Read Sehwi 1 Ahemvo 10 Bible Online

1 Ahemvo 10 - Sehwi bible

1 Ahemvo 10

¹ Hyeba hemmaa tele Solomon nga kyɛ wale dumaa paa. (Ɔnate AWURADE dumaa ti yeɛ olele dumaa ɔ.) Yiti Hyeba hemmaa hɔle kyɛ ɔkwaafa adwobisa bɔ ye noa yelɛ yɛ se ɔ oso ye nea.

²Ɔne ye sasofoɛ pee paa yeɛ bɛhɔle Yerusalem ɔ, na bɛfale sɔ nningyein hemɔ bɛtale afupɔngɔ mɔ si yeɛ bɛhɔle ɔ: ayirefona, esikaa kɔkorɛ pee ne nyɔboɛ bɔ ye nyɔboɛ yɛ se ɔ. Na oodwuli Solomon berɛ ne, ye dwirɛ amukoraa bɔ ɔkye ye adwene ne, obisale Solomon.

³Solomon yele ye adwobisa ne amukoraati noa; edwirɛ biala nne berɛ bɔ Nana solomon wangora wangyirekyire nu wangyire ye ɔ.

⁴Hyeba hemmaa nwuni kyɛ Solomon le edwirɛ biala nwo nworɛ. Na onwuni sua bɔ wasi,

⁵ye poen so aleɛ, kyɛbɔ ye mbanyi nemɔ besi bɛtenatena bɛpɛ ye nwo beyia, kyɛbɔ ye somvoɛ nemɔ besi bɛso ye, bɛ ndaadeɛ, ye nzaasulɛfoɛ, ye naen yeralɛ afɔleɛ bɔ ɔbɔle ye wɔ AWURADE awuro ne anu ne, ye nwo dwirili ye.

⁶Yiti osele Solomon kyɛ, “Edwirɛ bɔ ndele ye wɔ me bɔbɔ me maen nu dɔ bɔ ɔfa wɔ nningyein bɔ ayɔ ɔne wɔ nworɛ nwo ne, ɔte nahorɛ.

⁷Nakoso manne edwirɛ bɔ ndele ne manni kɔpem kyɛ me bɔbɔ mvale me nye nwuni ye ɔ. Bɔ ndele ne, ondwu bɔ manwu ye ne ye bue po. Wɔ nworɛ ne w’anwonya ɔbo bɔ ndele ne aso koraa.

⁸Ɛye mɔ ato ali! Wɔ somvoɛ hemɔ bɔ daa bɛso wɔ ná betie wɔ nworɛ dwirɛ ne, bato bali!

⁹Animnyam hã AWURADE wɔ Nyameɛ bɔ wahuro wɔ dwirɛ, ná wafa wɔ wasie Yisrael bia so ɔ! Ɔnate kyɛ AWURADE hurole Yisrael dwirɛ afebɔɔ ne ati, wamaa ali hene kyɛ ɛfa ndɛen turoloobualɛ ne bra bɔ ɔtengyɛ ɔ ebu maen ne.”

¹⁰Yeɛ Hyeba hemmaa mane Nana Solomon esikaa kɔkorɛ kilo apee nna, ayirefona ahoroɔ pee ɔne nyɔboɛ bɔ ye nyɔboɛ yɛ se ɔ pee. Ayirefona ahoroɔ bɔ Hyeba hemmaa fa mane Solomon ne, ebiala amva bɔ ye somaa te sɔ ɔ wammrɛ Nana Solomon ko le.

¹¹Afei koso, Hiram ɛlɛen mɔ bɔ bɛsoale esikaa kɔkorɛ befili Ofire ne, bɛfale asamvona ne nyɔboɛ bɔ ye nyɔboɛ yɛ se ɔ pee befili Ofire bɛwale.

¹²Nana Solomon fale asamvona ne bie yɛle AWURADE awuro berɛ ne ahemvie berɛ atweleɛ nemɔ. Ɔfale bie koso sele sangoo ne adengum mane edweintolɛfoɛ ne. Ɔbaadwu ɛnɛ ye, sɔ asamvona ne, ye sɛso, bɛffale bie bɛwwale berɛ, yeɛ bennwuni bie koso ko wɔ berɛ le.

¹³Nana Solomon mane Hyeba hemmaa nikyee biala bɔ obisale ɔ, na Solomon sa neane ye nningyein nu hyɛle ye nikye. Na Hyeba hemmaa ne ye somvoɛ nemɔ, besa bɛhɔle bɛ kuro.

¹⁴Afoɛ biala, esikaa kɔkorɛ bɔ bɛfa bɛbrɛ Nana Solomon ne, nu nonɛ te kilo apee aburanyɔ ne nza,

¹⁵asora bɔ né benya befi dwadifoɛ nemɔ, bɛbɔ bɛkɔ atee so nemɔ, Arabia ahemvo amukoraa ɔne maen ne anu amrado nemɔ berɛ ɔ.

