Read Sehwi 2 Samuel 7 Bible Online

2 Samuel 7 - Sehwi bible

2 Samuel 7

¹Afei Nana Dawide tenane ye awuro, na AWURADE mane ye asomdwee fili ye pɔfoɛ amukoraa bɔ bapɛ ye nwo bayia ɔ sa nu ne,

²Nana Dawide sele Ngɔmhyɛlɛniɛ Natan kyɛ, “Nea, nde awuro bɔ bafa sida basi ɔ nu, nakoso Nyameɛ alaka ne de, ogyi ɛtena sua nu.”

³Na Natan buale Nana Dawide kyɛ, “Bɔ adwene ye nwo kyɛ ɛkɔyɔ ne, yɔ, ofikyɛ AWURADE gyi wɔ si.”

⁴Nakoso sɔ kyẽa ne kɔngɔen, AWURADE lale ye dwirɛ ali hyirele Natan kyɛ,

⁵“Kɔha kyire me somvoɛ Dawide kyɛ, AWURADE nwa nyoo: Wɔ yeɛ ɛbaasi sua maa metena nu anaa?

⁶Ofi kyẽa bɔ nyele Yisraelfoɛ mvili Misraim mmale bɔ ɔbaadwu ɛnɛ ɔ, nndenane awuro nu le; na mmom medi tutena wɔ ɛtena sua ne nyianu sua nu.

⁷Nekaa biala bɔ mali tutena me ne Yisraelfoɛ amukoraa yahɔ ne, Yisrael mbanyi bɔ maye bɛ kyɛ bɛnea me maen Yisrael so ne, aso mabɔ bɛ nu bie somoɛ kyɛ, ‘Nzu ati yeɛ ɛmɔamva sida banzi awuro bamma me ɔ?’

⁸“Yiti ka kyire me somvoɛ Dawide kyɛ, Asafo AWURADE nwa nyoo: Me yeɛ nyele wɔ mvili mmoaen nealɛ nu, ɔne mmoaen si lilɛ nu, ná mvale wɔ nduale me maen Yisrael noa ɔ.

⁹Magyina wɔ si wɔ nekaa biala bɔ ɛhɔle ɔ, maprapra wɔ pɔfoɛ amukoraa mafi w’atee nu, na mapagya wɔ dumaa maa wayɛ kyɛ aseɛ ye aso atitirefoɛ bɛ dumaa.

¹⁰Asa koso, ngɔma me maen Yisrael nekaa maa ɔkɔtena. Ngɔbɔ bɛ atenaseɛ wɔ bɛ bɔbɔ b’aseɛ so, bɔ ebiala ngɔha bɛ ko, bɔ amumuyɛɛfoɛ ngɔhyɛ bɛ so ko, kyɛbɔ bɛyɔle ye daa

¹¹fite mmerɛ bɔ nyele maenbulɛfoɛ maa beelili me maen Yisrael so ne ala. Ngɔma wɔ asomdwee ngofi wɔ pɔfoɛ amukoraa bɛ sa nu. Asa koso, AWURADE ka kyire wɔ kyɛ, ɔkɔma wɔ boso ama kɔhɔ so koli hene.

¹² Sɛ wɔ mmerɛ so ná ɛtoa wɔ mbanyi mɔ a, ngɔpagya wɔ bosofoɛ nemɔ ko, bɔ ɔte wɔ kunu ba, na ngɔma ye ahennie kotindim.

¹³Ye yeɛ okosi sua kɔfa me dumaa kɔto so ɔ, na ngɔma ye ahennie kotindim afebɔɔ.

¹⁴ Ngɔyɛ ye baba, ná ye wora wayɛ mma. Sɛ ɔyɔ mvomsoɛ a, ngɔfa bakaa ne mbire ngɔtea ye, kyɛbɔ kuro sona tea ɔwa ɔ.

¹⁵Nakoso me dɔ pindinn ne de, mengɔye ngofi ye so, kyɛbɔ nyele ɔdɔ ne mvili Sɔɔlo so ne. Ye yeɛ nduli ye mvili bia so mvale wɔ nziele so ɔ.

¹⁶ Wɔ boso ama ne w’ahennie kotindim afebɔɔ wɔ me nyunu, na wɔ bia kotindim afebɔɔ.”

