Read Sehwi Gyenesise 40 Bible Online

Gyenesise 40 - Sehwi bible

Gyenesise 40

¹Na mmerɛ kãa asi ne, biaa bɔ osu Misraim hene nzaa ɔne biaa bɔ ɔto ye paanoo ne, bɛyɔle tɛɛ betiale bɛ mene Misraim hene.

²Na Faro fɛle mbanyi nyɔ hemɔ so yaa: bɛ ole nzaasulɛfoɛ so panyi ɔne paanootonɛfoɛ so panyi.

³Yiti ɔhyele bɛ guale kuku nu wɔ angɔbeahene n’awuro. Né Yosef koso la sɔ kuku ne anu bie.

⁴Angɔbeahene ne fale bɛ wurale Yosef sa, na Yosef sole bɛ; bɛlale kuku nu berɛ bɛhyɛle kãa.

⁵Ɛlɛho bie kɔngɔen, Misraim hene ye nzaasulɛfoɛ so panyi ne paanootonɛfoɛ so panyi bɔ bɛla kuku nu berɛ ne, bɛ munyɔ bɛhyene laleɛ. Asora ebiala ne ye laleɛ ɔne kyɛbɔ laleɛ ne bo kyire ɔ.

⁶Yosef wale bɛ nwo berɛ ngyerɛmɔ nen, onwuni kyɛ nikyee ha bɛ.

⁷Yiti obisale Faro mbanyi bɔ bɛ ne ye gua kuku nu wɔ ye mene awuro berɛ ne kyɛ, “Nzu ati yeɛ ɛmɔ nyunu ayɛ aworabɔlɛ aworabɔlɛ ɛnɛ ye?”

⁸Na bebuale ye kyɛ, “Yahyehye laleɛ, nakoso yɛnnya sona maa ongyire yɛ bɛ bo.” Yeɛ Yosef sele bɛ kyɛ, “Aso nna Nyameɛ ala yeɛ ɔkora kyire laleɛ bo ɔ? Mesrɛ ɛmɔ, ɛ́mɔhã laleɛ ne behyire me.”

⁹Yiti nzaasulɛfoɛ so panyi ne hane ye laleɛ ne hyirele Yosef kyɛ, “Laleɛ ne anu, né bobe bakaa gyi me nyunu.

¹⁰Né bobe ne le asa mmaa nza. Ɔfefɛle pɛ, yeɛ ɔbɔle nyerɛen ɔ, na nyerɛen kure kure ne borole yɛle bobe mmaa.

¹¹Né ndira Faro kulie ne. Mvale bobe mmaa ne, ndwini nguale Faro kulie ne anu, na mvale kulie ne mane ye.”

¹²Na Yosef sele ye kyɛ, “Laleɛ ne bo ɛhe: bakaa sa mmaa nza ne kyire ɛlɛsa;

¹³kyɛ ódwu ɛlɛsa nen, Faro kɔɔye wɔ kofi kuku nu wa maa ekosa kooli wɔ dibea, na ekosa kosu Faro nzaa kyɛbɔ daa né ɛyɔ ne ala.

¹⁴Na sɛ nningyein kɔ yee ma wɔ a, mesrɛ wɔ, kaye me na boka me: di me nwo ngɔmɔ kyire Faro, maa bɛ́ye me béfi kuku ye anu.

¹⁵Ofikyɛ nahorɛ nu, bɛhyele me nnure befili Hebrifoɛ aseɛ so; na ɛwa po, nnyɔle hwee bɔ ɔsɛ kyɛ bɛfa me bɛto kumaa nu kuku nu ɔ.”

¹⁶Na paanootonɛfoɛ so panyi ne tele kyɛ Yosef aha edwirɛ fɛɛ wafa laleɛ ne anwo nen, osele Yosef kyɛ, “Me koso ngyene laleɛ ɔ, né paanoo kɛndɛen nza gyigyi so wɔ me ti so.

¹⁷Na kɛndɛen bɔ ogyi anwuro paa ne anu, né aleɛ ahoroɔ bɔ bato ye foonoo nu bɔ bɛfa bɛma Faro ɔ wɔ nu. Nakoso né nnomaa suso aleɛ ne fi kɛndɛen ne anu wɔ me ti so.”

¹⁸Na Yosef buale kyɛ, “Laleɛ ne bo ɛhe: kɛndɛen nza ne kyire ɛlɛsa.

¹⁹Kyɛ odwu ɛlɛsa ne, Faro kɔpɛ wɔ ti kofi so, na ɔkɔmaa bɛkɔfa wɔ kundunzii ne bekosinze bakaa so maa nnomaa kosuso wɔ naen bekoli.”

²⁰Ye ɛlɛsa ne aso, né ɔte Faro krakyẽa. Ɔtole poen mane ye mbanyi amukoraa. Na ɔyele nzaasulɛfoɛ so panyi ne paanootonɛfoɛ so panyi ne fili kuku nu maa beegyinane ye mbanyi nemɔ anyunu.

²¹Faro sá fale nzaasulɛfoɛ so panyi n’adwuma wurale ye sa maa ɔhɔle so suli ye nzaa.

²²Nakoso paanootonɛfoɛ so panyi ne de, ɔmaa behuni ye, kyɛbɔ Yosef hyirele bɛ laleɛ nemɔ abo nen.

²³Nakoso nzaasulɛfoɛ so panyi ne angaye Yosef, na mmom ye wora fili ye.