Read Sehwi 2 Ahemvo 10 Bible Online

2 Ahemvo 10 - Sehwi bible

2 Ahemvo 10

¹Né Ahabo le mmaa mmienzua aburasoo wɔ Samaria. Yiti Yehu hyerɛle ngrataa, na ɔsomane maa bɛfa bɛhɔle Samaria bɛɛmane Yesreel nnehyeɛ, mbanyi mɔ, bɛ ne mmenia bɔ bɛnea Ahabo mma mmienzua nemɔ aso ne kyɛ,

²“Ɛmɔ mene ye mma mmienzua nemɔ, bɛwɔ ɛmɔ sa nu, na afei ɛhemɔ wura ɛmɔ sa: teaseɛnam mɔ, mbɔngɔ, kuro bɔ bato ye nwo fasue, ɔne akodeɛ.

³Yiti ɛ́mɔneanea ɛmɔ mene mma mmienzua nemɔ anu bɛpena bɛ nu ko bɔ ɔfata paa ɔ. Ɛ́mɔma oli ɔse bia, na ɛ́mɔho bɛ́ma ɛmɔ mene ye ahennie ne ɔtoa so.”

⁴Nakoso besurole paa, na bebisabisale bɛ nwo kyɛ, “Ɛ́mɔnea oo! Ahemvo nyɔ po bangora ye nyunu gyina, yɛyɛ sɛɛ né yahora ye nyunu gyina?”

⁵Yiti ahemvie berɛ neafoɛ ne, ɔne kuro berɛ amrado ne, bɛ ne kuro berɛ mbanyi ne, yeɛ bɛ bɔ bɛnea Ahabo mma nemɔ aso ne, bɛsomane maa bɛfale ngraa bɛmane Yehu kyɛ, “Wɔ ngoaa ole yɛ. Yɛkɔyɔ bɔ ekose yɛ biala. Yɛngosi ebiala hene, yɔ bɔ wɔ bɔbɔ ekuro ɔ.”

⁶Yeɛ Yehu hyerɛle bɛ krataa bɔ ɔtɔ so nyɔ kyɛ, “Sɛ ɛmɔwɔ me bue nu, ná ɛmɔayɛ ɛmɔ adwene kyɛ ɛmɔkotie me dwirɛ de a, ye de ɛ́mɔpepɛ ɛmɔ mene mma mmienzua nemɔ ti bɛ́fa bɛ́brɛ me wɔ Yesreel ɛhema bekye sɔa ala.” Nana Ahabo mma mmienzua nemɔ, bɔ bɛ somaa te aburasoo ne, né bɛwɔ kuro berɛ mbanyi bɔ bafa bɛ bawura bɛ sa kyɛ bɛtete bɛ nemɔ berɛ.

⁷Mbanyi nemɔ sa hane krataa nen, bɛhyele Ahabo mma mmienzua bɔ bɛ somaa te aburasoo ne behuhuni bɛ. Bɛfale bɛ ti beguale ngɛndɛen nu bɛfa bɛɛmane Yehu wɔ Yesreel.

⁸Ɛbɔfoɛ ɔɔbɔle Yehu amaneɛ kyɛ, “Bafa Ahabo mma mmienzua nemɔ bɛ ti bawa” nen, Yehu sele kyɛ, “Ɛ́mɔboa ye noa kure nyɔ bégua pambim ne anyunu maa aleɛ hye.”

⁹Aleɛ hyene ngyerɛmɔ bɔ ofitele nen, oogyinane mmenia ne amukoraa bɛ nyunu sele bɛ kyɛ, “Ɛmɔnni fɔ. Me yeɛ mmɔle me mene Yoram ti so porɛ nguni ye ɔ, ná nwa yeɛ ohuhuni ɛhemɔ amukoraa ye?”

¹⁰Ɛ́mɔnwu ye kyɛ AWURADE dwirɛ bɔ wahã wafa Ahabo ye awuro ama nwo ne, nu ko po nne berɛ bɔ ɔngɔwa nu ɔ; ofikyɛ edwirɛ bɔ AWURADE nate ye somvoɛ Elia so ɔhane ne, ye ala yeɛ AWURADE ayɔ ne.”

