Read Sehwi 1 Ahemvo 7 Bible Online

1 Ahemvo 7 - Sehwi bible

1 Ahemvo 7

¹Solomon ye bɔbɔ ye ahemvie ne de, ɔfale afoɛ buru ne nza yeɛ osili ye mukoraati yiele ɔ.

²Osili awuro bɔ bɛfrɛ ye Lebanon Ɛhɔayeɛ Awuro ne. Ye tendenn nu te agyirɛ ɛyaa ko, ye tɛtrɛtɛɛ nu te agyirɛ aburannu, yeɛ ofi ye aseɛnwo bɔ ɔkwaadwu ye anwuro ne, ɔte agyirɛ aburasa. Sida bonima bɔ basa bɛ folii sɔ alaa nna, bɔ bafa sida mbuna babeabea nu yeɛ osili sua ne siele so ɔ.

³Ɔfale sida ndaboa aburanna ne nnu yeɛ ɔyɔle ye abuu ne ɔ. Ɔhyɛle ndaboa ne anu nza guaguale ye buru ne nnu buru ne nnu, na ɔfa guaguale bonima nemɔ aso.

⁴Né basa mboma folii sɔ alaa faa nza bɔ bɛ nu biala nye nea obiɛngo ɔ.

⁵Sua ne, ye anoa amukoraa ne aponnwaa amukoraa, ɔte ndaboa ahinanan. Né bahyehyɛ bɛ folii nza bɔ ko biala nye kyire obiɛngo wɔ ye ndendeneɛ so ɔ.

⁶Osili Bonima Pato ne. Ye tendenn nu te agyirɛ aburannu, yeɛ ye tɛtrɛtɛɛ te agyirɛ aburasa. Ɔfale bonima sili abrannaa wɔ ye nyunu, bɔ apata wɔ bɛ nyunu ɔ.

⁷Osili Ahennie Bia Pato, bɔ ɔte Ndɛen Turoloo Pato ne. Berɛ yeɛ né ɔtena di dwirɛ ɔ. Ɔfale sida samono ye aseɛnwo fi ye ti kɔka ye ti.

⁸ Ye bɔbɔ ye ahemvie bɔ ɔkɔtena nu ne, aluo ko bɔ ɔwɔ Pato ne asi ne, osili ye sɔ ala. Afei koso Solomon sili sua bɔ ɔte kyɛ ɛhene ala mane ɔye bɔ ɔte Faro awa brasua ne.

⁹Sɔ sua nemɔ amukoraati, bɛfale nyɔboɛ paa bɔ bahyɛ da bafa buralɛ base ye nyunu ne ye si yeɛ besili ɔ; fi ye fapem kɔka ye ti afia, yeɛ afei fi ye terɛ ne bɔ ɔkwaadwu aluo berɛ kandinga nen.

¹⁰Ye fapem ne koso, bɛfale nyɔboɛ paa mbiri mbiri yeɛ bɛtole ɔ; nyɔboɛ ne bie tendenn te agyirɛ buru, yeɛ ebie koso te agyirɛ mmɔtwɛ.

¹¹Bɛfale nyɔboɛ paa bɔ bahyɛ da base ɔ, ɔne sida yeɛ besili sua ne besiele fapem ne aso ɔ.

¹²Aluo berɛ kandinga ne, ye nwo terɛ ne amukoraa, nyɔboɛ bɔ base ɔ, nza biala, sida taboa ko wura ye afia yeɛ bɛfa besili ɔ. Besili ye kyɛ AWURADE awuro ne aluo berɛ terɛ ne, ɔne ye abrannaa ne ala.

¹³Nana Solomon somane maa bɛɛfale Hiram befili Tiro bɛbrɛle ye.

¹⁴Hiram oni te braa kunaniɛ bie bɔ ofi Nafetali abusua kure nu. Né ɔse koso te kɔɔbere dwumvoɛ bɔ ofi Tiro ɔ. Né Hiram di adwii paa, ɔse nworɛ, na ole kɔɔbere adwuma nwo nimdeɛ. Ɔwale Nana Solomon berɛ ɔɔyɔle ye kɔɔbere nwo adwuma amukoraa mane ye.

