Read Sehwi 1 Ahemvo 22 Bible Online

1 Ahemvo 22 - Sehwi bible

1 Ahemvo 22

¹Afoɛ nza, koɛ andɔ Siria ne Yisrael b’afia.

²Nakoso afoɛ bɔ ɔtɔ so nza ne anu, Yuda hene Yehosafate ɔɔpasale Yisrael hene anwo.

³Na Yisrael hene bisale ye bɔbɔ ye mbanyi mɔ kyɛ, “Aso ɛmɔse kyɛ Ramote Gileade ɔte yɛ deɛ, nakoso yɛnyɔ ye nwo hwee kyɛ yɛkole yɛkofi Siria hene sa nu ɔ?”

⁴Na obisale Yehosafate kyɛ, “Ɛkɔboka me maa yɛkɔfa koɛ yɛkɔɔtoa Ramote Gileade anaa?” Yehosafate buale Yisrael hene kyɛ, “Me ne wɔ de, yɛte sona ko. Me koɛhonɛfoɛ te wɔ koɛhonɛfoɛ, yeɛ me mbɔngɔ te wɔ mbɔngɔ.”

⁵Nakoso Yehosafate sa sele Yisrael hene kyɛ, “Di moa fa to AWURADE nyunu tie ye noa dwirɛ koraka.”

⁶Yiti Yisrael hene boaboale ngɔmhyɛlɛfoɛ nemɔ noa. Bɛ somaa te kɔyɛ ɛyaa nna. Na obisale bɛ kyɛ, “Mva koɛ ngɔndoa Ramote Gileade, anaa nyakyi?” Bebuale kyɛ, “Nana, kɔ, ofikyɛ AWURADE kɔfa kuro ne kowura wɔ sa.”

⁷Nakoso Yehosafate bisale kyɛ, “Aso AWURADE ngɔmhyɛlɛniɛ biala nne maen ye anu ko bɔ yɛkɔhora yɛkobisa ye AWURADE noa dwirɛ ɔ?”

⁸Yeɛ Yisrael hene buale Yehosafate kyɛ, “Waha ko bɔ yɛkɔhora yɛkobisa ye AWURADE noa dwirɛ ɔ. Ye ole Yimila awa Mikaya. Nakoso mekyi ye kɔkɔkɔkɔ, ofikyɛ ɔnhyɛ ngɔm paa biala mva me nwo, sana musue nwo ngɔm ala yeɛ ɔhyɛ fa me nwo ɔ.” Na Yehosafate sele kyɛ, “Nana, nnɛkã ye sɔ.”

⁹Yeɛ Yisrael hene frɛle ahemvie panyi ko, na ɔsomane ye kyɛ, “Kɔfrɛ Yimila awa Mikaya brɛ me kekesaala ye.”

¹⁰Sɔ mmerɛ ne, né Yisrael hene ne Yuda hene Yehosafate bɛtete b’ahennie bia so bɔ bahera b’ahemvo ndena, wɔ nekaa bɔ bɛboro aburoo wɔ Samaria pambim ne anyunu berɛ ɔ. Né ngɔmhyɛlɛfoɛ ne amukoraa bɛhyehyɛ ngɔm wɔ ahemvo nemɔ anyunu berɛ.

¹¹Bɛ nu ko bɔ ye ole Kenaana awa Sedekia ne, ɔyɔle buralɛ mmɛen mɔ fale, na ɔhane kyɛ, “AWURADE nwa, ‘Mmɛen hemɔ yeɛ ɛkɔfa kɔpemo Siriafoɛ maa okoodwu kyɛ ekohũhũ bɛ ɔ.’ ”

¹²Ngɔmhyɛlɛfoɛ ne amukoraa bɛ noa dwirɛ yɛle ko. Na né bɛkã kyɛ, “Kɔ Ramote Gileade na koli ngonim. Nana, AWURADE kɔfa kuro ne kowura wɔ sa.”

