Read Sehwi 2 Samuel 22 Bible Online

2 Samuel 22 - Sehwi bible

2 Samuel 22

¹Mmerɛ bɔ AWURADE lele Dawide fili ye pɔfoɛ amukoraa sa nu ne Sɔɔlo sa nu ne, Dawide tole dwein he yele AWURADE ayɛ.

²Ɔtole ye kyɛ, “AWURADE te me nyɔbotaen, m’anwoserɛ afealeɛ ne me defoɛ,

³me Nyameɛ, me nyɔbotaen bɔ mebɔ me nwo waen wɔ nu ɔ, m’akokyɛm ne me ngoalelɛ anwoserɛ, m’anwoserɛ afealeɛ ne me nwo adwaa, me defoɛ bɔ ode me fi basabasayɔlɛ nu ɔ.

⁴AWURADE bɔ ɔfata ayɛyelɛ ne, ye yeɛ mesu mefrɛ ye ɔ, na ode me fi me pɔfoɛ mɔ sa nu.

⁵Ewue asorɔkye pɛle me nwo yiale, na ewue bu fale me so kyɛ asue.

⁶Ɛborɔ dɔ nyamaa mendale me, na ewue ngaen wale me so kyɛ ɔbaahye me.

⁷Nzu mvrɛle AWURADE wɔ m’amaneɛ nu, na ndeane nu mvrɛle me Nyameɛ kyɛ ɔboka me. Ɔwɔ ye asɔneyɛɛ sua nu yeɛ ɔtele me mbaeɛ ɔ, na me sufrɛ dwuli ye so anu.

⁸Yeɛ aseɛ pusuli, na ɔwosole; nyameɛso nyinasoɛ ye bo kekane, na ɔwosole, ɔnate kyɛ Nyameɛ ahone huli.

⁹Nwosina fili ye bonyi anu pu wale, see wuronyiwuronyi fili ye noa nu wale; na see bɔ wasɔ gonn fili ye nwo tutu guale.

¹⁰Ɔmoamoane ewienu, na odwuli ase, na né awosii kabii wɔ ye gya bo.

¹¹Ɔtenane kɛrubo so tuli, na benwuni ye wɔ mvrama ye ndaa so.

¹²Ɔfale awosii munduni ye nwo, ɔfale munungum kusuu, bɔ ɔte esue bɔ wamuna ɔ katale ye nwo.

¹³Kanea hyireinn bɔ oli ye nyunu ne, see gonn fili nu tutu guale.

¹⁴AWURADE bɔle nu kurudududu fili nyameɛso, na Anwuro Anwuro Nyameɛ ne dwudwole.

¹⁵Ɔtotole agyaen mane ye pɔfoɛ mɔ bɔle aya, ye agralaa ne mane bɛ nye so tanene.

¹⁶Afei AWURADE hane bɛ nyunu, nwomeɛ fili ye bonyi anu tu wale, yiti ɛpo ye bo dɔ aseɛ yele ye nwo ali, na aseɛ nyinasoɛ nwo lale berɛ.

¹⁷Ɔtengyɛle ye sa fili anwuro ɔɔsɔle me nu, na ɔyele me fili buma nu.

¹⁸Olele me fili me pɔfoɛ anwoserɛniɛ sa nu, ɔne bɛ bɔ bekyi me ɔ bɛ sa nu; ofikyɛ né bɛ nwo yɛ se tra me koraa.

¹⁹M’amaneɛnwunɛ mmerɛ nu yeɛ bɛwale me so ɔ, nakoso AWURADE gyinane me si.

²⁰Ɔfale me hɔle nekaa bɔ berɛ te pandann ɔ, ɔpepɛ lele me, ofikyɛ okuro me dwirɛ.

²¹“AWURADE neane kyɛbɔ mesi metengyɛ ɔ so mane me ye nwo akatuaa, ogyinane kyɛbɔ me bra si te sannwuu ɔ so mane me ye nwo akatuaa.

²²Ofikyɛ mali AWURADE dwirɛ so, na nnyɔle bɔne nngakyili me si mmmane Nyameɛ.

²³Mali ye nhyehyɛleɛ amukoraa so, yeɛ ye ahyɛdeɛ koso, nndwene me nwo mmvili ye nwo.

²⁴M’atee tengyɛ wɔ ye nyunu, na mate me nwo mafi bɔne nwo.

²⁵Ye sɔ ne ati, AWURADE agyina me tengyɛlɛ so wama me ye nwo akatuaa, wagyina kyɛbɔ me bra te sannwuu wɔ ye nyunu ɔ so.

²⁶Sona bɔ odi nahorɛ ma wɔ ne, wɔ wora edi nahorɛ ma ye, yeɛ bɔ mvomsoɛ nne ye nwo ne, wɔ wora ɛmaa onwu kyɛ mvomsoɛ nne wɔ nwo.

