Read Sehwi 2 Samuel 1 Bible Online

2 Samuel 1 - Sehwi bible

2 Samuel 1

¹Sɔɔlo wue asi ne, mmerɛ bɔ né Dawide waali Amalɛkefoɛ so ngonim wawa ne, Dawide lili elenyɔ wɔ Siklage.

²Ye ɛlɛsa ne aso, biaa bie fili Sɔɔlo asikyeleɛ ne anu dɔ wale. Né ye ndaadeɛ nu asunzua, yeɛ né nnɛterɛ wɔ ye ti so. Oodwuli Dawide nyunu berɛ ne, ɔbɔle ye ti ase kotole ye.

³Na Dawide bisale ye kyɛ, “Nisua yeɛ efi bɔ ɛ́ba ye?” Yeɛ obuale ye kyɛ, “Manwati mafi Yisrael asikyeleɛ ne anu.”

⁴Na Dawide bisale ye kyɛ, “Sɛɛ yeɛ koɛ ne ooyiele ɔ? Ka kyire me!” Na obuale kyɛ, “Yisrael koɛhonɛfoɛ nemɔ bangora koɛ ne noa gyina, banwati; na koɛhonɛfoɛ nemɔ pee baho batɔ. Sɔɔlo ne ɔwa Yonatan koso bawu.”

⁵Yeɛ Dawide bisale sɔ aberandeɛ bɔ ogu so ɔbɔ ye amaneɛ ne kyɛ, “Ɛyɛle sɛɛ yeɛ enwuni kyɛ Sɔɔlo ne ɔwa Yonatan bawu ɔ?”

⁶ Na aberandeɛ bɔ ɔɔbɔle amaneɛ ne buale kyɛ, “Ngɔ mvitele Gilboa bokaa ne aso, na mvum nu, nwuni kyɛ Sɔɔlo kisa ye pealɛɛ ne. Sɔ mmerɛ ne, né teaseɛnam mɔ ne pɔngɔhanɛfoɛ mɔ bafoa ye bapingye ye.

⁷Ɔpɛle ye nye neane nziɛ, onwuni me, na ɔfrɛle me. Na nzurole kyɛ, ‘Me ɛhe’.

⁸Na obisale me kyɛ, ‘Wɔ nwa ɛne’? Na mmuale ye kyɛ, ‘Nde Amalɛkeniɛ.’

⁹Yeɛ osele me kyɛ, ‘Bra me nwo wa baahu me; ofikyɛ m’ahone te, nakoso mennwu.’

¹⁰Yiti ngɔle ye nwo berɛ ngɔ nguni ye, ofikyɛ, kyɛbɔ né osi la berɛ ne, nwuni kyɛ ongonya ngoa. Me mene, nduli ye abotire ne, yeɛ nyele ye bati kaa ne, na mafa mawa wa kyɛ méfa mebrɛ wɔ.”

¹¹Yeɛ Dawide sɔle ye bɔbɔ ye ataadeɛ nu sunzuale nu, na ye mmenia bɔ bɛboka ye so ne amukoraa, besunzuale bɛ deɛ nu sɔ ala.

¹²Bɛbɔle awuye besuni, na bɛhyele hɔen toonn maa oodwuli nɔsoa, ɔnate Sɔɔlo ne ɔwa Yonatan wue, ɔne AWURADE koɛhonɛfoɛ nemɔ wue ti, yeɛ Yisrael awuro ama ti, ofikyɛ batotɔ ngrandɛ noa.

¹³Na Dawide sele aberandeɛ bɔ ɔɔbɔle ye amaneɛ ne kyɛ, “Efi nisua?” Obuale kyɛ, “Amalɛkeniɛ ɛwɔfoɛ bie bɔ ɔne Yisraelfoɛ baatena ɔ, ɔwa ole me.”

¹⁴Na Dawide bisale ye kyɛ, “Sona bɔ AWURADE apopa ye ngoo ne, yiti anzuro kyɛ ekohu ye ɔ?”

¹⁵Afei Dawide frɛle ye mmerandeɛ nemɔ ko sele ye kyɛ, “Baahu ye!” Na ɔfale nikyee bɔle ye huni ye.

¹⁶Na Dawide sele ye kyɛ, “Wɔ mogya kɔbɔ wɔ bɔbɔ wɔ ti so, ofikyɛ wɔ bɔbɔ ato wɔ noa nu tui aha abua wɔ nwo fɔ kyɛ, ‘Me yeɛ nguni sona bɔ AWURADE apopa ye ngoo ne ɔ.’ ”

¹⁷Na Dawide tole aworabɔlɛ dwein he fa suni Sɔɔlo ne ɔwa Yonatan.

¹⁸ Ɔhyɛle kyɛ edwein bɔ bɛfrɛ ye Agyaen nwo Dwein ne, behyire Yudafoɛ. Na bahyerɛ ye wɔ Yasa Nwomaa ne anu kyɛ,

¹⁹“O Yisrael, w’animnyam mɔ yeɛ bahu bɛ bagua asɔneyɛɛ mɔ so dɔ ye! Yieee, katakyie mɔ baho batɔ!

²⁰Nnɛma ɛmɔbɔ so wɔ Gate, nnɛma ɛmɔbɔ ye nwo dawure wɔ Asekelɔn dwaaso; ɛmɔbɔ so a, Filisti mmrasua koli ahurusi, na mmenia bɔ bɛmbɛ bɛ bienzua ne, bɛ mmrasua nye kɔgye.

²¹“Ao, Gilboa mmokaa, ɛmɔ, esue ngɔtɔ anaa bosue ngogua ɛmɔ so ko, yeɛ ndire ngofifi ɛmɔ so! Ofikyɛ bagua anwoserɛfoɛ akokyɛm nyunu ase wɔ berɛ. Yieee, bɛngɔpopa Sɔɔlo akokyɛm ngoo ko.

²²“Me ngome oo! Yonatan agyaen anza amma mbaen, bɔ yeɛ ɔngɔma mmenia ngɔtotɔ ɔ, bɔ ongohwi anwoserɛfoɛ bɛ loe ngogua ɔ; yieee, Sɔɔlo ngrandɛ anza amma nzanza.

²³“Sɔɔlo ne Yonatan, anwonyemenefoɛ bɔ mmenia kuro bɛ dwirɛ ɔ! Bɛ ngoa nu oo, bɛ wue nu oo, b’afia andete. Né bɛ nwo yɛ nyera tra kɔleɛ, bɛ nwo yɛ se tra gyata.

²⁴“O Yisrael mmrasua, ɛ́mɔsu Sɔɔlo! Ye yeɛ ɔmane ɛmɔ kende kɔkorɛ nyemenenyemene maa ɛmɔherale ɔ, bɔ ɔfale sikaa kɔkorɛ mbembenanneɛ maa ɛmɔsiesiele ɛmɔ nwo ɔ.

²⁵“Yieee, katakyie mɔ baho batɔ wɔ koɛ nu! Me ngome oo! Yonatan aho atɔ wɔ w’asɔneyɛɛ mɔ so.

²⁶O, nniɛma Yonatan, wɔ ti me wora abɔ; né mekuro wɔ dwirɛ paa, kyɛbɔ esi hurole me dwirɛ ne ɔyɛ nwanwa, na ɔtra ehurolɛ bɔ ofi mmrasua berɛ ɔ.

²⁷“Yieee, katakyie mɔ baho batɔ, na akodeɛ mɔ asɛkye!”