Read Sehwi 2 Samuel 12 Bible Online

2 Samuel 12 - Sehwi bible

2 Samuel 12

¹Yiti AWURADE somane Natan wɔ Dawide berɛ. Ɔwale ye berɛ oosele ye kyɛ, “Né mmienzua nyɔ bie wɔ kuro bie aso. Ko te sikaniɛ, yeɛ ko te ehianiɛ.

²Né sikaniɛ ne le mmoaen ne nandwie pee;

³nakoso ehianiɛ ne de, né olle hwee, sana boaen beleɛ kaaba komapɛ bɔ ɔtɔle ɔ. Osiele boaen ne, na boaen ne ne biaa ne mma mɔ bɛbɔle nu benyini wɔ biaa n’awuro berɛ. Biaa ne noa aleɛ kãa bɔ odi ne, né kaka ne di bie, ɔno ye kwangoa noa, na né ɔfa kaka ne ɔbɔ ye hue so. Ɔyɛle kaka ne kyɛ ɔwa brasua.

⁴Ɛlɛho bie, sikaniɛ ne nyane ɛwɔfoɛ. Nakoso sikaniɛ ne anguro kyɛ ye mmoaen anaa nandwie nemɔ, okohu nu ko kɔfa kɔyɛ aleɛ kɔma ɛwɔfoɛ bɔ waasikye ye awuro ne ɔ. Yiti ɔɔhyele ehianiɛ ne boaen deɛ ne, na ohuni ye fa yɛle aleɛ mane ɛwɔfoɛ bɔ wawa ye berɛ ne.”

⁵Yeɛ Dawide fɛle sikaniɛ ne so yaa hahii, na osele Natan kyɛ, “Kyɛ AWURADE te ase ye, sona bɔ wabɔ sɔ bra ne, ehunɛ yeɛ ɔsɛ kyɛ beku ye ɔ!

⁶Odi kyɛ ɔfa boaen ne bie si ye gya nu pɛen nna, ɔnate sɔ nikyee bɔ wayɔ ne ati, yeɛ afei ɔnate kyɛ ɔnze anwumvoin.”

⁷Yeɛ Natan sele Dawide kyɛ, “Wɔ yeɛ abɔ sɔ bra ne! Na AWURADE Yisrael Nyameɛ nwa nyoo: Me yeɛ mbopale wɔ ngoo mvale wɔ nzili Yisrael so hene ɔ, me yeɛ nnele wɔ mvili Sɔɔlo sa nu ɔ.

⁸Me yeɛ mmaa enyane wɔ mene Sɔɔlo awuro ama so tumi, ná nza mvale ɔye mɔ koso nwurale wɔ sa ɔ, yeɛ mafa Yisrael ne Yuda awuro ama koso mama wɔ. Na sɛ ɛhe te kãa po a, ahaa ngɔfa ye mmɔhoɛ ngɔboka wɔ so.

⁹Nzu ati yeɛ ahwi afa AWURADE dwirɛ so aayɔ bɔ ɔte bɔne wɔ ye nyunu ɔ? Ahu Hitiniɛ Yuria, na afa ɔye agya. Amonfoɛ ngrandɛ yeɛ afa ahu ye ɔ.

¹⁰Yiti ngrandɛ noa wue ngofi w’awuro le, ofikyɛ ahwi afa me dwirɛ so, yeɛ ale Hitiniɛ Yuria ɔye afa ye ayɛ ɛye.

¹¹ AWURADE nwa nyoo: Ngɔma wɔ bɔbɔ w’awuroniɛ kodwɔso kotia wɔ serɛserɛ. Ngole ɛye mɔ ngofi wɔ sa nu bɔ wɔ nye tua ɔ, ngɔfa bɛ ngɔma ebiɛngo bienzua, na ɔne ɛye mɔ kɔla pandann nu eyia ketee.

¹²Ɛyɔle wɔ deɛ mvealeɛ nu, nakoso me de, ngɔmaa okosi Yisrael amukoraa nyunu eyia ketee.”

¹³Yeɛ Dawide sele Natan kyɛ, “Yieee! Mayɔ bɔne matia AWURADE.” Na Natan buale Dawide kyɛ, “AWURADE afa wɔ bɔne wahyɛ wɔ, engowu.

¹⁴Nakoso sɔ bra he bɔ abɔ, bɔ ɔnate so ama AWURADE pɔfoɛ mɔ banya ate baha musue dwirɛ batia ye ne ati, akwadaa bɔ awo ye ne okowu.”

¹⁵Afei Natan hɔle ye awuro. Na akwadaa bɔ Yuria aye ne ɔne Dawide bɛwole ye ne, AWURADE mane anwonyerɛ kandinga bie bɔle ye.

