Read Sehwi 1 Ahemvo 3 Bible Online

1 Ahemvo 3 - Sehwi bible

1 Ahemvo 3

¹Solomon ne Misraim hene Faro bɛyɛle apam maa ɔnate so ogyale Faro awa brasua. Solomon fale braa ne wale Dawide kuro ne aso maa ɔɔtenane berɛ, kɔpem kyɛ ye ahemvie ne, AWURADE awuro ne, ɔne Yerusalem nwo fasue ne, oyiele bɛ si ɔ.

²Sɔ mmerɛ ne, né Yisraelfoɛ bɛbɔ afɔleɛ wɔ asɔneyɛɛ nemɔ aso, ofikyɛ né bennya bessili sua bɛffale AWURADE dumaa bɛttole so.

³Solomon hurole AWURADE dwirɛ, na olili ye baba Dawide ahyɛdeɛ so. Nakoso né ɔyɛ a, ɔbɔ afɔleɛ ná ɔyera ɛyɛɛ wɔ asɔneyɛɛ nemɔ aso.

⁴Ɛlɛho bie, Nana Solomon hɔle Gibeon kyɛ ɔkwaabɔ afɔleɛ wɔ berɛ, ofikyɛ berɛ yeɛ né ɔte asɔneyɛɛ titire paa ɔ. Né ɔyɛ a, Solomon taa kɔbɔ naen yeralɛ afɔleɛ apee ko wɔ sɔ afɔleɛ bokyea ne aso.

⁵Gibeon berɛ, AWURADE yele ye nwo ali hyirele Solomon kɔngɔen wɔ laleɛ nu. Na Nyameɛ sele kyɛ, “Bisa bɔ ekuro ɔ maa nyɔ mma wɔ.”

⁶Na Solomon buale kyɛ, “W’akoaa Dawide bɔ yeɛ ɔte me baba ne, ɛyɛle ye paa kandinga paa. Ofikyɛ olili wɔ dwirɛ so nahorɛ nu ɔne atee bɔ ɔtengyɛ ɔ so, na ɔyele ye ti anu fitaa ɔsole wɔ. Ahɔ so afa sɔ paa kandinga ne alo ye, na ɛnɛ amaa wanya baa bienzua maa wali ye bia.

⁷O, AWURADE me Nyameɛ, ɔwɔ nu kyɛ nde akwadaa kaaba de, nakoso ama w’akoaa mali ɛhene masi me baba Dawide gya nu. Kekesaala ye, mennwu me bɛen ne me famaa.

⁸Na wɔ mmenia bɔ aneanea nu aye bɛ ne, w’akoaa, me yeɛ nna bɛ noa ɔ. Bɛte maen piri bɔ bɛ somaa ti bɛngora bɛ ka ɔ.

⁹Yiti ma w’akoaa ndeaseɛ adwene bɔ ngɔfa ngɔla wɔ mmenia noa ɔ. Maa ngora nwu paa ne tɛɛ b’afia nzonzoleɛ; ofikyɛ wɔ maen piri ye, nwa yeɛ ɔkɔhora kɔla ye noa ɔ?”

¹⁰Na ɔyɛle AWURADE fɛ kyɛ Solomon asrɛ sɔ nikyee ne ɔ.

¹¹Nyameɛ sele ye kyɛ, “Ɔnate kyɛ asrɛ sɔ nikyee ne, ná anzrɛ ngoa tendenn, anaa anwonyadeɛ amma wɔ nwo, yeɛ ambena wɔ pɔfoɛ mɔ wue, na mmom asrɛ ndeaseɛ adwene bɔ ɛkɔfa konwu bɔ ɔte paa ɔ ne ati,

¹²tie, me koso ngɔyɔ kyɛbɔ abisa ne ala. Mama wɔ nworɛ ne adwene bɔ ɛkɔfa konwu nikyee bɔ ɔte paa ɔ. Wɔ sɛso ɔwwale le, na wɔ si koso bengonya wɔ sɛso.

¹³Afei mafa bɔ anzrɛ ɔ koso maboka wɔ so: ngɔmaa ekonya anwonyadeɛ ne animnyam mmerɛ bɔ ɛte ase amukoraa. Ɛhene foforɛ biala nne berɛ bɔ bɛkɔfa ye bɛkɔtoto wɔ nwo ɔ.

