Read Sehwi 1 Ahemvo 5 Bible Online

1 Ahemvo 5 - Sehwi bible

1 Ahemvo 5

¹Tiro hene Hiram tele kyɛ bapopa Solomon ngoo maa wali ye baba bia. Na ɔsomane ye somvoɛ mɔ wɔ Solomon berɛ, ofikyɛ né Hiram te Dawide obiɛngo fi tete.

²Solomon tole Hiram ngraa kyɛ,

³“Ɛse kyɛ ɔnate koɛ bɔ me baba Dawide ye pɔfoɛ mɔ fa toale ye bɛen ne famaa ne ati, wangora wanzi sua wamva AWURADE ye Nyameɛ dumaa wando so, kɔpem kyɛ AWURADE fale ye pɔfoɛ mɔ wurale ye gya bo ɔ.

⁴Nakoso kekesaala ye de, AWURADE me Nyameɛ amaa manya asomdwee wɔ nekaa biala. Pɔfoɛ biala ngo ndia me, yeɛ edwirɛ tɛɛ biala koso ɔttole me.

⁵Yiti mepena kyɛ mesi sua mefa AWURADE me Nyameɛ dumaa meto so, kyɛbɔ AWURADE hã hyirele me baba Dawide kyɛ, ‘Ɛwa bɔ ngɔfa ye ngosi wɔ gya nu maa okoli wɔ bia ne, ye yeɛ okosi sua kɔfa me dumaa kɔto so ɔ.’

⁶Yiti maa bebu sida mmakaa béfi Lebanon bɛbrɛ me. Me somvoɛ mɔ kɔɔboka wɔ somvoɛ mɔ so, na akatuaa biala bɔ ɛkɔhã kyɛ mva mma wɔ somvoɛ nemɔ ne, ngɔfa ngɔma wɔ; ofikyɛ ɛse kyɛ ebiala nne yɛ wa bɔ ɔse mmakaa bu kyɛ Sidonfoɛ ɔ.”

⁷Hiram tele Solomon ngraa nen, ye nye gyele paa, na ɔhane kyɛ, “AWURADE bɔ ɛnɛ ye waye baa nworɛniɛ wama Dawide kyɛ ooli maen kandinga ye aso ne, animnyam ɔyɛ ye deɛ.”

⁸Hiram tole Solomon ngraa kyɛ, “Mate ngraa bɔ afa abrɛ me ne. Na sida ne ɛframmire bɔ ehia ne, ngɔfa ye mukoraa ngɔbrɛ wɔ.

⁹Me somvoɛ mɔ kɔhwe mmakaa ne kofi Lebanon kɔwa mboanoa. Ngɔkyekye ngogua ɛpo ne anye ngɔfa ngɔhɔ nekaa biala bɔ ekohyire ɔ. Ngɔmaa bɛkɔsangye nu berɛ maa ɛkɔsesa kɔhɔ. Na wɔ koso, bɔ mepena mefi wɔ berɛ ole kyɛ ɛkɔma m’awuro ama bɛ noa aleɛ ɔ.”

¹⁰Yiti Hiram mane Solomon sida ne ɛframmire biala bɔ ohia ɔ.

¹¹Solomon koso mane Hiram atokoɔ olonka apee ɛyaa nyɔ ne ngoo paa galɔn apee ɛyaa ko ne buru maa ɔfa mane ye awuro ama. Afoɛ noa biala, né Solomon fa sɔ nningyein nemɔ ma Hiram.

¹²Yiti AWURADE mane Solomon nworɛ kyɛbɔ ɔhyɛle ye bɔ ne. Né Hiram ne Solomon b’afia te wosee, na bɛ munyɔ bɛyɛle apam.

¹³Nana Solomon hyɛle mmenia wɔ Yisrael amukoraati maa bɛyɔle adwuma bɛmane ye. Sɔ mmenia ne, bɛ somaa te mmienzua apee aburasa.

¹⁴ Ɔfale bɛ hɔle Lebanon. Bosome biala, né ɔfa bɛ nu apee buru yeɛ ɔkɔ ɔ. Né ɔmaa bekodi bosome ko wɔ Lebanon ná baali bosome nyɔ wɔ awuro. Mmenia bɔ bɛhyɛ bɛ maa bɛyɔ adwuma ne, Adoniram yeɛ ne ɔnea bɛ so ɔ.

¹⁵Né Solomon sa le adwumayɔlɛfoɛ apee aburasoo, yeɛ mmenia apee aburawɔtwɛ bɔ bedwa nyɔboɛ nu wɔ mmokaa aseɛ ne aso ɔ,

¹⁶asora Solomon mbanyi apee nza ɛyaa nza bɔ bɛnea adwuma ne aso, bɔ besa bɛnea mmenia bɔ bɛyɔ adwuma ne aso ɔ.

¹⁷Nana Solomon hyɛle mmeraa maa bedwale nyɔboɛ bɔ ɔte paa ɔ, na nyɔboɛ bɔ base ne yeɛ bɛfa bɛtole sua ne fapem ɔ.

¹⁸Yiti Solomon suasilɛfoɛ nemɔ, bɛ ne Hiram suasilɛfoɛ nemɔ, yeɛ Gebalfoɛ yeɛ bedwale nyɔboɛ ne ɔ. Na bɛpakyele mmakaa ne ne nyɔboɛ ne bɛfa besili sua ne.