¹⁵Ɔyɔle kɔɔbere bonima nyɔ. Bɔ oli moa ne, fi ye aseɛnwo bɔ ɔkwaadwu ye anwuro ne, ɔte agyirɛ buru ne mmɔtwɛ. Nyamaa bɔ ye tendenn te agyirɛ buru ne nyɔ yeɛ ɔkora bra ye nwo yia ɔ. Bonima bɔ ɔtɔ so nyɔ ne koso, ɔte kyɛ bɔ oli moa ne ala.

¹⁶Osa hurole kɔɔbere fa yɔle abotire nyɔ siesiele bonima nemɔ aso. Abotire ko biala, fi ye aseɛnwo bɔ ɔkwaadwu ye anwuro ne, ɔte agyirɛ nnu, yeɛ abotire ko ne koso, fi ye aseɛnwo bɔ ɔkwaadwu ye anwuro ne, ɔte agyirɛ nnu.

¹⁷Bonima abotire nyɔ ne, ɔfale ɛtɛen nzoo bɔ banwo maa wayɛ atweaban bɔ bakisakisa ye ɔ, lili adwii guale bɛ nu biala so.

¹⁸Abotire mɔ bɔ bɛwɔ bonima nemɔ aso ne, olili akengaa adwii folii nyɔ fa pɛle b’ɛtɛen nemɔ anwo yiale.

¹⁹Bonima bɔ bɛwɔ abrannaa ne aso ne, b’abotire nemɔ, olili adwii yɛle bɛ kyɛ sukooko nyerɛen. Ko biala te agyirɛ nna.

²⁰Abotire mɔ bɔ bɛwɔ bonima nyɔ nemɔ aso ne, bɔ besa bɛwɔ bonima ne ti afia kurukuru ne aso, bɔ opingye ɛtɛen ne nen, né bali akengaa adwii ɛyaa nyɔ bɔ basa bɛ folii bapɛ bɛ nwo bayia ɔ bagua bɛ nwo.

²¹Hiram gyinagyinane bonima nemɔ wɔ asɔneyɛɛ sua abrannaa ne aso. Ogyinane bonima ne ko wɔ ngwaen, na ɔtole ye dumaa Yakin; ogyinane ko wɔ sorɔ, na ɔtole ye dumaa Boase.

²²Olili sukooko adwii guale bonima nemɔ ti afia. Sɔ yeɛ ɔyɔle fa yiele bonima nemɔ anwo adwuma ɔ.

²³Afei Hiram hurole kɔɔbere fa yɔle nzim ne. Ofi ye noa kɔka ye noa ne, ɔte agyirɛ buru, yeɛ nu kuronn te agyirɛ nnu. Sɛ ɛfa ye nwo amukoraa bra yia a, ɔte agyirɛ aburasa.

²⁴Ye noa kaa ne abo, ɔfale kɔɔbere lili kɔndoa adwii guale ye nwo bra yiale. Kɔndoa bɔ ɔfa pɛle nzim ne anwo yiale ne, ko biala te agyirɛ buru. Ɔfale kɔɔbere lili kɔndoa adwii folii nyɔ guale nzim ne anwo.

²⁵Nzim ne, né ogyi nandwie bɔ bafa kɔɔbere bayɔ ɔ buru ne nyɔ so: nza nye kyire sorɔ, nza nye kyire eyia atɔleɛ, nza nye kyire ngwaen, yeɛ nza wora bɛ nye kyire eyia afiteleɛ. Né nzim ne gyi bɛ so. Bɛ mukoraa bɛ si wura angora ne abo.

²⁶Nzim ne pipiripii te kyɛ agyirɛ ko bɔ bahyɛ nu nna ɔ. Bayɛ ye noa kaa ne te kyɛ kwangoa noa kaa ne. Ɔte kyɛ sukooko nyerɛen ne, na ɔkora fa nzue galɔn apee aburanyɔ.

²⁷Hiram sa yɔle nyinasoɛ buru: ko biala tendenn te agyirɛ nna, ye tɛtrɛtɛɛ te agyirɛ nna yeɛ ɔkɔ anwuro agyirɛ nza.

