Read Sehwi Gyenesise 48 Bible Online

Gyenesise 48 - Sehwi bible

Gyenesise 48

¹Na ɛhe asi ne, bɛɛbɔle Yosef amaneɛ kyɛ, “Wɔ baba nde apɔ.” Yiti ɔfale Manase ne Efraim bɔ bɛte ye mma nyɔ ne bokale ye nwo so.

²Na ebie sele Yakob kyɛ, “Ɛwa Yosef awa wɔ wa.” Yiti Yisrael kendene ye nwo tenane ye mba ne aso.

³ Na Yakob sele Yosef kyɛ, “Ɛdangama Nyameɛ yele ye nwo ali hyirele me wɔ Luse bɔ ɔwɔ Kanaan aseɛ so. Oyirale me,

⁴na osele me kyɛ, ‘Ngɔmaa ɛkɔwo na wɔ boso atrɛ; ngɔma wɔ boso ama kɔyɛ mmeni kure pee, na ngɔfa aseɛ he ngɔhyɛ wɔ ne wɔ boso ama afebɔɔ.’

⁵Na afei wɔ mma mmienzua nyɔ nemɔ bɔ ɛwole bɛ wɔ Misraim koraka yeɛ meba wɔ wa wɔ Misraim nen, mekyire Efraim ɔne Manase, bɛte me deɛ; bɛkɔyɛ me mma kyɛbɔ Ruben ne Simeon bɛte ne ala.

⁶Ngwadaa bɔ ɛkɔwo bɛ nziɛ ye de, bɛte wɔ deɛ; na sɛ ɔba agyapadeɛ hyɛlɛ nu a, b’eliɛma nemɔ dumaa yeɛ ɔkɔla bɛ deɛ so ɔ.

⁷ Ofikyɛ mvi Padan méba ne, atee nu, ɔhale kãa maa yɛdwu Efrate ne, Rahɛl wuli Kanaan aseɛ so mane me wora bɔle, na nziele ye wɔ Efrate (bɔ ye ole Betlehem) atee nu.”

⁸Na Yisrael nwuni Yosef mma nemɔ nen, obisale kyɛ, “Na nwa mɔ ɛhe?”

⁹Yosef buale ye baba kyɛ, “Me mma mɔ bɔ Nyameɛ afa bɛ alo me wɔ wa ɛne.” Na Yakob sele ye kyɛ, “Mesrɛ wɔ, fa bɛ pingye me nwo wa maa nyira bɛ.”

¹⁰Ɔnate enyinɛ ti, né Yisrael nye ayɛ wusiwusi maa onnwu nikye. Yiti Yosef fale bɛ pingyele ye, na Yisrael fele bɛ noa tɔle bɛ nu.

¹¹Yisrael sele Yosef kyɛ, “Mandwene kyɛ ngonwu wɔ nyunu ko le, nakoso nea kyɛ Nyameɛ amaa manwu wɔ mma mɔ koso po ɔ.”

¹²Yosef pagyale ngwadaa nemɔ fili Yisrael gya so, na Yosef kunduni fale ye nyunu butuli berɛ.

¹³Na Yosef fale bɛ munyɔ pingyele ɔse. Ɔfale ye sa famaa sɔle Efraim nu maa oolili Yisrael sa bɛen so, yeɛ ɔfale ye sa bɛen sɔle Manase nu maa oolili Yisrael sa famaa so.

¹⁴Yisrael tengyɛle ye sa famaa fa tole Efraim bɔ yeɛ ɔte kãa ne ti so, na ɔfale ye sa beale nu fale bɛen ne tole Manase so, ɔwɔ nu kyɛ né Manase yeɛ ɔte bamuɛbaa ɔ de.

¹⁵Na oyirale Yosef kyɛ, “Nyameɛ bɔ me mbanyi mɔ Abraham ne Yisake bɛsole ye ne, Nyameɛ bɔ wagyina me si me wiase bɔ mmale maa waadwu ɛne ye,

¹⁶abɔfo bɔ aye me afi musue mukoraa nu ɔ, yira mmɛɛmaa ye; maa ɔnate bɛ so, me dumaa, ɔne me mbanyi mɔ Abraham ne Yisake dumaa otira ndii; ma bɛ boso ama bɛsone na bɛyɛ pee wɔ aseɛ ye aso.”

¹⁷Na Yosef nwuni kyɛ ye baba afa ye sa famaa wato Efraim ti so nen, wanyɛ ye fɛ; yiti ɔyele ye baba sa fili Efraim ti so fa tole Manase ti so.

¹⁸Yeɛ Yosef sele ye baba kyɛ, “Daabi, baba, ɛhe yeɛ ɔte bamuɛbaa ɔ, yiti fa wɔ sa famaa ne to ye ti so.”

¹⁹Nakoso ye baba ambene, na osele kyɛ, “Mese, mma mese, ɛhe koso kɔyɛ maen, ye koso ɔkɔyɛ sona titire, nakoso oliɛma kãa ne koli mu kɔtra ye, na ye bosofoɛ kɔyɛ maen maen pee.”

²⁰ Yiti oyirale bɛ sɔ kyẽa ne, na osele kyɛ, “Ɔnate wɔ so yeɛ maen Yisrael kɔha sɔ saleɛ dwirɛ he ɔ: ‘Nyameɛ ma ɛyɛ kyɛ Efraim, na ɔ́ma ɛyɛ kyɛ Manase.’ ” Yiti Yakob nate sɔ atee he aso bɔle Efraim panyi wɔ Manase so.

²¹Yeɛ Yisrael sele Yosef kyɛ, “Mebaawu, nakoso Nyameɛ kogyina ɛmɔ si, na okosa kɔfa ɛmɔ kɔhɔ ɛmɔ nana mɔ aseɛ so.

²²Afei koso, aseɛ ko bɔ ɔla bokaa Sɛkem ndoroleɛ nu, bɔ mvale me ngrandɛ ne me agyaen ngo nnele mvili Amorifoɛ sa nu ne, mafa mama wɔ; mamva mamma eliɛma nemɔ.”