Read Sehwi Gyenesise 42 Bible Online

Gyenesise 42 - Sehwi bible

Gyenesise 42

¹Yakob tele kyɛ aleɛ wɔ Misraim ne, obisale ye mma nemɔ kyɛ, “Nzu ati yeɛ ɛmɔtete berɛ ná ɛmɔnyɔ ɛhɔen ye anwo hwee ye?”

² Na ɔtoale so sele bɛ kyɛ, “Mate kyɛ aburoo wɔ Misraim; ɛmɔhɔ dɔ bɛɛtɔ bie bɛbrɛ yɛ maa yɛli yɛnya ngoa na yanwuwu.”

³Yiti Yosef aliɛma mmienzua buru sili nu bɛhɔle Misraim kyɛ bɛkwaatɔ aburoo.

⁴Nakoso Yakob amma Yosef aliɛma Benyamin wammoka oliɛma nemɔ aso ɔne bɛ angɔ, ofikyɛ né osuro kyɛ anyɔ a, nikyee bie ayɔ ye.

⁵ Yiti mmenia bɔ bɛhɔle aburoo atɔ wɔ Misraim ne, né Yisrael mma nemɔ boka so, ofikyɛ né ɛhɔen piri ne awa Kanaan aseɛ so.

⁶Né Yosef yeɛ ɔte amrado wɔ maen ne anu ɔ. Né ye yeɛ ɔtɔne aleɛ ma maen ne anu ama mukoraa ɔ. Yosef aliɛma mɔ wale, na bɛfale bɛ nyunu bebutubutuli ase bɛkotole ye.

⁷Yosef nye bɔle oliɛma nemɔ aso ne, onwuni bɛ ngome. Nakoso ɔyɛle kyɛ ɔnze bɛ, na opoopoole ye nye bisale bɛ kyɛ, “Ɛmɔfi ni?” Na bebuale ye kyɛ, “Yɛfi Kanaan aseɛ so, na yawa aleɛtɔlɛ.”

⁸Yosef nwuni oliɛma nemɔ angome, nakoso bɛ de, bannwu ye.

⁹ Yosef kayele laleɛ mɔ bɔ ɔhyehyene fale bɛ nwo ne, na osele bɛ kyɛ, “Ɛmɔte maentetɛlɛfoɛ! Ɛmɔawa kyɛ ɛmɔbaaneanea maen ye anu na bɛpena nekaa bɔ yɛtɔ si ɔ.”

¹⁰Na bebuale kyɛ, “Daabi, yɛ mene. Wɔ ngoaa awa atɔ.

¹¹Yɛ mukoraa yɛte seɛ ko mma, yɛdi nahorɛ, wɔ ngoaa mɔ yɛtte maentetɛlɛfoɛ.”

¹²Osa sele bɛ kyɛ “Ɛmɔlaka, maen ye siitɔlɛ yeɛ ɛmɔbaatetɛ bɛnea ɔ.”

¹³Na besili so kyɛ, “Wɔ ngoaa, yɛte aliɛmaa buru ne nyɔ, biaa bie bɔ ɔwɔ Kanaan aseɛ so mma. Kasiɛ ne ɔne yɛ baba wɔ awuro kyɛbɔ yɛdwudwo ye, na ko de, ɔbboka yɛ so ko.”

¹⁴Nakoso Yosef sá sele bɛ kyɛ, “Ye ala yeɛ mahã ne, ɛmɔte maentetɛlɛfoɛ.

¹⁵Méfa ɛhe méso ɛmɔ menea: Meta Faro ndaen kyɛ, mengɔma ɛmɔngofi wa bɛngɔhɔ, sana ɛmɔ aliɛma kãa paa ne awa wa koraka.

¹⁶Yiti ɛ́mɔsoma ɛmɔ nu ko maa ɔɔfa ɛmɔ aliɛma ne ɔbra; ɛmɔ ngaa ne de ɛmɔkogua kuku nu na yaneanea ɛmɔ dwirɛ ne anu yanea sɛ ɔte nahorɛ a. Wanyɔ sɔ de a, meta Faro ndaen kyɛ ɛmɔte maentetɛlɛfoɛ!”

¹⁷Na ɔfale bɛ mukoraati guale kuku nu ɛlɛsa.

¹⁸Ɛlɛsa ne aso, Yosef sele bɛ kyɛ, “Ɛ́mɔyɔ ɛhe na ɛmɔanya bɛ ti badidi nu, ofikyɛ mesuro Nyameɛ:

¹⁹sɛ ɛmɔdi nahorɛ amba a, ɛ́mɔma ɛmɔ nu ko ɔha kuku nu wa, na ɛmɔ ngaa ne de, ɔnate ɛhɔen piri ne ati, memaa ɛmɔfa aburoo bɛkɔma ɛmɔ awuro ama.

²⁰Na ɛmɔɔfa ɛmɔ aliɛma kasiɛ ne bɛbrɛ me wa, amaa manwu kyɛ ɛmɔ dwirɛ ne te nahorɛ, ná ɛmɔanya bɛ ti badidi nu.” Na bɛyɔle ye sɔ ala.

²¹Yeɛ besisele bɛ nwo kyɛ, “Nahorɛ nu, yɛdi y’eliɛma ne anwo fɔ, ofikyɛ yɛnwuni kyɛbɔ né ye wora asi abɔ ɔ; ɔsrɛle yɛ, nakoso yandie; ɛhe ati yeɛ edwirɛ he ato yɛ ye.”