¹¹Yiti Yehu huhuni Ahabo ye nwo ama ngaa bɔ baha ne amukoraa wɔ Yesreel: ye mbanyi mɔ amukoraa, ye damvo paa mɔ, ye asɔfo mɔ, bɔ wanyakyi ye bosoniɛ ko po ɔ.

¹²Afei Yehu sili nu kyɛ ɔkɔ Samaria. Ɔkɔ ne, oodwuli nekaa bɔ mmoaen neafoɛ bɛpepɛ mmoaen nwo nwiaa bɔ bɛfrɛ berɛ Bete Ekede ne.

¹³Yehu yiale Yuda hene Ahasia ye nwo ama, na obisale bɛ kyɛ, “Ɛmɔfi abusua beni anu?” Bebuale kyɛ, “Yɛte Yuda hene Ahasia nwo ama. Yawa kyɛ yɛbaapasa ɛhene mma nemɔ ne nana hemmaa mma nemɔ anwo.”

¹⁴Yehu hane kyɛ, “Ɛ́mɔhye bɛ!” Yiti bɛhyele bɛ, na behuhuni sɔ mmenia aburanna ne nyɔ ne amukoraa wɔ Bete Ekede kumaa ne anoa bɔ wanyakyi bɛ nu ko po ɔ.

¹⁵Yehu fili berɛ ne, onwuni Rekabo awa Yehonadabo kyɛ ɔbaayia ye. Yehu bisale ye ahye, na Yehu bisale ye kyɛ, “Aso me nwo adwene paa wɔ wɔ ti anu kyɛbɔ wɔ nwo adwene paa wɔ me ti anu ye?” Yehonadabo buale kyɛ, “Yoo, ɔte sɔ ala.” Na Yehu sele kyɛ, “Sɛ ɔte sɔ de a, ye de soma me sa nu.” Yiti osomane ye sa nu. Na Yehu bokale maa ɔfo ɔɔtenane teaseɛnam ne anu.

¹⁶Yeɛ Yehu hane kyɛ, “Maa yɛhɔ kɔnea kyɛbɔ matu me nwo masie berɛ mama AWURADE ɔ.” Yiti ɔmane Yehonadabo tenane ye teaseɛnam ne anu bie.

¹⁷Oodwuli Samaria ne, ohuhuni Ahabo nwo ama bɔ baha wɔ Samaria ne amukoraa, kɔpem kyɛ onuane bɛ boso koraa ɔ, kyɛbɔ AWURADE dwirɛ bɔ ɔhã hyirele Elia ne, ɔte ne ala.

¹⁸Afei Yehu mane maen ne amukoraa bɛbɔle dwaa, na osele bɛ kyɛ, “Ahabo sɔnene Baal kãa bie, nakoso me Yehu de ngɔsɔne ye paa.

¹⁹Yiti ɛ́mɔfrɛ Baal ngɔmhyɛlɛfoɛ ne amukoraa, bɛ bɔ bɛsɔne ye ne amukoraa, ɔne ye asɔfo nemɔ amukoraa bɛma me. Nnɛmɔma bɛ nu ko po ɔye ye nwo fi nu, ofikyɛ mebaabɔ afɔleɛ piri paa mema Baal. Bɛ nu biala bɔ wamma ne, odi kyɛ beku ye.” Nakoso né Yehu le kanda nworɛ ɔpena bɛ bɔ bɛsɔne Baal ne okũkũ bɛ.

²⁰Yehu hyɛle kyɛ, “Ɛ́mɔyia nyianu krongron bɛma Baal.” Yiti bɛbɔle dwaa ne.

²¹Yehu maa bɛbɔle dawure wɔ Yisrael maen nu amukoraa. Bɛ bɔ bɛsɔne Baal ne amukoraati bɛwale, bɔ wanga bɛ nu sona ko po ɔ. Beewurale Baal asɔneyɛɛ sua ne anu, kɔpem kyɛ sua ne anu yili tɛkyɛ fi ye ti kɔka ye ti ɔ.

²²Afei Yehu sele Baal sɔnenɛ ndaadeɛ so neafoɛ ne kyɛ, “Yeye ndaadeɛ ne brɛ bɛbɔ bɛsɔne Baal ne amukoraa.” Yiti ɔyeyele ndaadeɛ nemɔ mane bɛ.