¹³Ɛbɔfoɛ bɔ betuli ye kyɛ ɔɔfa Mikaya bra ne, osele Mikaya kyɛ, “Tie, ngɔmhyɛlɛfoɛ nemɔ amukoraa bɛ noa dwirɛ te ko. Bahã ngonimlilɛ nwo dwirɛ bahyire Nana Ahabo. Wɔ koso fa to bɛ deɛ ne aso, na kã ngonimlilɛ nwo dwirɛ kyire ye.”

¹⁴Nakoso Mikaya buale kyɛ, “Kyɛ AWURADE te ase ye, ngyi ye nyunu mekã kyɛ, edwirɛ bɔ AWURADE kɔfa kotua me noa ne, ye ala yeɛ ngɔhã ɔ.”

¹⁵Oodwuli Nana Ahabo berɛ ne, Nana Ahabo bisale ye kyɛ, “Mikaya, yɛhɔ yɛɛho yɛle Ramote Gileade anaakyɛ yɛyakyi?” Mikaya buale kyɛ, “Kɔ na koli ngonim. Nana, AWURADE kɔfa kuro ne kowura wɔ sa.”

¹⁶Nakoso Nana Ahabo bisale Mikaya kyɛ, “Pɛen nyɛɛ yeɛ odi kyɛ memaa ɛta ndaen kyɛ AWURADE dumaa nu edwirɛ nahorɛ ngome yeɛ ɛkɔhã kohyire me ɔ?”

¹⁷Yeɛ Mikaya sele kyɛ, “Nwuni kyɛ Yisrael amukoraa babɔ aya wɔ mmokaa nemɔ aso kyɛ mmoaen bɔ belle neafoɛ ɔ; na AWURADE hane kyɛ, ‘Mmenia hemɔ, belle meneɛ. Ma ebiala ɔhɔ ye awuro asomdwee nu.’ ”

¹⁸Yeɛ Yisrael hene sele Yehosafate kyɛ, “Manga mangyire wɔ kyɛ ɔngɔhyɛ ngɔm paa biala ngɔfa me nwo, sana musue nwo ngɔm ala?”

¹⁹ Yeɛ Mikaya sele kyɛ, “Nzaade tie AWURADE noa dwirɛ: Nwuni kyɛ AWURADE te ye ahennie bia so, bɔ nyameɛso koɛhonɛfoɛ amukoraati begyigyi ye nwo berɛ wɔ ye bɛen ne famaa ɔ.

²⁰Na AWURADE bisale kyɛ, ‘Nwa yeɛ ɔkɔlakalaka Ahabo, maa ɔkɔɔho kɔtɔ wɔ Ramote Gileade ɔ?’ Yeɛ bɛ nu biala hyirele ye adwene,

²¹kɔpem kyɛ sunzum ko oogyinane AWURADE nyunu hane kyɛ, ‘Me yeɛ ngɔlakalaka ye ɔ.’

²²Na AWURADE bisale ye kyɛ: Ɛyɛ sɛɛ né alakalaka ye?’ Na obuale kyɛ, ‘Ngɔɔyɛ anoanu sunzum wɔ ye ngɔmhyɛlɛfoɛ ne amukoraa bɛ noa nu maa bɛkɔpɛ anoanu.’ Yeɛ AWURADE sele kyɛ, ‘Kɔ na kɔlakalaka ye, na wɔ sa kɔhã yeɛ kɔ na kɔyɔ ye sɔ ala.’

²³Yiti Nana Ahabo tie, AWURADE afa anoanu sunzum wawura wɔ ngɔmhyɛlɛfoɛ hemɔ amukoraa bɛ noa nu, na amaneɛ kandinga paa yeɛ AWURADE ahyehyɛ wato berɛ wama wɔ ɔ.”

