Read Sehwi Gyenesise 44 Bible Online

Gyenesise 44 - Sehwi bible

Gyenesise 44

¹Na Yosef hyɛle ye awuro neafoɛ ne kyɛ, “Fa aleɛ somaa bɔ biaa nemɔ kɔhora ye soa ɔ wura bɛ mmɔtɔ nemɔ maa oyi, na fa ebiala sikaa wura ye bɔtɔ ne anu.

²Fa me kulie ne, ɛdwetɛ kulie ne wura bɛ kasiɛ ne bɔtɔ ne anu, na fa ye sikaa bɔ ɔbaafa tɔ aburoo ne boka so.” Na ɔyɔle kyɛbɔ Yosef ha hyirele ye ne.

³Aleɛ hyene pɛ, beguale Yakob mma nemɔ ne b’afunum nemɔ ate.

⁴Bɛtrale kuro ne bɛhɔle moa kãa nen, Yosef sele ye awuro neafoɛ ne kyɛ, “Ka wɔ nwo foa mmenia nemɔ, na sɛ ɛkɔto bɛ a, bisa bɛ kyɛ, ‘Nzu ati yeɛ ɛmɔafa tɛɛ batua paa so ɔ? Nzu ati yeɛ ɛmɔawua me mene ɛdwetɛ kulie ne ɔ?

⁵Aso ná sɔ kulie ne yeɛ me mene no nu, na afei ɔnea nu ɔfa onwu bɔ ɔbaasi ɔ. Nikyee bɔ ɛmɔayɔ ye de, ɔtte mayee koraa.’ ”

⁶Ɔɔtole bɛ ne, ɔfale sɔ dwirɛ ne tole bɛ nyunu.

⁷Na besele ye kyɛ, “Nzikyɛ dwirɛ yeɛ me mene ɔne yɛ ka ye? Wɔ ngoaa ngɔhora sɔ nikyee ne yɔ le!

⁸Esikaa bɔ yɛnwuni ye wɔ yɛ bɔtɔ ne anu ne, yɛsa yɛfa yɛfili Kanaan aseɛ so yɛbrɛle wɔ. Nzu ati yeɛ yɛ́wua ɛdwetɛ anaa sikaa kɔkorɛ yɛ́fi wɔ mene awuro ɔ?

⁹Sɛ enwu kulie ne wɔ yɛ nu biala berɛ a, maa behũ ye, na yɛ ngaa ne koso yɛkɔyɛ yɛ mene ngoaa.”

¹⁰Awuro neafoɛ ne sele kyɛ, “Yoo, mepene so, sona bɔ ngonwu kulie ne wɔ ye berɛ ne, ɔkɔyɛ m’akoaa, nakoso ɛmɔ ngaa ne de, ɛmɔkɔfa bɛ nwo bekoli.”

¹¹Yiti ebiala tole ye bɔtɔ ne ase ndɛndɛ, na ebiala sangyele ye bɔtɔ deɛ noa.

¹²Na awuro neafoɛ ne neaneane nu; ɔhyɛle ye bo fili bamuɛbaa ne deɛ so oodwuli kasiɛ ne aso. Na onwuni kulie ne Benyamin bɔtɔ deɛ ne anu.

¹³Ɔwale ye sɔ nen, besunzuale bɛ ndaadeɛ nu, na ebiala sá sesale ye nningyein guale ye afunum so, na besale bɛ si bɛhɔle kuro ne aso.

¹⁴Yuda ne oliɛma mɔ beedwuli Yosef awuro nen, né ɔtɛwɔ berɛ, na bɛlelale aseɛnwo wɔ ye nyunu.

¹⁵Yosef bisale bɛ kyɛ, “Nzikyɛ nikyee yeɛ ɛmɔayɔ ye? Anaa ɛmɔnze kyɛ sona bɔ ɔte kyɛ me de, ɔse ase ɔ?”

¹⁶Na Yuda buale kyɛ, “Nzikyɛ yeɛ yɛkã yɛkyire me mene ɔ? Nzikyɛ dwirɛ yeɛ yɛkã ɔ? Yɛyɛ sɛɛ né yasa yɛ nwo? Nyameɛ ama wɔ ngoaa nwo ala so; yayɛ me mene ngoaa, yɛ ne sona bɔ benwuni kulie ne wɔ ye dɔ ne yeɛ yayɛ ngoaa ɔ.”

