Read Sehwi 2 Samuel 9 Bible Online

2 Samuel 9 - Sehwi bible

2 Samuel 9

¹ Ɛlɛho bie, Dawide bisale kyɛ, “Sɔɔlo boso ama ne, aso ebie tɛ wɔ berɛ bɔ ɔnate Yonatan ti ɔsɛ kyɛ meyɛ ye paa ɔ?”

²Né Sɔɔlo awuro somvoɛ bie wɔ berɛ. Oli Siba. Bɛɛfrɛle ye bɛbrɛle Nana Dawide, na Dawide bisale ye kyɛ, “Wɔ yeɛ eli Siba ne?” Na obuale kyɛ, “Nana, w’akoaa, me ɔ.”

³ Na Nana Dawide bisale ye kyɛ, “Aso Sɔɔlo bosoniɛ bie tɛ wɔ berɛ bɔ ngɔhora ngɔfa me nye ngɔto Nyameɛ anwumvoinnwunɛ so ngɔboka ye ɔ?” Na Siba buale Nana Dawide kyɛ, “Waha Yonatan awa bienzua ko; ɔte bubuaniɛ.”

⁴Yeɛ Nana Dawide bisale Siba kyɛ, “Ɔwɔ nisua?” Na obuale Nana kyɛ, “Ɔwɔ Amiɛl awa Makyiri awuro wɔ Lodeba.”

⁵Yeɛ Nana Dawide somane maa bɛɛfale ye befili Amiɛl awa Makyiri awuro wɔ Lodeba bɛwale.

⁶Na Sɔɔlo awa Yonatan ɔwa Mefibosɛte oodwuli Dawide nyunu berɛ ne, ɔfale ye nyunu butuli berɛ anidie nu. Yeɛ Dawide frɛle ye kyɛ, “Mefibosɛte!” Na osurole kyɛ, “Nana, w’akoaa, me ɛhe.”

⁷Na Dawide sele ye kyɛ, “Nnɛsuro, na ɔnate wɔ baba Yonatan ti ngɔyɛ wɔ paa. Wɔ nana Sɔɔlo aseɛ ne, ngɔfa ye mukoraa ngɔma wɔ, na ɛne me kɔtena ɛpoen ko anwo yɛkodidi daa.”

⁸Yeɛ Mefibosɛte fale ye nyunu butuli berɛ sele kyɛ, “W’akoaa, kyea fuin bɔ ɔte kyɛ me ɔ, nde nzu bɔ alo me sɔa ɔ?”

⁹Afei Nana Dawide maa bɛɛfrɛle Siba bɛwale, na osele ye kyɛ, “Nikyee biala bɔ ɔte Sɔɔlo ne ye abusua deɛ ne, mafa mama wɔ mene Sɔɔlo anomaa ne.

¹⁰Ɛne wɔ mma ne wɔ somvoɛ mɔ, odi kyɛ ɛmɔyɔ aseɛ ne aso adwuma bɛma ye. Fa so aleɛ bra, amaa ɔnate so wɔ mene anomaa Mefibosɛte wanya aleɛ wali. Na wɔ mene anomaa ne de, ɔne me kɔtena ɛpoen ko anwo yɛkodidi daa.” Né Siba le mmaa mmienzua buru ne nnu ne somvoɛ aburanyɔ.

¹¹Na Siba sele Nana Dawide kyɛ, “Nana, me mene, nikyee biala bɔ ahyɛ wɔ somvoɛ kyɛ nyɔ ne, sɔ ala yeɛ wɔ somvoɛ ngɔyɔ ɔ.” Na Mefibosɛte ne Dawide bɛtenane ɛpoen ko anwo bedidili, kyɛ Dawide mma nemɔ nu ko ala.

¹²Né Mefibosɛte le baa abɛɛmaa bie bɔ oli Mika. Na Siba awuro ama mukoraa bɛɛyɛle Mefibosɛte somvoɛ.

¹³Na Mefibosɛte tenane Yerusalem, ofikyɛ né ɔne Nana Dawide bɛtena ɛpoen ko anwo bedidi daa biala. Né ye gya ne amunyɔ bɛtte mayee.