²⁴Yeɛ Kenaana awa Sedekia ɔwale Mikaya nwo berɛ ɔɔbɔle ye so anu, na obisale kyɛ, “Aso AWURADE Sunzum kosa me nwo kodwudwo kohyire wɔ?”

²⁵Na Mikaya buale kyɛ, “Kyẽa bɔ ɛkɔnwati kɔɔfea pumbu nu ne yeɛ ekonwu ye ɔ.”

²⁶Na Yisrael hene Ahabo hyɛle kyɛ, “Kye Mikaya, ná sa fa ye kɔma kuro wa amrado Amon ɔne mma Yoase.

²⁷Na kã kyire bɛ kyɛ, ‘Nana nwa nyoo: Ɛ́mɔfa akoaa he bɛto kuku nu, na ɛmɔte ye aleɛ ne ye nzue so, kɔpem kyɛ ngofi koɛ ye noa ngosa ngɔwa asomdwee nu ɔ.’ ”

²⁸Yeɛ Mikaya sele kyɛ, “Sɛ efi koɛ ne noa esa ba asomdwee nu a, ye de nna AWURADE yeɛ wafa me so wadwudwo ɔ.” Na ɔtoale so sele kyɛ, “Ɛmɔ amukoraa, ɛ́mɔfa bɛsa terɛ nwo!”

²⁹Yiti Yisrael hene ne Yuda hene Yehosafate besili nu bɛhɔle Ramote Gileade.

³⁰Yisrael hene sele Yehosafate kyɛ, “Ngɔsakyera me nwo ngɔhɔ koɛ ne anoa. Nakoso wɔ de, wurawura w’ahemvo ndaadeɛ mɔ.” Yiti Yisrael hene sakyerale ye nwo hɔle koɛ ne anoa.

³¹Né Siria hene ahyɛ ye teaseɛnam mɔ so safohene aburasa ne nyɔ nemɔ kyɛ, “Nnɛma ɛmɔfa ɛmɔ nye besie sona foforɛ biala so, kyɛ ɔte titire anaakyɛ ɔte kwahweabaa, sana Yisrael hene angome.”

³²Teaseɛnam so safohene nemɔ nwuni Yehosafate pɛ, bɛhane kyɛ, “Yisrael hene ɛhe oo!” Yiti bɛfale koɛ ne bɛɛtoale Yehosafate, na ɔteateane nu.

³³Teaseɛnam so safohene nemɔ nwuni kyɛ nna Yisrael hene ahɔ ɔ nen, bɛyakyili ye foanɛ.

³⁴Nakoso Siria koɛhonɛfoɛ nemɔ anu ko tole ye agyaen sunzumabo, na owurale Yisrael hene ye mvorɔma nu ne buralɛ bɔ ɔkata ye hue so ne b’afia ɔɔwɔle ye. Yiti osele bɔ ɔkã ye teaseɛnam ne kyɛ, “Kakyi wɔ nwo ná fa me fi koɛ noa, na bapura me.”

³⁵Koɛ ne anu hɔle so yɛle se sɔ kyẽa ne, na bɛfale Nana Ahabo begyinane ye teaseɛnam ne anu mane ye nye hyirele Siriafoɛ nemɔ, kɔpem nɔsoa bɔ owuli ɔ. Nekaa bɔ pealɛɛ ne wɔle ye ne, mogya songyi fili berɛ guale teaseɛnam ne anu.

³⁶Eyia tɔle ne, ebie teane nu wɔ Yisrael koɛhonɛfoɛ nemɔ anu kyɛ, “Ebiala osa ɔhɔ ye kuro, ebiala osa ɔhɔ ye maen nu!”

³⁷Yiti Nana Ahabo wuli, bɛfale ye bɛhɔle Samaria na besiele ye wɔ berɛ.

³⁸Benwunzini teaseɛnam ne wɔ ɛkwaa bɔ ɔwɔ Samaria ne anu. Ngyea tafele ye mogya ne, gyanderafoɛ beebiale ɛkwaa ne anu, kyɛbɔ AWURADE dwirɛ bɔ ɔhane ne te ne ala.

