Read Sehwi Gyenesise 50 Bible Online

Gyenesise 50 - Sehwi bible

Gyenesise 50

¹Yosef yakyili ye nwo tole ye baba so, ɔfele ye noa na osuni ye.

²Na Yosef hyɛle ye ngoaa safoɛ nemɔ kyɛ bewura ɔse fuin ne ayire amaa wamborɔ. Yiti bewurale Yisrael fuin ne ayire.

³Bɛfale eleburanna yeɛ bɛyɔle ɔ, ofikyɛ né eleburanna yeɛ bɛfa bewura efuin ayire ɔ. Na Misraimfoɛ suni ye eleburasoo.

⁴Na ngyẽa bɔ bɛfa besuni ye ne pɛle nu ne, Yosef sele Faro mbanyi kyɛ, “Sɛ ɛmɔanya baboka me sɔa de a, ye de mesrɛ ɛmɔ, ɛ́mɔfa bɛto Faro nyunu bɛma me kyɛ,

⁵ me baba maa ndale ndaen na ɔhane kyɛ, ‘Mebaawu, na kosie me wɔ Kanaan aseɛ so, wɔ asieleɛ bɔ mbɛ ndole berɛ kyɛ besie me wɔ nu ne anu.’ Yiti mesrɛ wɔ, maa ngonzie me baba na nza mmra.”

⁶Na Faro buale kyɛ, “Kɔ na kosie ɛse, kyɛbɔ ɔmaa ɛtale ndaen ne.”

⁷Yiti Yosef hɔle kyɛ ɔkwaasie ɔse; na Faro mbanyi amukoraa: mbanyi bɔ bɛwɔ Faro awuro, yeɛ Misraim maen ne anu mbanyi amukoraa,

⁸Yosef awuro ama mukoraa, oliɛma mmienzua mɔ, yeɛ afei ɔse awuro ama mɔ bɛbokale ye so bɛ ne ye hɔle. Bɛ mma mɔ ne bɛ mmoaen mɔ ne bɛ nandwie mɔ ngome yeɛ bɛhale Gosen aseɛ so ɔ.

⁹Teaseɛnam mɔ ne pɔngɔhanɛfoɛ bokale ye so bɛ ne ye hɔle; né ɛlɔen ne te piri paa.

¹⁰Beedwuli nekaa bɔ bɛboro aburoo wɔ Atade bɔ ɔwɔ asue Yɔɔdan asi dɔ ne, bɛbɔle awuye serɛserɛ bɔ ɔyɛ aworabɔ paa ɔ; na Yosef yɔle ɔse sɛen ɛlɛsoo.

¹¹Na Kanaanfoɛ bɔ bɛte aseɛ ne asofoɛ nwuni ɛsɛen bɔ né bɛyɔ wɔ nekaa bɔ bɛboro aburoo wɔ Atade nen, bɛhane kyɛ, “Misraimfoɛ ɛsɛen piri paa ɛhe!” Yiti bɛfrɛle berɛ Abel Misraim.[65] Ɔwɔ Yɔɔdan asi dɔ.

¹²Yiti Yakob mma mɔ yɔle kyɛbɔ ɔhyɛle bɛ ne ala mane ye;

¹³ ofikyɛ ye mma nemɔ soale ye hɔle Kanaan aseɛ so, na besiele ye wɔ Makepɛla aseɛ so nyɔboɛ bɔ wasi sua nu wɔ Mamre eyia afiteleɛ. Abraham tɔle sɔ nyɔboɛ ne ɔne aseɛ ne fili Hitiniɛ Efron berɛ kyɛ ɔfa yɛ ye asieleɛ.

¹⁴Na Yosef siele ye baba yiele nen, ɔne oliɛma mmienzua nemɔ, yeɛ bɛ bɔ beesomane ye maa osiele ye baba ne amukoraa, besa bɛwale Misraim.

¹⁵Na Yosef aliɛma nemɔ nwuni kyɛ bɛ baba awu ne, besusuli ye nwo kyɛ, “Anyɔ a, né Yosef atu ye nye wasie yɛ so na watua yɛ bɔne bɔ yayɔ ye ne amu so kerɛ.”

¹⁶Yiti bɛmaa bɛɛhã behyirele Yosef kyɛ, “Wɔ baba hane sɔ dwirɛ ye kitii koraka yeɛ owu ɔ kyɛ,

¹⁷‘Ɛ́mɔhã behyire Yosef kyɛ, mesrɛ wɔ, fa eliɛma mɔ amumuyɛɛ ne bɛ bɔne kyɛ bɛ, ofikyɛ bɛyɔle wɔ tɛɛ paa.’ Yiti afei, yɛsrɛ wɔ, fa wɔ baba ye Nyameɛ ngoaa mɔ b’amumuyɛɛ kyɛ bɛ.” Na bɛhane ɛhe behyirele Yosef ne, osuni.

¹⁸Oliɛma nemɔ koso wale beebutubutuli ye nyunu na besele kyɛ, “Yɛte wɔ ngoaa.”

¹⁹Nakoso Yosef sele bɛ kyɛ, “Nnɛma ɛmɔsuro. Aso ngɔhora ngole Nyameɛ adwuma ngɔyɔ anaa?

²⁰Ɛmɔ de, ɛmɔambena me ne paa, nakoso Nyameɛ nhyehyɛleɛ maa ɔkakyili paa; kyɛ ɔnate so okole mmeni pee ngoa, kyɛbɔ afei wala ali ye.

²¹Yiti nnɛma ɛmɔsuro, na ngɔnea ɛmɔ ne ɛmɔ mma mɔ.” Yiti ɔkyekyele bɛ wora mane bɛ kunu tɔle bɛ fɔnwoo.

²²Yosef ne ɔse awuro ama bɛtenane Misraim, na Yosef lili afoɛ ɛyaa ko ne buru.

²³Yosef nwuni Efraim ye nana nganzowa mɔ po, na bɛwole Manase awa Makyiri mma bɛtole Yosef gya so.

²⁴Yeɛ Yosef sele oliɛma nemɔ kyɛ, “Mebaawu, nakoso Nyameɛ kɔɔnea ɛmɔ. Na aseɛ bɔ ɔtale ye nwo ndaen hyirele Abraham ne Yisake ne Yakob ne, ɔkɔye ɛmɔ kofi aseɛ he aso ɔkɔfa ɛmɔ kɔhɔ so.”

²⁵ Yosef mane Yisrael mma nemɔ tale ndaen hyirele ye, na ɔhane kyɛ, “Nyameɛ kɔɔye ɛmɔ kofi wa. Na sɛ ɔba ye sɔ a, ɛ́mɔsoa me mmowue béfi wa bɛhɔ.”

²⁶Yiti Yosef wuli, mmerɛ bɔ né wali afoɛ ɛyaa ko ne buru ɔ. Bewurale ye ayire bɔ wamma wamborɔ ɔ, na bɛfale ye bɛtole alaka nu wɔ Misraim.