²² Na Ruben sele bɛ kyɛ, “Manga mangyerɛ ɛmɔ kyɛ nnɛma ɛmɔyɔ abɛɛmaa ne tɛɛ biala? Nakoso ɛmɔandɛ me so. Yiti kekesaala ye, ye mogya nwo akatuaa yeɛ yɛnya ye ye.”

²³Né bɛnze kyɛ Yosef te edwirɛ bɔ bɛka ne abo ɔ, ofikyɛ né sona bie wɔ berɛ bɔ okyire bɛ dwudwolɛ ne abo ɔ.

²⁴Na Yosef hwene ye nwo hɔle ahameɛ oosuni, na osa wale bɛ nwo berɛ ɔne bɛ beedwudwole. Ɔyele Simeon fili bɛ nu, na ɔmaa bɛkyekyele ye bɛ nyunu berɛ ala.

²⁵Na Yosef hyɛle ye mmenia kyɛ bewura oliɛma nemɔ bɔtɔ aburoo tɛkyɛtɛkyɛɛ, ná besa bɛ́fa ebiala sikaa béwura ye bɔtɔ ne anu, ná bɛma bɛ aleɛ bɔ bekoli ye atunu ɔ. Na bɛyɔle ye sɔ bɛmane bɛ.

²⁶Bɛfale b’aburoo ne bɛsoale b’afunum nemɔ, na bɛpene atee so.

²⁷Beedwuli asikyeleɛ, na bɛ nu ko sangyele ye bɔtɔ anoa kyɛ ɔma ye afunum aleɛ nen, onwuni kyɛ ye sikaa ne wura aburoo ne anu wɔ ye bɔtɔ ne anoa ɔ.

²⁸Yiti ɔbɔle oliɛma nemɔ amaneɛ kyɛ, “Basa bafa me sikaa ne bama me. Ɛ́mɔnea, owura me bɔtɔ ne anu.” Ɛhe mane bɛ kunu tele bɛ, na bele anwopopolɛ besisele bɛ nwo kyɛ, “Nzikyɛ dwirɛ yeɛ Nyameɛ amaa wato yɛ ye?”

²⁹Na beedwuli bɛ baba Yakob berɛ wɔ Kanaan maen nu nen, bɛhane bɔ wato bɛ amu behyirele ye kyɛ,

³⁰“Maen ne anu amrado le anwunanwuna yeɛ odwudwole hyirele yɛ ɔ; ɔnwa yɛte maentetɛlɛfoɛ po.

³¹Nakoso yɛsele ye kyɛ, ‘Yɛdi nahorɛ, na yɛtte maentetɛlɛfoɛ.

³²Yɛte aliɛmaa mmienzua buru ne nyɔ, seɛ ko ama; ko de ɔbboka yɛ so ko, na kekesaala ye bɔ yɛdwudwo ye, kasiɛ ne ne yɛ baba wɔ Kanaan aseɛ so.

³³Na biaa ne bɔ ɔte maen ne aso amrado ne sele yɛ kyɛ, Bɔ ɔkɔmaa ngonwu kyɛ ɛmɔdi nahorɛ ɛhe: ɛ́mɔma ɛmɔ aliɛmaa ne ko ha wa; na ɛmɔ ngaa ne de, ɛhɔen piri ne ati ɛ́mɔfa aburoo bɛɛma ɛmɔ awuro ama.

³⁴Ɛmɔɔfa ɛmɔ aliɛma kasiɛ ne bɛbrɛ me, amaa manwu kyɛ ɛmɔdi nahorɛ, na mmom ɛmɔtte maentetɛlɛfoɛ. Sɛ ɛmɔyɔ sɔ a, ngɔye ɛmɔ aliɛma ne ngɔma ɛmɔ, na ɛmɔatena maen ye anu bayɔ b’adwuma.”

³⁵Bɛwɔ so behwiehwie bɛ mmɔtɔ ne anu nningyein nen, benwuni kyɛ ebiala sikaa borɛ wɔ ye bɔtɔ ne anu. Na bɛ ne bɛ baba nwuni bɛ sikaa borɛ nemɔ nen, ɔyɛle bɛ suro.

³⁶Na bɛ baba Yakob sele bɛ kyɛ, “Ɛmɔamaa me mma mɔ afi me sa: Yosef afi me sa, Simeon afi me sa, yeɛ ɛmɔbaafa Benyamin koso bɛkɔ. Me yeɛ ménwu sɔ amaneɛ ye amukoraa.”

³⁷Yeɛ Ruben sele ye baba kyɛ, “Fa ye wura me sa, na ngosa ngɔfa ye ngɔbrɛ wɔ. Sɛ mamva ye manza mammrɛ wɔ a, ku me mma mmienzua nyɔ ne.”

³⁸Na Yakob sele kyɛ, “Mengɔmaa ɛne mma ne ngɔhɔ, ofikyɛ oliɛma awu maa waha ye ngome. Sɛ edwirɛ tɛɛ bie to ye atee bɔ ɛmɔbaatu ye anu a, ye de ɛmɔkɔmaa nne aworabɔlɛ ngɔfa me gyein ye ngɔhɔ ɛborɔ.”