¹⁴Na sɛ ɛkɔnate m’atee so, ná ali me ahyɛdeɛ ne me mmeraa dwirɛ so, kyɛbɔ wɔ baba Dawide yɔle ne a, ye de ngɔmaa ekonyi kɔhyɛ.”

¹⁵Yeɛ Solomon fili nnaa nu tingyele, na onwuni kyɛ laleɛ yeɛ wahye ɔ. Na ɔwale Yerusalem oogyinane AWURADE apam alaka ne anyunu. Ɔbɔle naen yeralɛ afɔleɛ ne asomdwee afɔleɛ, na ɔtole poen mane ye somvoɛ amukoraa.

¹⁶Ɛhe asi ye, mmrasua gyanderafoɛ nyɔ wale Solomon berɛ bɛɛfale b’edwirɛ bɛtole ye nyunu.

¹⁷Braa ko hane kyɛ, “Me mene, mesrɛ wɔ, me ne braa ye yɛte awuro ko anu. Na nwole mmerɛ bɔ né ɔwɔ awuro berɛ ɔ.

¹⁸Nwole ne, ye ɛlɛsa ne aso, braa ye koso wole. Né yɛwɔ neka horɛ. Yɛ ngome yeɛ né yɛwɔ awuro berɛ ɔ. Né ebiala ɔbboka yɛ munyɔ so wɔ awuro berɛ.

¹⁹Braa he ɔwa ne wuli kɔngɔen, ofikyɛ ɔlale ye so.

²⁰Na abunnamu bɔ w’afaneɛ mala ne, odwɔsole ɔɔfale mma deɛ ne fili me nwo berɛ. Ɔfale ye tole ye kunu, yeɛ ɔfale ɔwa bɔ wawu ne koso tole me kunu ɔ.

²¹Ngyerɛmɔ bɔ ndwɔsole kyɛ mema mma ne nyɔfone ne, nwuni kyɛ wawu. Nakoso nneane akwadaa ne anyunu haa ngyerɛmɔ nen, nwuni ye kyɛ nna baa bɔ nwole ye ne ɔ.”

²²Nakoso braa ko ne koso hane kyɛ, “Ɛlaka, baa bɔ ɔte ase ne, mma ɛne. Wɔ deɛ yeɛ wawu ne.” Na braa bɔ oli moa dwudwole ne sele kyɛ, “Ɛlaka, ɛwa deɛ yeɛ wawu ne, mma deɛ yeɛ ɔte ase ne.” Yiti bɛ munyɔ besuli bɛ nwo aporowaa wɔ Nana Solomon nyunu berɛ.

²³Yeɛ Nana Solomon hane kyɛ, “Ɛmɔ nu ko nwa, ‘Baa bɔ ɔte ase ne te me deɛ, na wɔ deɛ ne yeɛ wawu ne,’ yeɛ ko wora ɔnwa, ‘Ɛlaka, ɛwa ne awu, na mma deɛ ne yeɛ ɔte ase ne.’ ”

²⁴Yiti Nana Solomon hane kyɛ, “Ɛ́mɔbrɛ me ngrandɛ.” Na bɛfale ngrandɛ bɛɛtole Nana Solomon nyunu.

²⁵Nana Solomon sele kyɛ, “Ɛ́mɔhyɛ akwadaa bɔ ɔte ase ne anu nyɔ; ɛ́mɔfa ye bue bɛ́ma ko, na ɛ́mɔfa ye bue koso bɛ́ma ko ne.”

²⁶Nakoso akwadaa bɔ ɔte ase ne maame, ɔnate ɔwa ne ati, ye nyaa wosole ye kunu. Yiti ɔhã hyirele Nana Solomon kyɛ, “Me mene, mesrɛ wɔ, fa akwadaa bɔ ɔte ase ne ma ye, na nnɛku ye!” Nakoso braa ko ne de ɔhane kyɛ, “Kyɛ ye nu; maa akwadaa ne ɔbɔ yɛ munyɔ.”

²⁷Yeɛ Nana Solomon buale kyɛ, “Ɛ́mɔfa akwadaa bɔ ɔte ase ne bɛma braa bɔ oli moa ne. Nnɛma ɛmɔku ye. Ye maame ɛne.”

²⁸Yisrael amukoraa tele ndɛen bɔ Nana Solomon buale ne, na ye nwo yɛle bɛ nwanwa, ofikyɛ benwuni kyɛ Nyameɛ nworɛ wɔ ye nu bɔ ɔfa bua ndɛen turoloo ɔ.