¹⁷Nakoso Yosef sele bɛ kyɛ, “Daabi, mengɔyɔ ye sɔ le! Sona bɔ benwuni kulie ne wɔ ye dɔ ne angome yeɛ ɔkɔyɛ m’akoaa ɔ; ɛmɔ ngaa ne de, ɛ́mɔsa bɛhɔ ɛmɔ ase dɔ asomdwee nu.”

¹⁸Na Yuda hɔle Yosef nwo berɛ oosele ye kyɛ, “Me mene, mesrɛ wɔ, ma w’akoaa osusu edwirɛ kãa nwo ohyire ye mene; nnɛfɛ w’akoaa so yaa, ofikyɛ wɔ de wɔ diberɛ te kyɛ Faro bɔbɔ deinn.

¹⁹Me mene bisale ye ngoaa kyɛ, ‘Aso ɛmɔ ase tɛ te ase, na ɛmɔle aliɛmaa bieku’?

²⁰Na yɛbuale yɛ mene kyɛ, ‘Yoo, yɛ baba tɛ wɔ berɛ, wayɛ aworowaa. Yɛle aliɛmaa kãa ko wɔ berɛ, yɛ baba ye aworowaa nu baa ɛne; oni awa deɛ awu maa waha ye ngome, na ye baba kuro ye dwirɛ paa.

²¹Yeɛ esele wɔ ngoaa kyɛ, ‘Ɛ́mɔfa ye bɛ́brɛ me maa nwu ye.’

²²Na yɛsele me mene kyɛ, ‘Abɛɛmaa ne ngɔhora ye baba anwo fi, ofikyɛ sɛ ofi ɔse anwo a, ɔse kowu.’

²³Yeɛ ɛha hyirele wɔ ngoaa kyɛ, ‘Sɛ ɛmɔamva ɛmɔ aliɛma kasiɛ ne bamma a, mengɔnea ɛmɔ nyunu ko.’

²⁴Yɛsa yɛhɔle w’akoaa me baba dɔ nen, yɛfale yɛ mene noa dwirɛ yɛɛbɔle ye amaneɛ.

²⁵Na yɛ baba sele yɛ kyɛ, ‘Ɛ́mɔsa bɛhɔ bɛɛtɔ aleɛ kãa bɛbrɛ yɛ’ nen,

²⁶yɛbuale kyɛ, ‘Yɛngɔhora kɔ. Sɛ y’eliɛma kãa ne ɔne yɛ kɔ de a, ye de yɛkɔhɔ; ofikyɛ sɛ y’eliɛma kãa ne ɔbboka yɛ so a, biaa ne ngɔnea yɛ nyunu po.’

²⁷Yeɛ w’akoaa, bɔ ɔte me baba ne, osele yɛ kyɛ, ‘Ɛ́mɔse kyɛ me ne me ye ne yɛwole mma mmienzua nyɔ;

²⁸bɛ nu ko afi me sa, na ngane kyɛ, amba kaka bie atete ye pasapasa, na ofi berɛ ne, mannwu ye ko.

²⁹Sɛ ɛmɔfa ɛhe koso bɛkɔ ná nikyee bie yɛ ye a, ɛmɔkɔmaa nne aworabɔlɛ ngɔfa me gyein ngɔhɔ ɛborɔ.’

³⁰Yiti kekesaala ye, sɛ mesa mekɔ w’akoaa me baba dɔ, na sɛ abɛɛmaa ne ɔbboka yɛ so a, ye de kyɛbɔ ɔne abɛɛmaa ne besi bɛte ko nen,

³¹sɛ onwu kyɛ abɛɛmaa ne ɔbboka yɛ so a, okowu; na wɔ ngoaa kɔwɔ w’akoaa bɔ ɔte yɛ baba ne kɔme asi maa ole aworabɔlɛ ɔkɔfa ye gyein kɔhɔ ɛborɔ.

³²Na me, w’akoaa, nnili abɛɛmaa ne anwo agyinamuɛ wɔ me baba nyunu kyɛ, ‘Sɛ manza mamva ye mammrɛ wɔ a, ye de ngoli fɔ wɔ me baba nyunu me ngyẽa bɔ ngoli ye aseɛ ye aso amukoraa.’

³³Yiti afei, mesrɛ wɔ, maa w’akoaa, nzi abɛɛmaa ne gya nu na nyɛ me mene akoaa; na mmom abɛɛmaa ne de, maa ɔne oliɛma mɔ besa bɛhɔ.

³⁴Méyɛ sɛɛ né masa mahɔ me baba berɛ wɔ aberɛ bɔ abɛɛmaa ne ɔbboka me so ɔ? Membena kyɛ menwu kyɛ edwirɛ tɛɛ bie kɔto me baba ɔ.”