Read Sehwi 2 Ahemvo 11 Bible Online

2 Ahemvo 11 - Sehwi bible

2 Ahemvo 11

¹Afei mmerɛ bɔ Ahasia oni Atalia tele kyɛ ɔwa bienzua Ahasia watɔ ne, ɔhyɛle ye bo kyɛ okũkũ nnehyeɛ nemɔ amukoraa.

²Nakoso Nana Yoram awa brasua Yehohyeba, bɔ ɔte Ahasia oliɛma brasua ne, owuale ye nwo ɔfale Ahasia ɔwa bienzua Yoase fili nana mma mɔ bɔ bɛbaahũhũ bɛ ne anu. Ɔfale ye ne ye neafoɛ feale sua nu. Ɔfale Yoase feale Atalia, maa ɔnate so banya ye bangu ye.

³Ɔne neafoɛ ne bɛfeale AWURADE awuro afoɛ nzia mmerɛ bɔ Atalia di maen ne aso ne.

⁴Nakoso ye afoɛ nzoo ne anu, Yehoada tole ye sa frɛle Karitefoɛ safohene nemɔ ɔne awɛmvoɛ nemɔ maa bɛwale ye berɛ wɔ AWURADE awuro berɛ. Ɔne bɛ yɛle apam, ɔmaa bɛtale ndaen wɔ AWURADE awuro berɛ, na ɔyele Nana Ahasia awa ne ali hyirele bɛ.

⁵Ɔfale ahyɛdeɛ mane bɛ kyɛ, “Ɛhe yeɛ odi kyɛ ɛmɔyɔ ɔ: ɛmɔ nu nza nu ngyɛmuɛ ko bɔ odwu afofikyẽa a, ɛmɔkɔ adwuma ne, odi kyɛ ɛmɔwɛne ahemvie ne,

⁶(nza nu ngyɛmuɛ ko bieku kɔwɛne Sure pambim ne, na nza nu ngyɛmuɛ ko koso kogyinagyina pambim ne anwo awɛmvoɛ nemɔ asi). Sɔ mmenia kure nza ne kɔwɛne ahemvie ne.

⁷Na ɛmɔ nu fekue nyɔ bɔ odwu afofikyẽa, bɛngɔ adwuma ne, odi kyɛ bɛwɛne ɛhene ne wɔ AWURADE awuro berɛ.

⁸Odi kyɛ bɛpɛ ɛhene ne anwo beyia bɔ ebiala tira akodeɛ ɔ; na ebiala bɔ okopingye kango ne nen, odi kyɛ beku ye ɔ. Odi kyɛ ɛmɔbɔ ɛhene ne anwo waen nekaa bɔ ɔkɔhɔ biala.”

⁹Safohene nemɔ yɔle kyɛbɔ ɔsɔfo Yehoada hyɛle ne ala pɛpɛɛpɛ. Ebiala ye mmenia bɔ bɛkɔ adwuma afofikyẽa ne, ɔne bɛ bɔ bɛngɔ adwuma afofikyẽa ne, ɔfale bɛ wale ɔsɔfo Yehoada berɛ.

¹⁰Nana Dawide pealɛɛ mɔ ne akokyɛm mɔ bɔ né bafa basie wɔ AWURADE awuro berɛ ne, ɔsɔfo ne fa mane safohene nemɔ.

¹¹Awɛmvoɛ nemɔ te gyinane, bɔ ebiala tira ye akodeɛ ɔ, fi awuro ne ngwaen kɔka ye sorɔ. Bɛpɛle afɔleɛ bokyea ne ɔne awuro ne anwo beyiale, kyɛ bɛwɛne ɛhene ne wɔ nekaa biala.

¹²Afei Yehoada yele Nana Ahasia awa ne fitele. Ɔfale ahennie abotire bɔle ye, na ɔfale Adanzeɛ nwomaa ne mane ye. Bɛbɔle ye ohomoo, na bɛfale ɛpopalɛ ngoo bɛpopale ye. Bɛbɔle bɛ sa nu bɛbɔle ese kyɛ, “Nana, wɔ ngoa so oo!”

¹³Atalia tele ese bɔ awɛmvoɛ nemɔ ne maen ne bɛbɔ ne, ɔhɔle bɛ berɛ wɔ AWURADE awuro berɛ.

¹⁴Ɔtole ye nye neane, na onwuni kyɛ ɛhene ne gyi bonima ne anwo kyɛbɔ amammerɛ kyire ne. Né safohene nemɔ ne totorobɛndohulɛfoɛ gyigyi ɛhene ne anwo, bɔ maen ne anu mmenia amukoraa behu awɛen bedi ahurusi ɔ. Na Atalia sunzuale ye bɔbɔ ye tena nu teane nu kyɛ, “Bayɛ lɔen oo! bayɛ lɔen oo!”

¹⁵Yeɛ ɔsɔfo Yehoada hyɛle safohene mɔ bɔ bɛlela koɛhonɛfoɛ nemɔ noa ne kyɛ, “Ɛmɔhwe ye bɛfa koɛhonɛfoɛ nemɔ anu bɛbra, na ebiala bɔ okogyina ye si ne, ɛ́mɔfa ngrandɛ behũ ye.” Na ɔsɔfo ne hane kyɛ, “Nnɛmaa ɛmɔku ye wɔ AWURADE awuro berɛ.”

¹⁶Yiti bɛhyele ye, na bɛfale ye bɛfale atee bɔ mbɔngɔ fa so bɛkɔ ahemvie berɛ ne aso, na berɛ yeɛ behuni ye ɔ.

¹⁷Yehoada yɛle apam tole AWURADE, yeɛ Nana Yoase ne maen ne b’afia, kyɛ odi kyɛ bɛyɛ AWURADE maen. Afei koso ɔyɛle apam tole Nana Yoase ne maen ne b’afia.

¹⁸Yeɛ maen ne anu mmenia amukoraa bɛhɔle Baal asɔneyɛɛ so beebubuli bosoen ne beguale ase. Ye afɔleɛ bokyea mɔ ne ye amoen mɔ koso, bebubuli bɛ nu pasapasa. Behuni Matan bɔ ɔte Baal kɔmeɛ ne wɔ afɔleɛ bokyea nemɔ anyunu. Na ɔsɔfo ne mane awɛmvoɛ mɔ wɛnene AWURADE awuro ne.

¹⁹Ɔsɔfo ne tuli safohene nemɔ, Karitefoɛ nemɔ, awɛmvoɛ, ɔne maen ne anu mmenia amukoraa maa bɛɛfale Nana Yoase befili AWURADE awuro dɔ bɛwale, na bɛfale awɛmvoɛ nemɔ pambim ne anu bɛhɔle ahemvie berɛ. Ɔɔtenane ahennie bia ne aso.

²⁰Yiti maen ne anu mmenia amukoraa belili ahurusi. Bɛfale ngrandɛ behuni Atalia wɔ ahemvie berɛ beyiele ne, ye si ye, kuro ne anu dwole fɔnwoo.

²¹Yehoase[4] lili hene ne, né wali afoɛ nzoo.