Read Sehwi 1 Ahemvo 19 Bible Online

1 Ahemvo 19 - Sehwi bible

1 Ahemvo 19

¹Bɔ Elia yɔle ne amukoraa, ɔne kyɛbɔ ole ngrandɛ huhuni Baal ahɔmeɛ nemɔ amukoraa ne, Ahabo bɔle Yesebɛl amaneɛ.

²Yeɛ Yesebɛl tuli ɛbɔfoɛ maa oosele Elia kyɛ, “Kyɛ odwu ɛhema bekye sɔa, sɛ mangu wɔ kyɛ mmenia bɔ ahũhũ bɛ ne anu ko a, me koso mmosoen nemɔ behũ me bie.”

³Né Elia suro, yiti ɔnwatili maa ɔnate so onyane ye ti didili nu. Oodwuli Yuda kuro Beɛ Hyeba, na ɔyakyili ye somvoɛ ne berɛ.

⁴ Nakoso Elia bɔbɔ de, ɔpɛle atee bɔ bɛfa ɛlɛho yeɛ bɛpɛ ɔ hɔle ɛserɛ so, na ɔɔtenane tanure bie abo. Ɔyɛle ye adwene kyɛ owuli po ahaa okuro. Ɔhane kyɛ, “Afei de wayɛ yé, ao AWURADE, ku me pɛen ko, na nnde paa mendra me nana mɔ.”

⁵Elia lale tanure ne abo berɛ na ɔfale nu lafele. Mvum nu, abɔfo bie fale ye sa hane ye, na osele ye kyɛ, “Dwɔso ná didi.”

⁶Elia pagyale ye ti, na onwuni apiti bɔ bato ye nyɔboɛ hyerɛhyerɛ so ɔ, ɔne nzue bua ko kyɛ begyi nekaa bɔ ye ti la ne ɔ. Odidili none nzue, na osa fale nu lafele.

⁷AWURADE abɔfo ne sa wale ɔɔfale ye sa hane Elia, na osele ye kyɛ, “Dwɔso na didi, anyɔ sɔ a, atee ne pɛlɛ kɔyɛ se kɔma wɔ.”

⁸Elia dwɔsole, odidili none nzue, na anwoserɛ bɔ onyane wɔ aleɛ ne anu ne, ɔfa natele eyia ne kɔngɔen sɔ alaa eleburanna, hɔle Nyameɛ bokaa Horebo so.

⁹Oodwuli nyɔboɛ bɔ wasi sua bie anu wɔ berɛ, na ɔlale berɛ sɔ kɔngɔen ne. Yeɛ AWURADE lale ye dwirɛ ali hyirele Elia, na obisale ye kyɛ, “Elia, w’amaneɛ wɔ wa?”

¹⁰Obuale kyɛ, “Matu me nwo masie berɛ kyɛ meko mema AWURADE Asafo Nyameɛ, ofikyɛ Yisraelfoɛ bahwi bafa w’apam ne aso, badwiri w’afɔleɛ bokyea mɔ bagua ase, yeɛ bele ngrandɛ bahũhũ wɔ ngɔmhyɛlɛfoɛ mɔ. Waha me ngome twe, na bɛpena me beku me.”

¹¹Afei osele Elia kyɛ, “Kɔ bokaa ne aso kogyina AWURADE nyunu, ofikyɛ AWURADE baapɛ nu.” Afei mvrama kandinga bie tuli. Né mvrama ne noa yɛ se paa, yiti odwudwale mmokaa ne nyɔbotaen mɔ nu wɔ AWURADE nyunu, nakoso né AWURADE ɔnne mvrama ne anu. Mvrama ne asi ne, aseɛ wosole, nakoso né AWURADE ɔnne aseɛwosolɛ ne anu.

¹²Aseɛwosolɛ ne asi ne, Elia nwuni see, nakoso né AWURADE ɔnne see ne anu. See ne asi, ɔtele komviɛ kaaba bɛtɛɛ bie.

¹³Elia tele komviɛ ne nen, ɔfale ye ataadeɛ aguasoɛ kyekyele ye nyunu, na ofitele oogyinane nyɔboɛ bɔ wasi sua ne anoa. Berɛ, komviɛ bie bisale ye kyɛ, “Elia, w’amaneɛ wɔ wa?”

¹⁴Obuale kyɛ, “Matu me nwo masie berɛ kyɛ meko mema AWURADE Asafo Nyameɛ, ofikyɛ Yisraelfoɛ bahwi bafa w’apam ne aso, badwiri w’afɔleɛ bokyea mɔ bagua ase, yeɛ bele ngrandɛ bahũhũ wɔ ngɔmhyɛlɛfoɛ mɔ. Waha me ngome twe, na bɛpena me beku me.”

¹⁵ Yeɛ AWURADE sele ye kyɛ, “Sa wɔ si kɔ Damasko ɛserɛ ne aso. Sɛ edwu a, popa Hasael ngoo fa ye si Siria so hene.

¹⁶ Afei koso, popa Nimisi awa Yehu ngoo fa ye si Yisrael so hene, ná Elisa bɔ ye baba ole Safate bɔ ofi Abel Mehola ne, popa ye ngoo ma osi wɔ gya nu ɔyɛ ngɔmhyɛlɛniɛ.

¹⁷Sona biala bɔ Hasael wannya ye wangu ye ne, odi kyɛ Yehu ku ye. Na sona biala bɔ Yehu wannya ye wangu ye ne, odi kyɛ Elisa ku ye.

¹⁸ Nakoso ngɔyakyi mmenia apee nzoo maa bekonya bɛ ti bekodidi nu wɔ Yisrael, bɔ bɛ nu biala ɔffale ye nangoroma ɔkkotole Baal le, bɔ ɔffele Baal noa le ɔ.”

¹⁹Yiti Elia sili nu fili berɛ, na onwuni Safate awa Elisa kyɛ ofundam aseɛ bɔ bɛfa bɛyɔ eboo ɔ. Né nandwie nyɔ nyɔ bɔ kɔnnua sosɔ bɛ ɔ sɔ alaa buru ne nyɔ beli Elisa nyunu. Né Elisa ɔfa kure bɔ ɔtɔ so buru ne nyɔ ne ofundam aseɛ ne. Elia ɔɔfale ye nwo berɛ, na Elia tole ye ataadeɛ aguasoɛ ne guale ye so.

²⁰Elisa yakyili nandwie nemɔ berɛ, otuli amirika lili Elia si, na Elisa sele kyɛ, “Maa ngɔngra me baba ne me maame, ná afei mmani wɔ si.” Yeɛ Elia buale ye kyɛ, “Sá wɔ si kɔ, nnyɔle hwee mva nnzili wɔ ate.”

²¹Elisa andoa so wanni Elia si. Elisa ɔɔfale ye nandwie nyii nyɔ bɔ bafa kɔnnua basosɔ bɛ babɔ nu nemɔ, na ohuhuni bɛ. Mmakaa bɔ ɔsosɔ bɛ ne, ɔfa sɔle see tone bɛ naen ne, na ɔfa mane mmenia nemɔ maa belili. Afei osili nu oolili Elia si, na ɔɔyɛle Elia somvoɛ.