¹⁷Na Natan hane edwirɛ ne amukoraa ne nyekyire ne amukoraa pɛpɛɛpɛ hyirele Dawide.

¹⁸Afei Nana Dawide ɔɔtenane AWURADE nyunu, na ɔhane kyɛ, “Ao, AWURADE Nyameɛ, me ole nwa, yeɛ m’abusua gyi ye sɛ, bɔ apagya me amaa manya dibea sɔa ye?

¹⁹Nakoso AWURADE Nyameɛ, bɔ ayɔ ne po, ɔte wɔ nye so nikyee kaaba bie, ofikyɛ asa aha kyɛ ɛkɔma wɔ somvoɛ ne ye boso ama yɛkoli hene mmerɛ tendetende. Ao, AWURADE Nyameɛ, sɔ yeɛ ahyehyɛ ato berɛ ama adasa anaa?

²⁰Nzikyɛ dwirɛ bieku koraa yeɛ nga ngyire wɔ ɔ? Ofikyɛ, AWURADE Nyameɛ, wɔ yeɛ ɛse wɔ somvoɛ ɔ.

²¹Ɔnate wɔ bɔhyɛ ne, ɔne wɔ ti anu dwirɛ ne ati, yeɛ ayɔ nikyee piri he ɔ, kyɛ ɛkɔma wɔ somvoɛ konwu ye ɔ.

²²O, AWURADE Nyameɛ, ɛte piri. Edwirɛ amukoraa bɔ yate ye wɔ yɛ so anu ne, okyire kyɛ ebiala nne berɛ bɔ ɔte kyɛ wɔ ɔ, yeɛ nyameɛ biala nne berɛ kyɛ wɔ.

²³ Maen beni yeɛ ɔwɔ aseɛ ye aso bɔ ɔte kyɛ wɔ maen Yisrael ɔ? Yisrael bɔ Nyameɛ ɔɔpɔle ye fa yɛle ye maen, bɔ ɔnate so Nyameɛ dumaa trɛle, bɔ yiti Nyameɛ foane maen maen mɔ ne bɛ nyameɛ mɔ fili ye mmenia nyunu, ná ɔyɔle nningyein mbiri mbiri ne anwanwadeɛ mane bɛ ne.

²⁴Afa wɔ maen Yisrael ayɛ wɔ bɔbɔ deinn wɔ maen afebɔɔ, na wɔ, AWURADE, ayɛ bɛ Nyameɛ.

²⁵Afei, ao, AWURADE Nyameɛ, kyɛbɔ aha afa wɔ somvoɛ ne ye boso ama nwo ne, maa ɔbra nu afebɔɔ. Kyɛbɔ ahyɛ bɔ ne, yɔ sɔ ala.

²⁶Na bɛkɔbɔ wɔ dumaa bɛkɔkamvo wɔ daa kyɛ, ‘Asafo AWURADE te Nyameɛ bɔ odi Yisrael so ɔ.’ Na wɔ somvoɛ Dawide boso ama bekogyina pindinn wɔ wɔ nyunu.

²⁷Ofikyɛ wɔ, Asafo AWURADE, Yisrael Nyameɛ, aye wɔ somvoɛ asotire kyɛ, ‘Ngɔma wɔ boso ama kɔhɔ so koli hene.’ Na ɛhe yeɛ wahyɛ wɔ somvoɛ nguraen bɔ ɔmaa ɔbɔ sɔ mbaeɛ he kyire wɔ ye.

²⁸O, AWURADE Nyameɛ, wɔ yeɛ ɛte Nyameɛ ɔ, wɔ dwirɛ te nahorɛ, na afa sɔ ndɛenvɛen he ahyɛ wɔ somvoɛ bɔ.

²⁹Yiti mesrɛ wɔ ala, yira wɔ somvoɛ boso ama, ná maa bɛhɔ so betindim wɔ wɔ nyunu afebɔɔ. Ofikyɛ, AWURADE Nyameɛ, wɔ yeɛ aha sɔ dwirɛ ye ɔ, na wɔ yeɛ ɛkɔma wɔ somvoɛ boso ama bekonya wɔ saleɛ ne afebɔɔ ɔ.”