¹⁶Nana Solomon borole esikaa kɔkorɛ yɔle akokyɛm ngandinga ɛyaa nyɔ. Ɔfale esikaa kɔkorɛ kilo nzoo yeɛ ɔyɔle akokyɛm ko biala ɔ.

¹⁷Ɔfale esikaa kɔkorɛ bɔ baboro ɔ yɔle akokyɛm ɛyaa nza: esikaa kɔkorɛ kilo nyɔ yeɛ ɔfa yɔle akokyɛm ko biala ɔ. Na Solomon fale bɛ ooguale awuro bɔ bɛfrɛ ye Lebanon Ɛhɔayeɛ ne anu.

¹⁸Osa fale ɛsoen gye yɔle ahennie bia kandinga, na ɔfale esikaa kɔkorɛ paa paa borole ye nwo.

¹⁹Ahennie bia ne, né ole atweleɛ bɔ ye ndiasoɛ te nzia ɔ. Bia n’anwuro ne, né ye si ne te kurukuru, na ye ngyɛnu ne ngyɛnu ne, né ole nekaa bɔ bɛfa bɛ sa bɛto ɔ. Bɛyɔle gyata nyɔ bɔ ko wɔ nekaa bɔ bɛfa bɛ sa bɛto ne biala ɔ.

²⁰Ɔyɔle gyata buru ne nyɔ. Atweleɛ ndiasoɛ nzia ne, ko biala, né gyata ko gyi ye bɛen, yeɛ ko wora gyi ye famaa so. Sɔ bia ne, né bɛyyɔle ye sɛso wɔ ahennie biala anu le.

²¹Nana Solomon kulie bɔ ɔno nu amukoraa, bɛfale esikaa kɔkorɛ yeɛ bɛyɔle ɔ. Na sua bɔ bɛfrɛ ye Lebanon Ɛhɔayeɛ ne anu nningyein amukoraa, bɛfale esikaa kɔkorɛ paa yeɛ bɛyɔle ɔ. Nu ko po nne berɛ bɔ bɛfale ɛdwetɛ yeɛ bɛyɔle ɔ, ofikyɛ Solomon aberɛ so, né bemmu ɛdwetɛ nikyee titire biala.

²²Ofikyɛ né Nana Solomon le Tasise ɛlɛen pee bɔ begua ɛpo so bɛboka Hiram ɛlɛen nemɔ aso ɔ. Afoɛ nza biala, Tasise ɛlɛen pee nemɔ bɛfa esikaa kɔkorɛ, ɛdwetɛ, ɛsoen gye, kondromvi mɔ ne asraen mɔ bɛba.

²³Yiti né Nana Solomon anwonya ne ye nworɛ tra aseɛ ye aso ahemvo amukoraati.

²⁴Aseɛ ye aso mmenia amukoraa hurole kyɛ bɛkɔhɔ Solomon gya so bekotie ye nworɛ dwirɛ bɔ Nyameɛ afa awura ye ti anu ne.

²⁵Afoɛ biala, mmenia fale akyɛdeɛ hemɔ pee bɛɛmane ye: ɛdwetɛ ne esikaa kɔkorɛ nningyein, ndena, akodeɛ, ayirefona, mbɔngɔ ne afunum.

²⁶Solomon boaboale teaseɛnam mɔ ne mbɔngɔ noa. Né ole teaseɛnam apee ko ɛyaa nna ne pɔngɔhanɛfoɛ apee buru ne nyɔ. Ɔfale bie hɔle mbɔngɔ nguro biemɔ aso, yeɛ ɔmane ebie koso hale ye nwo berɛ wɔ Yerusalem.

²⁷Nana Solomon mane ɛdwetɛ buli wɔ Yerusalem kyɛ nyɔboɛ, yeɛ ɔmane sida koso buli kyɛ aseɛ frɛtɛɛ so akyea.

²⁸Solomon herale mbɔngɔ fili Misraim ne Kue, na bɛ nyɔboɛ bɔ bapɛ bato berɛ ne yeɛ Nana Solomon dwadifoɛ nemɔ betuale bɛmane Kuefoɛ nemɔ ɔ.

²⁹Teaseɛnam ko biala bɔ bɛhera befili Misraim ne, ye nyɔboɛ te ɛdwetɛ sekel ɛyaa nzia, yeɛ pɔngɔ ko biala koso te ɛdwetɛ sekel ɛyaa ko aburannu. Yiti Nana Solomon dwadifoɛ nemɔ, né bɛfa bie bɛkɔma Hiti ahemvo ne Siria ahemvo maa bɛtɔ.