Read Sehwi 2 Ahemvo 13 Bible Online

2 Ahemvo 13 - Sehwi bible

2 Ahemvo 13

¹Yuda hene Ahasia ɔwa Yoase lili Yuda so hene ne, ye afoɛ bɔ ɔtɔ so aburanyɔ ne nza ne anu, Yehu awa Yehoahase lili Yisrael so hene wɔ Samaria. Olili hene afoɛ buru ne nzoo.

²Ɔyɔle bɔ ɔte bɔne wɔ AWURADE nyunu ɔ. Nebate awa Yeroboam ye bɔne bɔ ɔyɔle, bɔ ɔhwehwene Yisrael hɔle nu ne, Yehoahase koso wandwe ye nwo wamvi ye nwo, na ɔyɔle bie.

³AWURADE fɛle Yisrael so yaa piri, maa ɔnate so ɔfale bɛ wurale Siria hene Hasael sa mmerɛ pee, yeɛ afei ɔfale bɛ wurale Hasael awa Ben Hadade koso sa.

⁴Nakoso Yehoahase sũ frɛle AWURADE, na AWURADE tiele ye, ofikyɛ AWURADE nwuni kyɛbɔ Siria hene osi teetee Yisraelfoɛ ɔ.

⁵Yiti AWURADE yele defoɛ mane Yisrael, maa ɔnate so benyane bɛ fawɔnwodi befili Siriafoɛ sa nu, na Yisraelfoɛ bɛtenane bɛ bɔbɔ b’awuro kyɛ daa ne ala.

⁶Nakoso bandwe bɛ nwo bamvi bɔne bɔ Yeroboam ne ye awuro ama bɛyɔle, bɔ ɔhwehwene Yisrael hɔle nu ne anu, na mmom bɛhɔle so bɛyɔle bie. Afei Asera dosii ne, bɛmaa ɔhɔle so ogyinane Samaria.

⁷Yiti Yehoahase koɛhonɛfoɛ bɔ bɛte pɔngɔhanɛfoɛ ne, né bɛmmo aburannu. Ɔhale teaseɛnam buru yeɛ koɛhonɛfoɛ bɔ bɛnate bɛ gya nu ɔ apee buru pɛ. Ofikyɛ Siria hene huhuni bɛ maa bɛsamone berɛ kyɛ mvuture bɔ sona tiatia so ɔ.

⁸Afei Yehoahase nwo dwirɛ ngaa ne, ɔne bɔ ɔyɔle amukoraa, ɔne ye anwoserɛ, amba, bahyerɛ ye wɔ Yisrael ahemvo nwo dwirɛ nwomaa ne anu.

⁹Yehoahase toale ye mbanyi mɔ. Besiele ye wɔ Samaria, na ɔwa bienzua Yoase lili ye bia.

¹⁰Yuda hene Yoase lili hene ne, ye afoɛ bɔ ɔtɔ so aburasa ne nzoo ne anu, Yehoahase awa Yehoase lili Yisrael so hene wɔ Samaria. Olili hene afoɛ buru ne nzia.

¹¹Ye koso ɔyɔle bɔ ɔte bɔne wɔ AWURADE nyunu ɔ. Nebate awa Yeroboam ye bɔne amukoraa bɔ ɔyɔle, bɔ ɔhwehwene Yisrael hɔle nu ne, wandwe ye nwo wamvi ye nwo, na mmom ɔhɔle so yɔle bie.

¹²Afei Yoase nwo dwirɛ ngaa ne, ɔne bɔ ɔyɔle amukoraa, ɔne anwoserɛ bɔ ɔfa ho tiale Yuda hene Amasia ne, amba, bahyerɛ ye wɔ Yisrael ahemvo nwo dwirɛ nwomaa ne anu.

¹³Yoase toale ye mbanyi mɔ, na Yeroboam lili ye bia. Besiele Yoase wɔ Samaria wɔ Yisrael ahemvo asieleɛ.

¹⁴Afei mmerɛ bɔ Elisa bɔle anwonyerɛ bɔ ɔnate so maa nziɛ ye owuli ne, Yisrael hene Yoase hɔle ye berɛ, na oosuni wɔ ye nyunu berɛ sele kyɛ, “Me baba ee! Me baba ee! Yisrael teaseɛnam mɔ ne pɔngɔhanɛfoɛ ee!”

¹⁵Yeɛ Elisa sele ye kyɛ, “Kɔfa agyaen mɔ bra. Yiti Yoase ɔɔfale agyaen mɔ wale.

¹⁶Yeɛ Elisa sele Yisrael hene Yoase kyɛ, “Twe agyaen ne anu.” Na ɔhwene nu. Elisa fale ye sa guale Nana Yoase sa nemɔ aso.

¹⁷Na Elisa sele ye kyɛ, “Bukye eyia afiteleɛ mboma ne.” Na obukyele mboma ne. Elisa sele kyɛ, “To agyaen ne.” Na ɔtole. Yeɛ Elisa sele kyɛ, “AWURADE ngonimlilɛ agyaen ɛhe! Siria so ngonimlilɛ agyaen ne ɛhe! Ofikyɛ ɛne Siriafoɛ kɔho wɔ Afeke kɔpem kyɛ ekonua bɛ boso koraa ɔ.”

¹⁸Elisa toale so hane kyɛ, “Sesa agyaen nemɔ.” Na ɔsesale. Yeɛ Elisa sele Yisrael hene kyɛ, “To agyaen nemɔ fa wowɔ ase.” Yisrael hene tole agyaen ne pɛen nza, na ɔyakyili.

¹⁹Nyameɛ sona ne fɛle ye so yaa, na osele kyɛ, “Ahaa odi kyɛ ɛto pɛen nnu anaa pɛen nzia. Ye sɔ ne, ahaa ekohu Siriafoɛ alaa kɔpem kyɛ ekonua bɛ boso ɔ. Nakoso bɔ ayɔ ye de, ekoli Siria so ngonim pɛen nza pɛ.”

²⁰Afei Elisa wuli, na besiele ye. Sɛ bɛhyɛ afoɛ bo biala a, ɔyɛ a né Moabo koɛhonɛfoɛ mɔ bɛfa koɛ bɛbateta Yisrael maen ne.

²¹Mmerɛ bɔ Yisraelfoɛ wɔ so bɔ besie biaa bie ne, benwuni Moabofoɛ koɛhonɛfoɛ bɔ bɛbɔ apaa ɔ. Yiti begyili fuin ne bɛtole Elisa asieleɛ ne anu. Biaa ne fuin ne hane Elisa mmowue pɛ, otingyele fili ewue nu, na odwɔsole gyinane ye gya so.

²²Siria hene Hasael tanene Yisrael nye mmerɛ bɔ né Yehoahase di hene ne amukoraa.

²³Nakoso AWURADE lole bɛ, na onwuni bɛ anwumvoin. Ɔnate ye apam bɔ ɔne Abraham, Yisake ne Yakob yɛle ne ati, ɔpɛnene ye nye neane Yisrael. Na wangukũ bɛ, yeɛ wambɛ bɛ asue wamvi ye nyunu maa waadwu ɛnɛ.

²⁴Siria hene Hasael wuli ne, ɔwa bienzua Ben Hadade lili ye bia.

²⁵Na Yisrael nguro bɔ Ben Hadade baba Hasael ole fili Yehoase baba Yehoahase ye sa nu wɔ koɛ nu ne, Yehoase sa le fili Ben Hadade sa nu. Yoase lili Ben Hadade so ngonim pɛen nza, na osa lele Yisrael nguro nemɔ.