¹⁶Dawide srɛle AWURADE kyɛ ɔma akwadaa ne nya ngoa; Dawide yɔle akɔngyere, na ɔhɔle sua nu ɔɔlale aseɛnwo berɛ kɔngɔen ne amukoraa.

¹⁷Afei ye ahemvie berɛ mbanyi wale ye nwo berɛ, bɛsrɛle ye kyɛ odwɔso fi aseɛnwo berɛ, nakoso wandwɔso, yeɛ ɔne bɛ angɔannidi.

¹⁸Na ye ɛlɛsoo ne aso, akwadaa ne wuli. Né Dawide somvoɛ nemɔ besuro kyɛ bɛkɔbɔ ye amaneɛ kyɛ akwadaa ne awu ɔ; ofikyɛ bɛhane kyɛ, “Akwadaa ne te ase ne po, wandie bɔ yɛhã yɛhyirele ye ne, ɔkɔyɛ sɛɛ né yahora yahã yahyire ye kyɛ akwadaa ne awu. Ebiaa né wayɔ ye nwo nikye.”

¹⁹Nakoso Dawide nwuni kyɛ ye somvoɛ nemɔ bɛ́wɔ bɛ noa ase bedi ngɔmɔ nen, onyane adwene kyɛ akwadaa ne awu. Yiti obisale ye somvoɛ nemɔ kyɛ, “Akwadaa ne awu hɔ ɔ?” Na bebuale kyɛ, “Yoo, wawu.”

²⁰Afei Dawide dwɔso fili aseɛnwo berɛ, obiale, ɔpopale, na ɔsesane ye ndaadeɛ. Ɔhɔle AWURADE awuro ɔɔsɔnene ye. Afei osa hɔle ye ahemvie berɛ, ɔhane kyɛ bɛma ye aleɛ, na bɛfale aleɛ bɛbrɛle ye maa olili.

²¹Afei ye somvoɛ nemɔ sele ye kyɛ, “Nana, na nzikyɛ yeɛ ɛyɔ ye? Akwadaa ne te ase ne, ebualale, yeɛ esuni; nakoso akwadaa ne wuli ye de, adwɔso adidi.”

²²Na Dawide buale bɛ kyɛ, “Mmerɛ bɔ né akwadaa ne te ase ne, nzuni nyɔle akɔngyere, ofikyɛ nyane adwene kyɛ, ‘Ebie nze, ebiaa né AWURADE alo me ama akwadaa ne anya ngoa.’

²³Nakoso kekesaala ye bɔ wanya wawu ye de, nzu ati yeɛ ɔsɛ kyɛ mebua meda ɔ? Ngɔhora maa okosa kɔwa ngoa nu anaa? Me yeɛ ngɔɔtoa ye ɔ, nna ye mmom yeɛ okosa kɔwa kɔɔtoa me ɔ.”

²⁴Afei Dawide kyekyele ɔye Bahyeba wora, ɔne ye bɛlale, ɔwole baa bienzua, na bɛtole ye dumaa Solomon. AWURADE hurole akwadaa ne dwirɛ,

²⁵na ɔsomane ngɔmhyɛlɛniɛ Natan maa ɔɔtole ye dumaa Yedidia, ɔnate kyɛ AWURADE kuro akwadaa ne dwirɛ.

²⁶Yoabo fale koɛ ɔtetale Amonfoɛ ahenguro Raba, na olili so ngonim.

²⁷Yeɛ Yoabo tuli ɛbɔfoɛ mɔ maa bɛwale Dawide berɛ beesele ye kyɛ, “Mafa koɛ mateta Raba, na maho mafa nekaa bɔ benya bɛ nzue ne.

²⁸Yiti boaboa koɛhonɛfoɛ ngaa nemɔ noa, ná baatua kuro ne di so ngonim. Ofikyɛ membena kyɛ me bɔbɔ medi kuro ne aso ngonim ma me dumaa da so.”

²⁹Yiti Dawide boaboale koɛhonɛfoɛ ne amukoraa noa, ɔfale bɛ hɔle Raba, na ɔfale koɛ tetale kuro ne lili so ngonim.

³⁰Otuli bɛ hene ne abotire[5] fili ye ti so, na bɛfa bewurale Dawide. Né abotire ne anu nonɛ te sikaa kɔkorɛ kilo aburasa ne nna, na né pɔkoaa wura nu. Ɔfale koɛ nu nzesadeɛ pee fili kuro ne anu hɔle.

³¹Dawide sesale kuro berɛ ama hɔle, na ɔmaa bɛfale sralaa, kona ne akumaa bɛyɔle adwuma, na ɔmaa bɛpɛle mmerekese koso. Sɔ yeɛ ɔyɔle ye wɔ Amonfoɛ nguro ne amukoraa so ɔ. Afei Dawide ne koɛhonɛfoɛ ne amu besa bɛhɔle Yerusalem.