²⁸Sɔa yeɛ ɔyɔle nyinasoɛ nemɔ ɔ: Né nikyee taataa bie wɔ bɛ ngyɛnu, na ɔfale kɔɔbere mbuna nemɔ wurawurale nu.

²⁹Na nikyee taataa bɔ ɔwɔ bɛ ngyɛnu, bɔ ɔfale kɔɔbere mbuna nemɔ wurawurale nu ne, olili gyata mɔ adwii, nandwie adwii ne kɛrubim adwii guale bɛ nwo. Gyata nemɔ ne nandwie nemɔ bɔ bɛwɔ kɔɔbere mbuna nemɔ anwo ne, olili abotire adwii guale b’anwuro ne b’ase.

³⁰Né nyinasoɛ biala le kɔɔbere agyirɛ nna ne kɔɔbere tɔkorɔ bɔ owurawura nu ɔ. Ye ndweasoɛ nna ne, né bele nyinasoɛ bɔ bɛfa ayaa besie so, bɔ bali abotire adwii bagua bɛ nu biala ngyɛnu ɔ.

³¹Na ayaa ne noa ngatasoɛ ne, ofi ye aseɛnwo bɔ ɔkwaadwu ye anwuro ne, ɔte agyirɛ ko. Ye noa hangra ne te kurukuru, na ye tɛtrɛtɛɛ te agyirɛ ko ne bue. Olili adwii guale ye noa. Na ye ngyɛnu taataa ne, ɔte ahinanan; ɔtte kurukuru.

³²Né agyirɛ nna nemɔ wurawura ye ngyɛnu taataa ne abo. Agyirɛ nemɔ, bɛ kɔɔbere tɔkorɔ nemɔ, bewurawura nyinasoɛ ne anu. Na agyirɛ ko biala, fi ye aseɛnwo bɔ ɔkwaadwu ye anwuro ne, ɔte agyirɛ ko ne bue.

³³Agyirɛ nemɔ, bayɔ bɛ kyɛ teaseɛnam agyirɛ. Bɛ tɔkorɔ nemɔ, bɛ noa kaa nemɔ, mbaleɛ bɔ ɔbeabea nu nemɔ, ɔne b’afia brɛmoɛ kurukuru ne, ohurole kɔɔbere yeɛ ɔfa yɔle ɔ.

³⁴Ye nyinasoɛ ne, bɛ nu ko biala le asaa nna. Ko wɔ ye ndweasoɛ nna ne ko biala so. Sɔ asaa nemɔ, ɔfale kɔɔbere kundunzii komapɛ ne yeɛ ɔyɛle bɛ ne bɛ nyinasoɛ nemɔ ɔ.

³⁵Nyinasoɛ ne, ye ti afia ne, ɔyɔle ye hangra, na ofi ye aseɛnwo bɔ ɔkwaadwu ye anwuro ne, ɔte kɔyɛ agyirɛ bue. Ye sa nemɔ ne ye ngyɛnu taataa ne, ɔfale sɔ kɔɔbere kundunzii komapɛ ne ala yeɛ ɔyɔle ɔ.

³⁶Ye sa nemɔ aso ne ye ngyɛnu taataa ne, olili kɛrubim adwii, gyata mɔ adwii ne ayee mmakaa adwii guale ye nwo nekaa biala bɔ atee wɔ ɔ, na ɔfale abotire pɛle ye nwo bra yiale.

³⁷Sɔ ala yeɛ ɔfa yɔle nyinasoɛ buru nemɔ ɔ. Ɔyɔle bɛ mukoraati pɛpɛɛpɛ bɔ bɛ mbiri ne bɛ sue te pɛ ɔ.

³⁸ Ɔyɔle kɔɔbere ayaa buru. Ayaa biala fa nzue galɔn ɛyaa nyɔ aburanyɔ. Ayaa ko biala, fi ye noa kɔka ye noa ne, ɔte agyirɛ nna. Nyinasoɛ buru ne, ayaa gyi ko biala so.

³⁹Nyinasoɛ ne, ɔfale nu nnu gyinagyinane sua ne ngwaen, yeɛ ɔfale nnu koso gyinagyinane sua ne sorɔ. Afei ɔfale nzim ne, ɔfa siele sua ne ngwaen dɔ wɔ ye bɛen so.

