada, yeɛ ko wora oli Sila.

²⁰Ada wole Yabal, bɔ ye bosofoɛ te mmenia bɔ né bɛtete ɛtena sua nu na besa besie ngaka ɔ.

²¹Né oliɛma bienzua ole Yubal, bɔ ye bosofoɛ te mmenia bɔ bɛbɔ sangoo na behu awɛen ɔ.

²²Sila wole Tubal Kein, bɔ né ɔte kɔɔbere ne mmuralɛ mukoraa dwumvoɛ ne. Né Tubal Kein aliɛma brasua ole Naama.

²³Na Lamɛke sele ɔye mɔ kyɛ, “Ada ne Sila, ɛ́mɔtie bɔ meka ye, Lamɛke aye mɔ, ɛmɔma bɛ so bra wa, mahu biaa bie bɔ opurale me ɔ, na mahu aberandeɛ bie bɔ ɔbɔle me ɔ.

²⁴Sɛ bɛkɔtɔ Kein so wereɛ pɛen nzoo de a, nzaade bɛkɔtɔ Lamɛke so wereɛ aburasoo ne nzoo.”

²⁵Adam ne ɔye lale bieku; braa ne wole bienzua, na ɔtole ye dumaa Sɛte, ofikyɛ braa ne hane kyɛ, “Nyameɛ amaa manya baa foforɛ masi Abel bɔ Kein huni ye ne gya nu.”

²⁶Sɛte koso wole baa bienzua, na ɔtole ye dumaa Enose. Na sɔ mmerɛ ne yeɛ mmenia hyɛle ye bo kyɛ bɛ́bɔ AWURADE dumaa bɛsɔne ye ɔ.