²³Yeɛ Yehu ne Rekabo awa Yehonadabo bewurale Baal asɔneyɛɛ sua ne anu; na osele bɛ bɔ bɛsɔne Baal ne kyɛ, “Ɛ́mɔnea kyɛ ebiala bɔ ɔsɔne AWURADE ne, ɔngɔfra ɛmɔ nu wɔ wa, sana bɛ bɔ bɛsɔne Baal angome.”

²⁴Yeɛ bɛhyɛle ye bo kyɛ bɛbɔ afɔleɛ ne naen yeralɛ afɔleɛ. Sɔ mmerɛ ne, né Yehu ali moa wama koɛhonɛfoɛ aburawɔtwɛ baagyinagyina sua ne asi. Né wahyɛ bɛ kyɛ, “Mmenia bɔ mafa bɛ mawura ɛmɔ sa ye, ɛmɔ nu biala bɔ ɔkɔma bɛ nu ko po ɔkɔnwati ne, ɔkɔfa ye ngoa kɔpɛ so.”

²⁵Yehu bɔle naen yeralɛ afɔleɛ ne yiele pɛ, osele awɛmvoɛ nemɔ ne mbanyi nemɔ kyɛ, “Ɛmɔbra beehũhũ bɛ, nnɛmɔma ebiala nwati.” Yiti bɛfale ngrandɛ behuhuni bɛ. Awɛmvoɛ nemɔ ne mbanyi nemɔ yeyele bɛ fuin beguale aluo. Afei besa bɛhɔle Baal asɔneyɛɛ sua ne anu.

²⁶Bonima bɔ né ogyi Baal asɔneyɛɛ sua ne anu ne, bɛye befitele aluo bɛɛyerale ye.

²⁷Bɛsɛkyele Baal bonima ne. Baal asɔneyɛɛ sua ne, bedwirili beguale ase, na bɛfa bɛkakyili nekaa bɔ bɛkɔ bondua ɔ maa waadwu ɛnɛ.

²⁸Yiti Yehu tuli Baal sɔnenɛ bo fili Yisrael.

²⁹Nakoso bɔne bɔ Nebate awa Yeroboam hwehwene Yisrael hɔle nu, kyɛ ɔmaa bɛsɔnene esikaa kɔkorɛ nandwie mmosoen bɔ ɔwɔ Betel ne Dan ne de, Yehu wanyakyi ye yɔlɛ.

³⁰AWURADE sele Yehu kyɛ, “Ɔnate kyɛ abɔ mmɔden ayɔ bɔ ɔtengyɛ wɔ me nyunu, ná afei ɛne Ahabo awuro ama ali ye kyɛbɔ mepena ne pɛpɛɛpɛ ne ati, wɔ boso ama bɔ ɔkwaadwu aworɛ ndoatoasoɛ nna so ne, bɛkɔtena Yisrael ahennie bia so.”

³¹Nakoso Yehu wanni AWURADE Yisrael Nyameɛ mmeraa ne aso nahorɛ nu. Yeɛ Yeroboam bɔne bɔ ɔyɔle, bɔ ɔnate so ɔhwehwene Yisrael hɔle bɔne nu ne, wandwe ye nwo wamvi ye nwo.

³²Sɔ mmerɛ ne anu, AWURADE hyɛle ye bo kyɛ ɔma Yisrael aseɛ ne bie fi bɛ sa. Siria hene Hasael lili Yisrael so ngonim wɔ maen ne amukoraati nu:

³³fite asue Yɔɔdan eyia afiteleɛ, Gileade aseɛ ne amukoraati, Gadefoɛ aseɛ, Rubenfoɛ aseɛ, Manasefoɛ aseɛ, fite Aroye bɔ ɔwɔ Anɔn bɔnza ne anwo, bɔ yeɛ ole Gileade ne Baasan ne.

³⁴Afei Yehu nwo dwirɛ ngaa ne, bɔ ɔyɔle amukoraa, ɔne ye ngonim bɔ olili amukoraa, amba, bahyerɛ ye wɔ Yisrael ahemvo nwo dwirɛ nwomaa ne anu.

³⁵Yehu toale ye mbanyi mɔ. Besiele ye wɔ Samaria, na ɔwa bienzua Yehoahase lili ye bia.

³⁶Mmerɛ bɔ Yehu lili Yisrael so hene wɔ Samaria ne, ɔte afoɛ aburanyɔ ne mmɔtwɛ.