⁴⁰Hiram sa yɔle ngukue nemɔ, ateɛ anoa tworɔntworɔn nemɔ, yeɛ ayaa nemɔ. Yiti AWURADE awuro berɛ adwuma bɔ Hiram yɔ mane Nana Solomon ne, oyiele ye mukoraa.

⁴¹Bɛ ole bonima nyɔ nemɔ, ndalie nyɔ bɔ bɛwɔ abotire bɔ ogyigyi bonima nemɔ aso ne, ɛtɛen nyɔ bɔ bɛkɔfa bɛkɔkata ndalie nyɔ bɔ bɛwɔ abotire bɔ bɛwɔ bonima nemɔ aso ne;

⁴²akengaa adwii ɛyaa nna bɔ bali bagua ɛtɛen nyɔ nemɔ anwo ne, akengaa adwii bɔ bali ye folii nyɔ bagua ɛtɛen ko biala nwo, bɔ bɛkɔfa bɛkɔkata abotire nemɔ bɛ ndalie nyɔ bɔ bɛwɔ bonima nemɔ aso ne,

⁴³nyinasoɛ buru nemɔ, ayaa buru bɔ begyigyi nyinasoɛ nemɔ aso ne;

⁴⁴nzim ko ne, yeɛ nandwie nyii adwii buru ne nyɔ bɔ bɛwɔ nzim ne abo ne.

⁴⁵Ngukue nemɔ, ateɛ anoa tworɔntworɔn nemɔ, ayaa nemɔ, ɔne nningyein bɔ Hiram yɔ mane Nana Solomon ne amukoraa, ɔfale kɔɔbere bɔ wahwi ye nwo hyɛmhyɛm yeɛ ɔyɔle ɔ.

⁴⁶Asue Yɔɔdan nwo aseɛ frɛtɛɛ ne aso, ɛfaa aseɛ bɔ ɔla Sukote ne Saretan b’afia ne, berɛ yeɛ Nana Solomon maa ohurole kɔɔbere yɔle bɛ mukoraa ɔ.

⁴⁷Solomon amma bangari nningyein nemɔ anu biala, ofikyɛ né bɛsone paa. Yiti kɔɔbere ne anu nonɛ ne, bannwu ye noa.

⁴⁸ Solomon yɔle nningyein amukoraa bɔ bɛwɔ AWURADE awuro ne. Bɛ ole: esikaa kɔkorɛ afɔleɛ bokyea ne, esikaa kɔkorɛ poen bɔ bɛfa paanoo krongron begua so ne,

⁴⁹ esikaa kɔkorɛ paa kanea mmakaa, bɔ nnu wɔ ye ngwaen, ná nnu wora wɔ ye sorɔ wɔ nekaa krongron ne anyunu berɛ ne; esikaa kɔkorɛ nyerɛen ne, esikaa kɔkorɛ nganea nemɔ, yeɛ esikaa kɔkorɛ akapɛ nemɔ;

⁵⁰esikaa kɔkorɛ paa kulie nemɔ, esikaa kɔkorɛ paa akapɛ bɔ bɛfa bɛtengyɛtengyɛ kanea nyamaa noa nemɔ, esikaa kɔkorɛ paa ayaa nemɔ, esikaa kɔkorɛ paa ɛyɛɛ kulie mɔ, esikaa kɔkorɛ paa ngukue bɔ bɛfa see begua nu nemɔ, sua ne kunu dɔ paa krongron nu krongron dɔ anoa ndenasoɛ nemɔ, yeɛ afei asɔneyɛɛ sua ne anyunu dɔ anoa nemɔ, ɔfale esikaa kɔkorɛ yeɛ ɔyɔle ɔ.

⁵¹ Yiti Nana Solomon yɔle AWURADE awuro ne anwo adwuma amukoraati yiele. Na nningyein bɔ Solomon baba Dawide tu siele berɛ mane AWURADE ne: ɛdwetɛ, esikaa kɔkorɛ ɔne nningyein ahoroɔ nemɔ, Solomon fa hɔle AWURADE awuro oosiele nekaa bɔ besie nningyein ne.