²⁷Bɔ ye nwo te ne, wɔ wora ɛmaa onwu kyɛ wɔ nwo te, nakoso sona bɔ ɔte kanda de, ɛmaa onwu kyɛ ɛse nworɛ tra ye.

²⁸Ɛpepɛ de anwobrɛaseɛfoɛ, nakoso anwomasoɛfoɛ de, wɔ nye sa bɛ maa ɛbrɛ bɛ ase.

²⁹O AWURADE, wɔ yeɛ ɛte me kanea ɔ, AWURADE, ɔta maa menya kanea wɔ m’awosii nu.

³⁰Egyina me si maa medi ɛlɔen so ngonim, me Nyameɛ gyina me si maa mehuru mefa fasue so.

³¹Sɔ Nyameɛ he, ye atee tengyɛ, AWURADE bɔhyɛ te nahorɛ, na ebiala bɔ ɔbɔ ye nwo waen wɔ Nyameɛ nu ne, Nyameɛ te ye akokyɛm.

³²“Nwa yeɛ ɔte Nyameɛ ɔ? Sana AWURADE angome. Nwa yeɛ ɔte nyɔbotaen ɔ? Sana yɛ Nyameɛ angome.

³³Sɔ Nyameɛ he bɔ ɔma me anwoserɛ ne, ɔbɔ asomdwee atee pralaa to berɛ ma me.

³⁴ Ɔma me gya boso yɛ nyera kyɛ kɛtɛbɔɔ, na ɔmaa megyina pindinn wɔ mmokaa so.

³⁵Okyire me koɛhonɛ, amaa ɔnate so mekora mekondo kɔɔbere agyaen nu.

³⁶Afa wɔ ngoalelɛ akokyɛm ne ama me, na wɔ mmokalɛ amaa mayɛ sona titire.

³⁷Ɛbɔ atee pralaa maa mefa so bɔ ɔmaa menzoti ɔ.

³⁸Mvoane me pɔfoɛ mɔ ngukuni bɛ, na manza me si kɔpem kyɛ ngukuni bɛ ɔ.

³⁹Nnili bɛ so ngonim, mmobɔle bɛ nguale berɛ bɔ bangora dwɔso ko ɔ, na bɛtotɔle beguale me gya bo.

⁴⁰Ɛmane me koɛ nu anwoserɛ, na ɛmane me pɔfoɛ mɔ lili ngoguo wɔ me nyunu.

⁴¹Ɛmane me pɔfoɛ mɔ nwati fili me nyunu, bɛ bɔ bekyi me ne, nnuane bɛ boso.

⁴²Bɛtotole bɛ nye, nakoso bannya defoɛ biala, besu bɛfrɛle AWURADE, nakoso wandɛ bɛ so.

⁴³Ndini bɛ muhumuhu kyɛ aseɛnwo mvuture, na ndiatiale bɛ so nwɔle bɛ kyɛ dwaaso nnɛterɛ.

⁴⁴Me mmenia bɔ bɛyɔle me nwo lɔen ne, ɛpepɛ lele me fili bɛ sa nu. Ɛfale me tuale maen maen noa, na mmenia bɔ né menze bɛ ɔ bɛsole me.

⁴⁵Maen maen so ama wale bɛɛkotole me, bɛtele me nga pɛ yeɛ bɛyɛle sotie bɛmane me ɔ.

⁴⁶Ahunundetelɛ tɔle maen maen so ama so, na bɛfale anwopopolɛ befili b’anwoserɛ afealeɛ mɔ nu befite bɛwale.

⁴⁷AWURADE te ase! Me nyɔbotaen, meye wɔ ayɛ! Me Nyameɛ, bɔ ɛte me ngoalelɛ Nyɔbotaen, mekamvo wɔ!

⁴⁸Nyameɛ bɔ ɔtɔ me pɔfoɛ so wereɛ ma me ɔ, ye bɔ ɔbrɛ maen maen mɔ ase wura me bo ɔ,

⁴⁹ye bɔ ode me fi me pɔfoɛ mɔ sa nu ɔ; bɛ bɔ bedwɔso betia me ne, wɔ yeɛ ɛma me so maa bewura me bo ɔ, na ede me fi mmenia bɔ awosii wɔ bɛ ti anu ɔ bɛ sa nu.

⁵⁰ Yiti, O AWURADE, ngɔkamvo wɔ wɔ maen maen mɔ so, ná mabɔ wɔ dumaa mato ayɛyelɛ dwein.

⁵¹Odi ngonim piri paa ma ye hene ne, ɔye ɔdɔ onni ngasi ali kyire sona bɔ wapopa ye ngoo ne, ɔye ye ali kyire Dawide ne ye boso ama afebɔɔ.”