³⁹Afei Ahabo nwo dwirɛ ngaa ne, ɔne bɔ ɔyɔle amukoraa, ɛsoen gye awuro bɔ osili ne, ɔne nguro amukoraa bɔ ɔkyekyele ne, amba, bahyerɛ ye wɔ Yisrael ahemvo nwo dwirɛ nwomaa ne anu.

⁴⁰Yiti Ahabo toale ye mbanyi mɔ, na ɔwa bienzua Ahasia lili ye bia.

⁴¹Ahabo lili Yisrael so hene ne, ye afoɛ nna ne anu, Asa awa Yehosafate lili Yuda so hene.

⁴²Yehosafate lili bia ne, né wali afoɛ aburasa ne nnu, na oolili bia afoɛ aburanyɔ ne nnu wɔ Yerusalem. Oni ole Silihi awa Asuba.

⁴³Atee bɔ ye baba Asa fale so ne, so ala yeɛ ye wora ɔfale ɔ; wammakye wamvi ye baba atee ne aso. Ɔyɔle bɔ ɔtengyɛ wɔ AWURADE nyunu ɔ, nakoso asɔneyɛɛ nemɔ de wanzɛkye bɛ maa ɔnate ye sɔ ti, maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso.

⁴⁴Asomdwee lale Yehosafate ne Yisrael hene b’afia.

⁴⁵Afei Yehosafate nwo dwirɛ ngaa ne, ngonim bɔ olili ye wɔ koɛ nu, ɔne kyɛbɔ osi hone koɛ, amba, bahyerɛ ye wɔ Yuda ahemvo nwo dwirɛ nwomaa ne anu.

⁴⁶Asɔneyɛɛ so gyanderafoɛ mmienzua nemɔ, bɛ ngaa bɔ né bɛtɛ wɔ aseɛ ne aso fite ye baba Asa aberɛ so ne, otuli bɛ bo fili maen ne anu.

⁴⁷Né ɛhene biala nne Edom; na sona bɔ Yuda hene yele ye kyɛ ogyina ye gya nu ne, ye yeɛ né ɔnea maen ne aso ɔ.

⁴⁸Yɛhosafate yɔle Tasise ɛlɛen ne sɛso mɔ kyɛ ɔfa kɔ Ofire ɔkɔfa esikaa kɔkorɛ. Nakoso bangora kɔ, ofikyɛ beetimuni wɔ Esion Gebɛre.

⁴⁹Yeɛ Ahabo awa Ahasia sele Yehosafate kyɛ, “Ma me ɛlɛenhanɛfoɛ nemɔ bɛɛboka wɔ deɛ nemɔ wɔ ɛlɛenhanɛ ne anu,” nakoso Yehosafate ambene so.

⁵⁰Yehosafate toale ye mbanyi mɔ. Besiele ye wɔ nekaa bɔ besiele ye mbanyi mɔ ɔ wɔ ye Nana Dawide kuro, na ɔwa bienzua Yehoram lili ye bia.

⁵¹Yehosafate lili Yuda hene ne, ye afoɛ bɔ ɔtɔ so buru ne nzoo ne anu, Ahabo awa Ahasia lili Yisrael so hene wɔ Samaria. Olili Yisrael so hene afoɛ nyɔ.

⁵²Ɔyɔle bɔ ɔte bɔne wɔ AWURADE nyunu ɔ, na ɔyɔle bɔne bɔ ɔse ne oni bɛyɔle ne bie. Na Nebate awa Yeroboam bɔne bɔ ɔfa hwene Yisrael hɔle bɔne nu ne, Ahasia koso yɔle bie.

⁵³Ɔsɔnene Baal kotole ye, na kyɛbɔ ɔse yɔle ne, ye koso owurale AWURADE Yisrael Nyameɛ apue maa ɔfɛle yaa.